ვენეციაში შესასვლელად ტურისტებს გადასახადის გადახდა მოუწევთ. ახალი რეგულაციის დაწესებას იტალიის 2019 წლის ბიუჯეტი ითვალისწინებს.

ქალაქში შესასვლელი ბილეთი 2,5 ევროდან 10 ევრომდე ეღირება. ბილეთის ფასი დამოკიდებული იქნება იმაზე, თუ რომელ სეზონზე შევა ტურისტი ქალაქში. ადგილობრივი მედიის ინფორმაციით, ზაფხულის ტურისტულ სეზონზე ტურისტს ერთი დღის გატარებისთვის 10 ევროს გადახდა მოუწევს, სხვა სეზონზე კი ფასი 2,5 ევროდან 5 ევრომდე იქნება.

ახალი რეგულაციის მიხედვით, ვენეციაში შესვლის საფასურს გადაიხდიან ის ტურისტებიც, რომლებიც ქალაქს შესაძლოა, მხოლოდ რამდენიმე საათით ესტუმრონ.  

ვენეციას ყოველწლიურად საშუალოდ 20 მილიონი ტურისტი სტუმრობს. დღის ტურისტული ექსკურსიების ჩათვლით, ეს რიცხვი 27 მილიონს აღწევს. დღეს ის ტურისტები, რომლებიც ქალაქში თუნდაც ერთი ღამით რჩებიან, იხდიან ქალაქის გადასახადს, შედეგად ბიუჯეტში 30 მილიონი ევრო შედის ყოველწლიურად. თუმცა ტურისტები, რომლებიც არ რჩებიან ღამით სასტუმროში, ისინი ამ გადასახადს არ იხდიან. სწორედ ამ წესს ცვლის ხელისუფლება, იტალიის მთავრობაში ამბობენ, რომ ახალი სისტემა 50 მილიონ ევროს შემოსავალს უზრუნველყოფს.