ახლო მომავალში შიდა რეისების სუბსიდირებაზე ახალი ტენდერი გამოცხადდება, სახელმწიფო ბიუჯეტიდან ამისთვის 6-დან 8 მილიონ ლარამდე თანხა გამოიყოფა,- ამის შესახებ საქართველოს გაერთიანებული აეროპორტების დირექტორმა, ქეთი ალექსიძემ  განაცხადა. ქეთი ალექსიძემ შიდა რეისებზე ბილეთების ფასის ზრდაზეც გააკეთა კომენტარი:

„რამდენიმე წლის წინ დავიწყეთ შიდა ფრენების სუბსიდირების პროექტი, რაც იყო ძალიან წარმატებული. მოთხოვნა იყო ძალიან მაღალი და იმისთვის, რომ ის დაგვეკმაყოფილებინა, დამატებითი თანხები მიგვეღო ბიუჯეტიდან და რეისების რაოდენობა მოგვემატებინა, მივიღეთ გადაწყვეტილება, ბილეთის ფასი გაგვეზარდა. საბოლოო ჯამში ეს საშუალებას მოგვცემს, უფრო მეტ მგზავრს მოვემსახუროთ. 

ყველა შიდა რეისი არის სრულად სუბსიდირებული, რაც ნიშნავს იმას, რომ გარდა იმ თანხისა, რასაც უშუალოდ მგზავრი ბილეთში იხდის, სახელმწიფო ბიუჯეტიდან იფარება საკმაოდ დიდი თანხები. 

აპრილში მოხდა ბილეთის ფასის ზრდა და იმ დღიდან დაახლოებით 700 ბილეთი გაიყიდა ბათუმის მიმართულებაზე, რაც ნიშნავს, რომ მაისი-ივნისის თვეებში ამ მიმართულებით საჰაერო ხომალდი თითქმის სულ სავსეა. ანალოგიური სიტუაციაა სხვაგანაც, ბევრი ბილეთია გაყიდული მესტიის რეისზეც, სადაც ასევე დიდია მოთხოვნა“ - განაცხადა ქეთი ალექსიძემ. 

შეგახსენებთ, რომ ამჟამად რეისებს ქვეყნის შიდა მიმართულებებზე ServiceAir Holding ასრულებს, რომელიც ავიაკომპანიებს - "აკეარ ჯორჯია" და "სერვის ეარი" აერთიანებს. 

როგორც ჰოლდინგის დამფუძნებელმა ამირან მანჯავიძემ განაცხადა, ტენდრეში, რომელიც შიდა რეისების სუბსიდირების მიზნით გამოცხადდება, იმ შემთხვევაში მიიღებენ მონაწილეობას, თუ სატენდერო პირობები მათი კომპანიისთვის მისაღები იქნება.