ავიაკომპანია WIZZ Air-ი 6 ახალი მიმართულებით ფრენებს 1 აგვისტოს ნაცვლად 10 სექტემბრიდან დაიწყებს. 

რეგულარული ფრენები ეინდჰოვენის (ჰოლანდია), ტალინის (ესტონეთი), ბრიუსელის (ბელგია), კოპენჰაგენის (დანია), ბარის (იტალია) და ბაზელის (შვეიცარია) მიმართულებით კვირაში რამდენჯერმე შესრულდება. 

Wizz Air ქუთაისის ბაზაზე მესამე ეარბასის A320-ისა და 6 ახალი მიმართულების დამატებას 2019 წლის 10 სექტემბრიდან აანონსებს, ნაცვლად - 1 აგვისტოსი. 
ახალი მიმართულებებით ფრენების დაწყების გადავადების მიზეზს ავიაკომპანიაში საოპერაციო შეფერხებებით ხსნიან. 

„საოპერაციო შეფერხების გამო მესამე ბაზირებული თვითმფრინავის დამატება დანიშნული პირველი აგვისტოს ნაცვლად 2019 წლის 10 სექტემბრიდან მოხდება, იმავე დღეს დაიწყება რეისების შესრულებაც. 

მგზავრებს, რომლებმაც უკვე შეიძინეს ბილეთები ამ ექვსი მიმართულებით 1 აგვისტოდან 10 სექტემბრამდე თარიღებში, WIZZ Air დეტალურ ინფორმაციას მიაწვდის ცვლილებების შესახებ. 

კომპანია მათ ბილეთის თანხის 100%-ით ანაზღაურებას, ბილეთის გადაცვლას (იმავე მიმართულებით სხვა თარიღებზე ან ნებისმიერი სხვა არჩეული მიმართულებით) ან WIZZ კრედიტზე გადახდილი ბილეთის საფასურის 120%-ით ანაზღაურებას სთავაზობს. WIZZ Air გულწრფელ ბოდიშს უხდის მგზავრებს ამ ცვლილებით შექმნილი დისკომფორტისა და უხერხულობისთვის. 

მგზავრები, რომლებმაც ბილეთები ტურისტული სააგენტოების მეშვეობით შეიძინეს, უნდა დაუკავშირდნენ ამავე სააგენტოებს დროის ან მიმართულების შესაცვლელად. 
მგზავრებს საქართველოდან, რომლებმაც ბილეთები საიტზე wizzair.com ან მობილური აპლიკაციით შეიძინეს, ონლაინ პლატფორმების გარდა, შეუძლიათ დაუკავშირდნენ კლიენტთა მომსახურების სერვისს ნომერზე +995 706 777 037 და განახორციელონ ცვლილებები. სხვა ქვეყნებში მცხოვრებ ადამიანებს კი ვთხოვთ გადაამოწმონ საკონტაქტო ნომერი: https://wizzair.com/ka-ge/information-and-services/travel-information/special-assistance#/  - ნათქვამია გავრცელებულ ინფორმაციაში. 

შეგახსენებთ: WIZZ Air-მა ქუთაისის საეთაშორისო აეროპორტიდან ოპერირება 2012 წელს დაიწყო.