მარტვილის კანიონი წელს ტურისტებს ახალ სერივსს შესთავაზებს. აქამდე არსებულ ტურისტულ მომსახურებას დაივინგი ემატება. აგვისტოდან წყალქვეშა ცურვის მოყვარულებს შესაძლებლობა ექნებათ კანიონში ყვინთვის და წყალქვეშა სამყაროს დათვალიერების. მარტვილისა და ოკაცეს ბუნების ძეგლების ადმინისტრაციის დირექტორის ზაზა გაგუას განცხადებით, ახალი სერვისი ტესტირების ეტაპზეა.

„მოსული ვიზიტორი ყიდულობს დაივინგის ბილეთს და ინსტრუქტორთან ერთად ჩაყვინთავს კანიონში. ასევე ფუნქციონირებს ყველა ის სერვისი, რაც მანამდე იყო დანერგილი. მათ შორის ნავებით სეირნობა“, - აცხადებს ზაზა გაგუა.

მისივე ინფორმაციით, მარტვილში ტურისტული სეზონი აქტიურად უკვე მაისიდან დაიწყო და ივნისის ჩათვლით ყოველდღიურად 1000 ვიზიტორი დაფიქსირდა. ზაზა გაგუას ცნობით, უკვე ივლისიდან გაიზარდა ტურისტების რაოდენობა და დღის განმავლობაში 1700-2800 აღწევს.

მარტვილისა და ოკაცეს ბუნების ძეგლების ადმინისტრაცია აერთიანებს 13 ბუნების ძეგლს, მათ შორის 3 კანიონს, 5 ჩანჩქერსა და 5 მღვიმეს. მათგან 10 ბუნების ძეგლი მარტვილის მუნიციპალიტეტს, 2 ხონის მუნიციპალიტეტს, 1 კი ჩხოროწყუს მუნიციპალიტეტს ეკუთვნის.

წყარო: http://www.livepress.ge

რამდენიმე წუთის წინ, ქუთაისის დავით აღმაშენებლის სახელობის აეროპორტში, ცენტრალური და აღმოსავლეთ ევროპის დაბალბიუჯეტიანმა უნგრულმა ავიაკომპანია Wizz air-მა რუმინეთიდან საქართველოს მიმართულებით პირველი ავიარეისი შეასრულა.

საქართველოს აეროპორტების გაერთიანების ინფორმაციით, ბუქარესტიდან ქუთაისის მიმართულებით შესრულებულ პირველ ავიარეისს აეროპორტში ტრადიციულად წყლის შადრევნით დახვდნენ. რეისის პირველ მგზავრებს აეროპორტში ქართული ღვინოები დაურიგდათ.

ბუქარესტი-ქუთაისის მიმართულებით ფრენები კვირაში სამჯერ: სამშაბათს, ხუთშაბათსა და შაბათს განხორციელდება. 

ეკონომიკისა და მდგრადი განვითარების სამინისტროს შპს ,,საქართველოს აეროპორტების გაერთიანების“ დირექტორის ქეთევან ალექსიძის განცხადებით, რუმინეთი რიგით მე-14 ქვეყანაა და მე-20 მიმართულება, რომელსაც ქუთაისის საერთაშორისო აეროპორტიდან ავიაკომპანია Wizz air შეასრულებს.

„დღეიდან დაიწყო ავიამიმოსვლა საქართველო-რუმინეთს შორის. ეს არის ორ ქვეყანას შორის, ჯერჯერობით ერთადერთი პირდაპირი მიმართულება. თუმცა აქვე, მინდა აღვნიშნო, რომ 1-ელი აგვისტოდან თბილისის აეროპორტში რუმინეთის სახელმწიფო ავიაკომპანია „TAROM” შეასრულებს რეგულარულ რეისებს თბილისი-ბუქარესტი-თბილისის მიმართულებით“, - განაცხადა ქეთევან ალექსიძემ.

მისივე თქმით, ,,საქართველოს აეროპორტების გაერთიანება“ მუდმივად მუშაობს ახალ ავიამიმართულებებზე. 15 ნოემბრიდან ქუთაისის საერთაშორისო აეროპორტიდან პირდაპირი ავიამიმოსვლა ევროპის კიდევ ერთი დედაქალაქის, ვენის მიმართულებით შესრულდება.

ეკონომიკისა და მდგრადი განვითარების სამინისტროს “მთის კურორტების განვითარების კომპანია” დღეს, ბაკურიანში (დიდველზე) ზაფხულის სეზონს ოფიციალურად გახსნის. 

ზაფხულის სეზონის განმავლობაში დიდველზე ყველა საბაგირო ყოველდღიურ რეჟიმში - 11:00 საათიდან 18:00 საათამდე იმუშავებს. 

ეკონომიკისა და მდგრადი განვითარების სამინისტროს ინფორმაციით, მთის კურორტების განვითარებისა და პოპულარიზაციისთვის აუცილებელია, ზამთრის კურორტები ოთხსეზონიანი გახდეს. ამ მიმართულებით კურორტზე მოწყობილია საერთაშორისო დონის ველოპარკი და 29 კმ-იანი ველობილიკი, რომელიც გათვლილია როგორც პროფესიონალი ველომრობოლელებისთვის, ასევე მოყვარულებისთვის. 

2016 წელს ბაკურიანში (დიდველზე) ამიერკავკასიაში პირველი სამთო-სათხილამურო კურორტების დამატებითი ატრაქციონი “ტობოგანი“ - ე.წ. მთის ციგა დამონტაჟდა. ატრაქციონი ფუნქციონირებს როგორც ზამთარში, ასევე ზაფხულში.

“დამსვენებლებს ასევე შესაძლებლობა აქვთ ესტუმრონ თანამედროვე ტექნიკით აღჭურვილ კინოთეატრ “ბაკურიანს“, ყოველკვირეული პრემიერებით. კინოთეატრი 2014 წელს წელს სრულად განახლდა და აღიჭურვა ახალი, სამგანზომილებიანი პროექტორითა და ეკრანით, არეკვლის 3.0 სისტემით, რაც ფილმის ყურების პროცესს უფრო სასიამოვნოსა და შთამბეჭდავს ხდის. კინოთეატრ “ბაკურიანში“ განთავსებული საინფორმაციო ცენტრი საერთაშორისო და ადგილობრივ ტურისტებს უზრუნველყოფს ინფორმაციით ტურისტული მომსახურებისა და ტურისტული პროდუქტების შესახებ. საინფორმაციო ცენტრი დამსვენებლებს საშუალებას აძლევს, შეიძინოს სასურველი აბონემენტი რიგში დგომის გარეშე და მიიღოს დეტალური ინფორმაცია ამინდზე, საბაგიროს ფუნქციონირებაზე, მთაზე არსებულ მდგომარეობაზე, განთავსებისა და კვების ობიექტებზე, საზოგადოებრივი ტრანსპორტის განრიგსა და ა.შ. საქართველოს სამთო-სათხილამურო კურორტების პოპულარიზაციისთვის შეიქმნა ფუნქციურად და ინფორმაციულად სრულყოფილი აპლიკაცია - ის ერთი ბრენდის ქვეშ აერთიანებს ოთხ სამთო კურორტს: გუდაური, ბაკურიანი, გოდერძი, მესტია. აპლიკაცია უნიკალური გზამკვლევია, რომელიც როგორც ზამთრის, ასევე ზაფხულის სეზონზე მომხმარებელს მთის კურორტების შესახებ ამომწურავ ინფორმაცის აწვდის“, - ნათქვამია ეკონომიკის სამინისტროს მიერ გავრცელებულ ინფორმაციაში. 

ქართული ავიაკომპანიები აგრძელებენ ევროპის საავიაციო უსაფრთხოების სააგენტოს (EASA) ავტორიზაციის პროცესის გავლას. EASA-მ მიმდინარე წელს უკვე მეორე ქართულ ავიაკომპანიაზე გასცა საჰაერო უსაფრთხოების ერთიანი ნებართვა. ავტორიზაციის (EU safety authorisation for foreign air operators – PART-TCO) საფუძველზე, "Myway Airlines"-ს ენიჭება უფლება, ერთი ცენტრალიზებული ნებართვით ოპერირება განახორციელოს EASA-ს წევრ ევროკავშირის 28 და თავისუფალი ვაჭრობის ევროპული ასოციაციის 4 ქვეყანაში. 

ნებართვა ადასტურებს საჰაერო ხომალდის ექსპლუატანტის სრულ შესაბამისობას საავიაციო უსაფრთხოების ICAO-ს და ევროკავშირის სტანდარტებთან, ამასთანავე მოწმობს ქვეყნის მიერ ფრენების უსაფრთხოების ნორმების დაცვის და ზედამხედველობის მაღალ ხარისხზე (სხვა ელემენტებთან ერთად ავტორიზაციის პროცესში ყურადღება ექცევა ICAO-ს აუდიტის დროს გამოვლენილ შედეგებს). ნებართვა ძალაშია მანამ სანამ ოპერატორი აკმაყოფილებს PART-TCO რეგულაციის სტანდარტებს ან საჰაერო ხომალდის ექსპლუატანტის მოწმობის გამცემი სახელმწიფო (საქართველო) არ შეაჩერებს ან გააუქმებს შესაბამისი სერტიფიკატის მოქმედებას. 

ავიაციის სააგენტოს ინფორმაციით, „Myway Airlines“-ზე საჰაერო ხომალდის ექსპლუატანტის სერტიფიკატი საქართველოს ეკონომიკისა და მდგრადი განვითრების სამინისტროს სამოქალაქო ავიაციის სააგენტომ მიმდინარე წლის 23 იანვარს, ხოლო გადაყვანა-გადაზიდვის მოწმობა 23 თებერვალს გასცა. ამ ეტაპზე "Myway Airlines"-ის საკუთრებაში 2007 წელს გამოშვებული ორი ერთეული Boeing B 737-8AL იმყოფება. ავიაკომპანიის ბაზირების ადგილია საქართველო და იგი ქართული საფრენოსნო და ტექნიკური პერსონალით არის დაკომპლექტებული. EASA-ს საჰაერო უსაფრთხოების ერთიანი ნებართვის ქონა გააადვილებს „Myway Airlines“-ის ოპერირებას ევროპულ საავიაციო ბაზარზე და ხელს შეუწყობს ავიაკომპანიის განვითარებას. 

“Myway Airlines” რიგით მეოთხე ქართული ავიაკომპანიაა, რომელიც ევროპის საავიაციო უსაფრთხოების სააგენტოს საჰაერო უსაფრთხოების ერთიანი ნებართვის მფლობელი გახდა. მიმდინარე წელს, ცენტრალიზებული ნებართვა „GEO SKY“ -ზე გაიცა, 2016 წელს კი EASA-ს ავტორიზაცია ავიაკომპანიებმა “Georgian Airways”-მა და “TCA”-მ მოიპოვეს. 2016 წლიდან, EASA-ს ავტორიზებული ნებართვის ქონა სავალდებულოა ნებისმიერი არაევროკავშირის ქვეყნის ოპერატორისთვის, რომელსაც სურვილი აქვს იფრინოს აღნიშნული გაერთიანების ტერიტორიაზე.

წყარო: bm.ge

დღეს ათათურქის აეროპორტში დაგეგმილი რეისები გაუქმდა, რის მიზეზადაც მეტეოროლოგიური პირობების გაუარესება დასახელდა, ამის შესახებ ინფორმაციას ადგილობრივი მედია ავრცელებს. 

აღნიშნული შეფერხება თბილისისა და ბათუმის საერთაშორისო აეროპორტებიდან დაგეგმილი რეისების შესრულებაზე არ ასახულა. 

როგორც Bm.ge-ს TAV Georgia-ში განუცხადეს, ყველა დაგეგმილი რეისი ჩვეულებრივ რეჟიმში შესრულდა. ,,Turkish Airlines“-მა დღეს გამთენიისას სტამბულის აეროპორტებში ოთხი ავიარეისი განახორციელა, მათ შორის ერთი რეისი ათათურქის, ხოლო სამი საბიჰას აეროპორტში განხორციელდა.

წყარო: bm.ge

საქართველოს ავიაბაზარზე ოპერირება ომანის დაბალბიუჯეტიანმა ავიაკომპანია Salam Air-მა დაიწყო. 
რეგულარული რეისები მასკატი-თბილისი-მასკატის მიმართულებით კვირაში სამი სიხშირით, ყოველ ორშაბათს, ოთხშაბათსა და პარასკევს Airbus A320 ტიპის საჰაერო ხომალდით სრულდება.
ეკონომიკისა და მდგრადი განვითარების სამინისტროს შპს ,,საქართველოს აეროპორტების გაერთიანება“ Salam Air-თან მოლაპარაკებებს 2015 წლიდან აწარმოებდა.
ახალ ავიარეისთან დაკავშირებით სასტუმრო ჰუალინგში პრეზენტაცია გაიმართა, რომელსაც ეკონომიკისა და მდგრადი განვითარების სამინისტროს შპს ,,საქართველოს აეროპორტების გაერთიანება“ დირექტორის, ქეთევან ალექსიძე, ტურიზმის ეროვნული ადმინისტრაციის ხელმძღვანელი გიორგი ჩოგოვაძე, სამოქალაქო ავიაციის სააგენტოს გადაყვანა-გადაზიდვების დეპარტამენტის უფროსი ალექსანდრე გაჩეჩილაძე დაესწრნენ. 
ტურიზმის ეროვნული ადმინისტრაციის ხელმძღვანელის გიორგი ჩოგოვაძის განცხადებით, ბოლო სამ წელიწადში ტურისტული ნაკადების მოსაზიდად ომანსა და სპარსეთის ყურის სხვა ქვეყნებში ტურიზმის ეროვნულმა ადმინისტრაციამ მრავალი ღონისძიებება ჩაატარა, შედეგად მნიშვნელოვნად გაიზარდა ტურისტების რაოდენობა სპარსეთის ყურის სახელმწიფოებიდან და დაინიშნა პირდაპირი ავიარეისები. 
აეროპორტების გაერთიანების დირექტორის, ქეთევან ალექსიძის განცხადებით, ომანის სასულთნოსა და საქართველოს შორის პირდაპირი რეისების განხორციელება ხელს შეუწყობს ორ ქვეყანას შორის ტურიზმის სფეროს განვითარებას, სავაჭრო-ეკონომიკური თანამშრომლობის გაღრმავებას და ახალი ბიზნესურთიერთობების ჩამოყალიბებას.

საქართველოში Salam Air-ის ოფიციალური წარმომადგენლის, კომპანია ,,ვოიაჟერის“ გენერალური დირექტორის, მარიამ ქვრივიშვილის განცხადებით, ღონისძიების მიზანია ტურიზმში მოღვაწე კომპანიებისთვის და საავიაციო სფეროსთვის პროდუქტის გაცნობა.

დაბალბიუჯეტიანი ავიაკომპანია Salam Air 2016 წელს დაფუძნდა. დღესდღეობით ავიაკომპანია მსოფლიოს 7 მიმართულებით კვირაში 116 რეისს ასრულებს.

მსოფლიოში სასტუმროების ონლაინ დაჯავშნის ყველაზე დიდ საიტზე booking.com-ზე, ამბროლაურის ერთი ეგზოტიკური სასტუმროა განთავსებული.

სასტუმროს ფოტოები შთამბეჭდავია და ის საქართველოს რეგიონებში არსებულისგან რადიკალურად განსხვავდება.

სასტუმროს მფლობელს, მინიმალისტური დიზაინით მოწყობილ ოთახებში, აქცენტი კომფორტზე და ხედზე აქვს გაკეთებული. ყველა ოთახს აქვს სამზარეულოს მინიმალური აღჭურვილობა, ტერასა, სველი წერტილი და უფასო WIFI.

როგორც აღწერაში ვკითხულობთ, მიმდებარე ტერიტორიაზე ველოსიპედით გადაადგილების საშუალებაცაა.

სასტუმროში ერთი ღამის გათევა დაახლოებით 120 ლარიდან იწყება, ფასში ამერიკული საუზმეც შედის.

ბუნება ნამდვილად საქართველოს ძლიერი მხარეა, ახლა კი როგორც ჩანს, ამ ბუნებაში “გლამურული კემპინგიც” შესაძლებელი ხდება.

წყარო: http://fortuna.ge/es-saqartveloa-egzotikuri-sastumro-ambrolaurshi-romelic-gagaocebt-fotoebi/

გერმანიის ლტოლვილთა და მიგრანტების ფედერალური ოფისის (BAMF) სტატისტიკის მიხედვით, 2018 წლის მაისში საქართველოდან თავშესაფრის მიღების მსურველთა რაოდენობა შემცირდა. BAMF-ის სტატისტიკით, თუ 2018 წლის აპრილში გერმანიაში ლტოლვილის სტატუსი 700-მდე ქართველმა მოითხოვა, მაისში ეს რიცხვი 176-მდე შემცირდა. 

რაც შეეხება მთლიანად 2018 წლის იანვარ-მაისის სტატისტიკას, BAMF-ის ინფორმაციით 5 თვეში ლტოლვილის სტატუსი საქართველოს 2 263-მა მოქალაქემ მოითხოვა, (იანვარ-აპრილში 2 087) რაც მთლიანი მაჩვენებლის 3,3%-ს შეადგენს. 

ამასთან, 5 თვის განმავლობაში გერმანიაში თავშესაფარი 68 368 უცხოელმა მოითხოვა, აქედან ყველაზე მეტი 17 587 იყო სირიის მოქალაქე; 6 900  ერაყის მოქალაქე; 4794 - ნიგერიის მოქალაქე. ათეულში ასევე შედიან ავღანეთი - 4 210 მოქალაქე; ირანის ისლამური რესპუბლიკა - 3 598 მოქალაქე; თურქეთი - 3 191 მოქალაქე; სომალი - 2 470 მოქალაქე და ა.შ. 

მაისში საგადასახადო ბარათებით საზღვარგარეთ განხორციელებული ოპერაციების რაოდენობა, წინა წლის ანალოგიურ პერიოდთან შედარებით 34% -ითაა გაზრდილი.

 ეროვნული ბანკის მონაცემებით, თუკი გასული წლის მაისიში საქართველოს მოქალაქეებმა ბარათები 669 ათასჯერ გამოიყენეს, მიმდინარე წლის მაისში ეს მაჩვენებელი 899 000-ია. გაზრდილია დახარჯული თანხის მოცულობაც. კერძოდ, მაისში ბარათებს საშუალებით განხორციელდა 146,3 მილიონი ლარის ოპერაცია, მაშინც როცა წინა წლის ანალოგიურ პერიოდში ეს მაჩვენებელი 109 მილიონი იყო. 146,3 მილიონიდან 112 მილიონი პოს-ტერმინალებზე და ინტერნეტზე, 34 მილიონი კი ბანკომატებზე მოდის.

წყარო: BM.GE

ევროპაში ერთ-ერთი ყველაზე სწრაფად მზარდი და ცენტრალური და აღმოსავლეთ ევროპის წამყვანი დაბალბიუჯეტიანი ავიაკომპანია Wizz Air გთავაზობთ ახალ მიმართულებას ზამთარში დასვენებისთვის – ავიაბილეთები მაროკოში, მარაქეშის მიმართულებით უკვე ხელმისაწვდომია პოლონეთიდან და ლიეტუვადან.

Wizz Air ზამთრის სეზონზე დასვენებისთვის მარაქეშის მიმართულებით ორ ახალ რეისს ვარშავიდან (პოლონეთი) და ვილნიუსიდან (ლიეტუვა) 2018 წლის ოქტომბრიდან იწყებს. Wizz Air არის პირველი ავიაკომპანია, რომელიც აღნიშნულ ქალაქებს პირდაპირი ავიარეისებით დააკავშირებს. ფრენები კვირაში ორჯერ განხორციელდება. მგზავრობა სულ რაღაც 29,99 ევროდან იქნება შესაძლებელი. ბილეთები უკვე ხელმისაწვდომია wizzair.com-ზე ან WIZZ მობილური აპლიკაციით.

მაროკოში ერთ-ერთი ყველაზე მასშტაბური და პოპულარული ადგილი მარაქეში ატლასის მთების გარემოცვაში მდებარეობს. ლამაზი სანაპიროების, ტრადიციული ბაზრისა და დახვეწილი სამზარეულოს ქალაქი ფერადი დასვენების მოწყობისთვის საუკეთესო დანიშნულების ადგილია. ახალი მიმართულების დამატებით, Wizz Air-ის მზრადი ქსელი მაროკოს უკვე მეორე ქალაქს მოიცავს. ამჟამად ავიაკომპანია მომხმარებლებს სთავაზობს 44 ქვეყნის 142 მიმართულებას ევროპაში და მის ფარგლებს გარეთ.

ავიაკომპანიამ მაროკოში, აგადირში ოპერირება 2017 წელს დაიწყო. ამჟამად Wizz Air მაროკოს მიმართულებით 7 რეისს უნგრეთის, ლიეტუვასა და პოლონეთის 5 ქალაქიდან უზრუნველყოფს. მაროკოში პირველი რეისის განხორციელებიდან დღემდე Wizz Air-ის დაბალბიუჯეტიანმა რეისებმა ადგილობრივი ტურიზმის ინდუსტრიების სტიმულირებას შეუწყო ხელი და 75,000-ზე მეტი ტურისტის გადაყვანა უზრუნველყო.

WIZZ AIR-ის ახალი რეისები მარაქეშის, მაროკოს მიმართულებით

სორინა რაცმა, Wizz Air-ის კორპორატიული კომუნიკაციების ხელმძღვანელმა განაცხადა: „ჩვენ ვაგრძელებთ ჩვენი ქსელის გაფართოებას და დღეს Wizz Air-ის კიდევ ერთი უნიკალური მიმართულების შესახებ გაცნობებთ. ჩვენ პირველები ვქმნით შესაძლებლობას, რომ ვარშავასა და ვილნიუსში მყოფი ჩვენი მომხმარებლები მარაქეშის მიმართულებით გაემგზავრონ. ჩვენი დაბალბიუჯეტიანი რეისები, რომელთა ფასიც სულ რაღაც 29,99 ევროდან იწყება, ქმნის შესანიშნავ შესაძლებლობას, რომ მოგზაურებმა მაროკოს მდიდარი კულტურა, სანახაობრივი ნაგებობები და შესანიშნავი სამზარეულო აღმოაჩინონ“.

რაქიდ ჰამზაოიმ, მაროკოს ეროვნული ტურისმის ადმინისტრაციის აღმასრულებელმა დირექტორმა განაცხადა: „ჩვენ ძალიან გვიხარია, რომ Wizz Air მაროკოში მოღვაწეობის არეალს აფართოებს. ჩვენ შესანიშნავ თანამშრომლობას მივაღწიეთ, რამაც საშუალება მოგვცა, ჯერ აგადირი, შემდეგ კი მარაქეში აღმოსავლეთ ევროპის ყველაზე მნიშვნელოვან დედაქალაქებთან დაგვეკავშირებინა. ჩვენი მიზანი უფრო ფართომასშტაბიანი ბაზრის ათვისებაა. ამ პარტნიორობის შედეგად, ბევრ საერთაშორისო მოგზაურს საშუალება აქვს, მაროკოსთვის დამახასიათებელი მრავალფეროვნებითა და უნიკალური გამოცდილებით ისარგებლოს. აგადირის მიმართულებით დაგეგმილ 5 ავიარეისთან ერთად, 2018 წლის იანვრიდან ჩვენ მომხმარებლებს მარაქეშის მიმართულებით დაგეგმილ 2 ახალ რეისსაც ვთავაზობთ. აღნიშნული სიახლე Wizz Air-ის პოტენციური მგზავრებისთვის კულტურის და  ბუნების აღმოჩენის, მზიან სანაპიროზე დასვენების შესაძლებლობებს აერთიანებს“.