ლონდონში, გეტვიკის აეროპორტში ჩარჩენილ ქართველ მგზავრებს წყლისა და საკვების ვაუჩერები დაურიგდათ, - ამის შესახებ  ინფორმაციას Georgian Airways-ის წარმომადგენელი, თამუნა თანდაშვილი ადასტურებს, თუმცა კომპანია არ ფლობს ინფორმაციას იმასთან დაკავშირებით, თუ როდის განახლდება ფრენები. 

„უშუალო კავშირზე ვართ ყველა მგზავრთან. კომუნიკაცია ტელეფონების საშუალებით ხდება; ვეკონტაქტებით ოჯახის წევრებსაც. მგზავრების სასტუმროში გადაყვანას ვერ ვახერხებთ, რადგან აეროპორტის მხრიდან არ გვაქვს ინფორმაცია, თუ როდის განახლდება ფრენები. ჯერ გვითხრეს, რომ 13:30 ზე შევძლებდით გამოფრენას, თუმცა ვერ მოხერხდა, ბარგი კი, მგზავრებს თვითმფრინავში აქვთ“, - აცხადებს თანდაშვილი. 

მისივე თქმით, Georgian Airways-სს იქ წარმომადგენელი არ ჰყავს, თუმცა Georgian Airways-ის 89 ქართველ მგზავრს გეტვიკის აეროპორტის წარმომადგენელი ემსახურება. 

შეგახსენებთ: გეტვიკის აეროპორტი უკვე 19 საათზე მეტია რაც დაკეტილია. მიზეზი კი, ე.წ „უხილავი დრონებია“, რომელიც აეროპორტის თავზე გამოჩნდა. 

ამ დროისთვის, აეროპორტში 110 000 მგზავრია ჩარჩენილი.