„ქუთაისის აეროპორტის მიმდებარე ტერიტორიაზე გაცილებით მასშტაბური პროექტი კეთდება და ეს არ გულისხმობს მხოლოდ რკინიგზის მიყვანას აეროპორტამდე“, - ამის შესახებ აეროპორტების გაერთიანების ხელმძღვანელმა ქეთი ალექსიძემ „საქმიან დილას" განუცხადა. მისი თქმით, პროექტის ფარგლებში დაგეგმილია ტერიტორიის განვითარება და ლოჯისტიკური-სატრანსპორტო ცენტრის შექმნა. 

„ამ ეტაპზე აქტიურად ვმუშაობთ კონცეფციის ნაწილზე, ერთ-ერთი შეხვედრა დღესაც გვაქვს ჩანიშული. მასშტაბურობიდან გამომდინარე კი, პროექტის ვადები შეიცვალა და შემოდგომამდე გადაიწია, თუმცა შედეგად ჩვენ გვექნება ცენტრი, რომელიც დააკავშირებს აეროპორტს, რკინიგზასა და მის გარშემო არსებულ ინფრასტრუქტურას.“ - აღნიშნა ალექსიძემ. 

მისი ინფორმაციით, კონცეფციაზე მუშაობა შემოდგომაზე დასრულდება, ხოლო პროექტის დასრულების ვადები უკვე მოგვიანებით გაჟღერდება.