მარტში, საქართველოს მასშტაბით 3-ვარსკვლავიანი სასტუმროების საშუალო ფასმა1 132 ლარი შეადგინა. სამ ვარსკვლავიან სასტუმროთა შორის ყველაზე მაღალი დღიური განაკვეთი მცხეთა-მთიანეთის რეგიონში დაფიქსირდა (საშუალოზე 32%-ით მაღალი). 4-ვარსკვლავიანი სასტუმროების საშუალო ფასმა მარტში 230 ლარი შეადგინა. საშუალოდ ყველაზე ძვირი 4-ვარსკვლავიანი სასტუმროები მცხეთა-მთიანეთის რეგიონშია (საშუალოზე 19%-ით მაღალი). ბოლო ხუთი თვის განმავლობაში, რეგიონებს შორის, როგორც 3-ვარსკვლავიან, ასევე 4-ვარსკვლავიან სასტუმროთა ყველაზე მაღალი საშუალო ფასები მცხეთა-მთიანეთის რეგიონში ფიქსირდება. აღსანიშნავია, რომ სტატისტიკის ეროვნული სამსახურის ბოლო მონაცემებით, რეგიონებს შორის ყველაზე მაღალი საშუალოთვიური ანაზღაურება-735.5 ლარი სასტუმროებისა და რესტორნების სექტორში მცხეთა-მთიანეთში დაფიქსირა (2016 წელს). ასევე, საქართველოს ტურიზმის ეროვნული ადმინისტრაციის კვარტალური ანგარიშების მიხედვით, ბოლო სამი წლის მონაცემებით, შიდა ვიზიტორების მიერ დასვენების მიზნით ყველაზე ხშირად მონახულებულ რეგიონებს შორის, აჭარის შემდეგ, მცხეთა-მთიანეთი ლიდერობს. 5-ვარსკვლავიან სასტუმროთა საშუალო ფასმა 2018 წლის მარტის თვეში 378 ლარი შეადგინა. თბილისში, ამ ტიპის სასტუმროებში, სტანდარტული 2-ადგილიანი ნომრის საშუალო ფასმა 580 ლარი შეადგინა, კახეთში - 416 ლარი, აჭარაში - 255 ლარი, ხოლო სამცხე-ჯავახეთში - 349 ლარი. საოჯახო ტიპის სასტუმროების2 საშუალო ფასმა მარტში 74 ლარი შეადგინა, ყველაზე მაღალი ფასი საოჯახო ტიპის სასტუმროებში ქვემო ქართლის და გურიის რეგიონებში დაფიქსირდა.

წყარო: http://www.bm.ge/ka/article/sastumros-sashualo-fasebi-saqartveloshi/18639