31 ოქტომბრიდან, კვირაში 2-ჯერ ბუქარესტი-თბილისი-ბუქარესტის მიმართულებით ფრენებს რუმინეთის სახელმწიფო ავიაკომპანია TAROM შეასრულებს. ამის შესახებ რუმინეთის ელჩმა საქართველოში, ავიაკომპანია TAROM-ის ხელმძღვანელობამ, საავიაციო ხელისუფლებისა და ტურიზმის სფეროს წარმომადგენლებმა განაცხადეს.

ოფიციალური განცხადებით, ეკონომიკისა და მდგრადი განვითარების სამინისტროს „საქართველოს აეროპორტების გაერთიანება“ რუმინეთის სახელმწიფო ავიაკომპანია „ტარომთან“ მოლაპარაკებებს 2015 წლიდან აწარმოებდა. როგორც „საქართველოს აეროპორტების გაერთიანებაში“ აცხადებენ, თბილისიდან ბუქარესტის მიმართულებით პირდაპირი საჰაერო მიმოსვლის დაწყება ორ ქვეყანას შორის ტურიზმის განვითარების კუთხით კიდევ ერთი მნიშვნელოვანი წინგადადგმული ნაბიჯი იქნება. აქამდე ბუქარესტის მიმართულებით სეზონურ ფრენებს ქუთაისის აეროპორტიდან უნგრული დაბალბიუჯეტიანი ავიაკომპანია  „ვიზეარი“ ასრულებდა.

 ავიაკომპანია „ტარომი“ 1954 წელს დაარსდა, 2010 წლიდან კი ის Sky Team ალიანსის წევრია.