გურიის სოფლებში საოჯახო სასტუმროებზე მოთხოვნა 10-ჯერ გაიზარდა, - ამის შესახებ „სკიჯის სახლის“ დამფუძნებელმა დარეჯან ბერძენიშვილმა განაცხადა, რომელიც ჩოხატაურის რაიონში, სოფელ ხიდისთავში, საოჯახო სასტუმროს 2016 წლიდან ფლობს. 

„ძირითადად უცხოელები მოდიან გერმანიიდან, თურქეთიდან, რუსეთიდან, უკრაინიდან, ციმბირიდან, ბელორუსიიდან, განსაკუთრებით წელს რუსი ტურისტების რაოდენობამ იმატა. ახლა დაიწყო ტენდენცია, რომ ჯერ ზღვაზე ისვენებენ, შემდეგ კი მოდიან ქართულ სოფლებში და საოჯახო ტიპის სასტუმროებში ჩერდებიან. ძალიან მოსწონთ ჩვენი ბუნება და ის სერვისები, რასაც ვთავაზობთ: ესაა ხაჭაპურის ცხობის მასტერკლასი, თუ ყველის ამოყვანა, ჯანჯუხების ამოვლება, თუ „ზავოდობა“. სტუმრებს ასევე ვთავაზობთ საფეხმავლო და კულტურულ ტურებს, თევზაობას, საოჯახო საქმიანობაში მონაწილეობას, ღვინის დაყენებას და სხვა... სასტუმრო „სკიჯის სახლი“ 11 ადამიანს იტევს, მოთხოვნა იმდენად დიდია, რომ ხშირად სტუმრების განთავსება მეზობელ სახლებში მიწევს. ჩვენთან სტუმრობა დილის საუზმით 60 ლარი ღირს, დამატებით სერვისებს კი ინდივიდუალური ღირებულება აქვს“, - განაცხადა დარეჯან ბერძენიშვილმა. 

მისივე თქმით, სამომავლოდ გაფართოებას და ახალი საოჯახო სასტუმროს მშენებლობას აპირებს, რომელიც 5-ნომრიანი და თანამედროვე სტანდარტების იქნება, ამისთვის 100-120 ათასი ლარის ინვესტიცია სჭირდება. თანხის მოძიების მიზნით, სახელმწიფო პროგრამებში მონაწილეობას გეგმავს. 

„2016 წელს, როდესაც საოჯახო სასტუმროს ბიზნესი დავიწყე, გურია საქართველოს ტურისტულ რუკაზე საერთოდ არ იყო, საერთოდ არ ცნობდნენ ამ მხარეს და ამბობდნენ, "გურიაში რა უნდა ნახოო“... ვფიქრობ, ამ რუკაზე რამდენიმე წერტილი მეც დავსვი, რადგან ყველანაირად ვცდილობდი სტუმრები კმაყოფილები წასულიყვნენ და კარგი ამბავი წაეღოთ ჩვენგან. ცნობიერებაში ჩაჯდა, რომ გურიაში არის სანახავი ბახმარო, გომის მთა, უამრავი მდინარე და ჩანჩქერი, სადაც ლოკაციები მოსაწყობია და გასაკეთებელია მისასვლელი გზები, რომ ტურისტი ადვილად მივიდეს, ამ მხრივ ყურადღება გვჭირდება“ - განაცხადა დარეჯან ბერძენიშვილმა.