17 საათიანი უწყვეტი ფრენის შემდეგ ავსტრალიიდან ლონდონში პირველი, ყველაზე ხანგრძლივი რეისი უსაფრთოდ დაეშვა. ამის შესახებ BBC წერს.

Qantas ავიახაზების თვითმფრინავმა მსოფლიოში ერთ-ერთი ყველაზე ხანგრძლივი ფრენა შეასრულა. პირველი ასეთი რეისი ჰითროუს აეროპორტში დაეშვა. 

თვითმფრინავმა სტარტი ავსტრალიის ქალაქ პერსიდან, ადგილობრივი დროით 19:00 საათზე, 24 მარტს აიღო და 25 მარტს დილის 5 საათზე ლონდონში დაეშვა. 

რეისზე 16 ბორტგამცილებელი და 200-ზე მეტი მგზავრი იყო. თვითმფრნავმა 14 498 კილომეტრი ბოინგ 787-9-ით დაფარა.

ცხელი სეზონის კიდევ ერთი სასურველი მიმართულება თურქეთი და მისი კურორტებია. ჩვენი მოსახლეობის ინტერესი თურქეთის მიმართ განაპირობა ქვეყნის ადგიმდებარეობამ, მისაღებმა ფასებმა, კომპფორტულმა კურორტებმა და კლიმატმა.

თურქეთის რესპუბლიკა მდებარეობს დასავლეთ აზიაში, ანატოლიის ნახევარკუნძულზე და სამხრეთ-აღმოსავლეთ ევროპის ბალკანეთის რეგიონში, კერძოდ თრაკიაში. თურქეთს ესაზღვრება რვა ქვეყანა: ბულგარეთი, საბერძნეთი, საქართველო, სომხეთი, აზერბაიჯანი (ნახიჩევანი), ირანი, ერაყი და სირია. სამხრეთით თურქეთს ესაზღვრება ხმელთაშუა ზღვა, დასავლეთით ეგეოსის ზღვა, ხოლო ჩრდილოეთით შავი ზღვა. ანატოლიას თრაკესგან აშორებს მარმარილოს ზღვა და თურქეთის სრუტეები (ბოსფორი და დარდანელი), რომლებსაც აზიასა და ევროპას შორის საზღვრად მიიჩნევენ, რის გამოც თურქეთი ტრანსკონტინენტური ქვეყანაა.

ხმელთაშუა ზღვის გასწვრივ სანაპირო რეგიონს ზომიერი ხმელთაშუა კლიმატი ახასიათებს, ცხელი, მშრალი ზაფხულითა და ნესტიანი, გრილი ზამთრით.]

თურქეთში კარგად არის განვითარებული ტურისტული სერვისი. ეს არის გამოწვეული ზღვისპირა კურორტებით, ასევე სხვადასხვა ატრაქციონებით.

ტურისტული მიმართულებებიდან აღსანიშნავია:

სტამბოლი- თურქეთის უდიდესი და ხალხმრავალი ქალაქია. ქვეყნის ეკონომიკური, კულტურული და ისტორიული ცენტრი. ის  მდებარეობს ბოსფორის სრუტის გასწვრივ მარმარილოსა და შავი ზღვის სანაპიროზე. ქალაქის ევროპის კულტურულ დედაქალაქად გამოცხადების შემდეგ სტამბოლს  მილიონობით უცხოელი ტურისტი სტუმრობს, ის  მსოფლიოს მეხუთე ყველაზე პოპულარულ ტურისტული მიმართულებაა. ქალაქის უდიდესი ღირშესანიშნოებას წარმოადგენს მისი ისტორიული ცენტრი, ნაწილობრივ იუნესკოს მსოფლიო მემკვიდრეობის ძეგლთა სიაშია შეტანილი, ხოლო ქალაქის კულტურული და გასართობი ნაწილი მდებარეობს ბუნებრივი ნავსადგურის, ოქროს რქის  მეორე ნაპირზე, ბეიოღლუს რაიონში.

ანტალია- თურქეთის სამხრეთ-დასავლეთით ულამაზეს ხმელთაშუა ზღვისპირეთის სანაპიროზე მდებარეობს. უნიკალური სილამაზით, ისტორიით, კულტურით და არქეოლოგიური სანახაობებით, ანტალია გთავაზობთ საუკეთესო მოგზაურობას და შთაბეჭდილებებს. კურორტი მდებარეობს ხმელთაშუა ზღვის სანაპიროზე თურქეთის სამრეთ-დასავლეთით, ტაურუსის მთებსა და ხმელთაშუა ზღვას შორის. ანტალია წარმოადგენს თურქეთის ტურიზმის ინდუსტრიის ცენტრს, და იზიდავს უცხოელი ტურისტების 30%-ს რომლებიც თურქეთს სტუმრობენ. ანტალიის პროვინცია მდებარეობს უძველესი პამფილიის მიწების აღმოსავლეთით და ლიციის დასავლეთით. მისი სანაპირო ზოლი 657 კმ-ს (408 მილი) შეადგენს პლაჟებით, პორტით, და უძველესი ქალაქებით, მათ შორის მსოფლიო მემკვიდრეობის ძეგლი ხანტროსი.

ბოდრუმი- თურქეთის ერთ-ერთი ყველაზე პოპულარული კურორტია. ის მდებარეობს მუღლის პროვინციაში, ანტალიიდან დაახლოებით 300 კმ-ის დაშორებით. ბოდრუმი ითვლება ეგეოსის ზღვის სანაპიროზე ყველაზე ლამაზ ქალაქად და ტურიზმისა და დასვენების პოპულარულ ცენტრად. ეგეოსის და ხმელთაშუა ზღვის შესაყარზე მდებარე თურქეთის ეს მოდური კურორტი დიდი ხანია უკვე კარგადაა ცნობილი ევროპელებისთვის. ბოდრუმს უწოდებენ თურქეთის „ლაჟვარდოვანი სანაპიროს“ დედაქალაქს. ბოდრუმი ცნობილია, როგორც თავისი ღირსშესანიშნაობებით: ჰელიკარნასის მავზოლეუმი, რომელიც შედის მსოფლიოს შვიდ საოცრებათა სიაში, წმ. პეტრეს ციხესიმაგრე, ამფითეატრი და მრავალი სხვა ანტიკური ძეგლი, რომელთა სანახავად დედამიწის სხვადასხვა კუთხიდან აქ ჩამოდიან უამრავი ტურისტი, ასევე ცნობილია  ულამაზესი სანაპიროებით, ფირუზისფერი წყლით, ულამაზესი არქიტექტურით და მომსახურების მაღალი დონით. უძველესი ძეგლების, თანამედროვეობის და ულამაზესი ბუნების  კომპოზიციური შერწყმა   ბოდრუმს აქცევს საუკეთესო დასასვენებელ ადგილად. ბოდრუმი ყოველთვის უამრავ ტურისტს იზიდავს.  ზღვაში საბანაოდ კარგი პერიოდია  აპრილის თვიდან ოქტომბრამდე. მყუდრო და ულამაზეს ყურეებში ყველაფერია თავმოყრილი რაც კი შესაძლებელია მოისურვოთ  ზღვაზე აქტიური დასვენებისთვის: სერფინგი,  დაივინგი, წყლის თხილამურები, იახტა და სხვა მრავალი აქტივობა. კურორტზე უამრავი კეთილმოწყობილი და მაღალი დონის რესტორანი, კაფე და ბარია.  საინტერესო ექსკურსიები კი თქვენს დასვენებას შემატებენ  განსხვავებულ, შემეცნებით ღირებულებას.

კუშადასი- საკურორტო ქალაქი დასავლეთ თურქეთში, ეგეოსის ზღვის სანაპიროზე, მდებარეობს თურქეთის ზღვისპირა რაიონის ცენტრში და შედის აიდინის პროვინციის შემადგენლობაში. ქალაქ აიდინის შემდეგ, ყველაზე დიდი და მნიშვნელოვანი ქალაქია საკუთარ პროვინციაში. მას ზაფხულის განმავლობაში ჰყავს უამრავი ტურისტი და არის ერთ-ერთი უდიდესი ქალაქი თურქეთში ტურისტების რაოდენობის მიხედვით. ესაზღვრება მუღლასა და იზმირის პროვინციებს. კუშადასი ერთ-ერთი ყველაზე მიმზიდველი ქალაქია ეგეოსის ზღვის სანაპიროზე.  კურორტზე  ყველაფერია იმისთვის, რომ თქვენი დასვენება და მოგზაურობა იდეალურად წარიმართოს. აქ არის ტიპური ხმელთაშუა ზღვის კლიმატი, ცხელი ზაფხულითა და ზომიერად თბილი ზამთრით, რაც უზრუნველყოფს ხანგრძლივ საზღვაო ტურისტულ სეზონს. ქვიშიანი სანაპიროები, თბილი და ფირუზისფერი ზღვის წყალი,  მრავალფეროვანი გასართობი საშუალებები, როგორებიცაა: წყლის თხილამურები, ნაოსნობა, სერფინგი, დაივინგი, პლაჟის ხელბურთი-ეს ის უპირატესობებია, რომლებიც კუშადასს ტურისტულად მიმზიდველ რეგიონად წაროაჩენს. შეგიძლიათ ისიამოვნოთ იახტებითა და გემებით, პანორამული ხედებითა და მზის ჩასვლის დაუვიწყარი სანახაობით.  რესტორნებსა და ღია კაფეებში კი ადგილობრივი კერძების დაგემოვნებას შეძლებთ.

მარმარისი- არის ულამაზესი ქალაქი დასავლეთ თურქეთში, მუღლის პროვინციაში, მდებარეობს ხმელთაშუა ზღვის სანაპიროზე და არის ერთ-ერთი უდიდესი შემოსავლის წყარო თურქეთში ტურიზმის მიხედვით. მარმარისს აქვს ძალიან კარგი მდებარეობა, იგი არის ყველაზე მნიშვნელოვანი და დიდი ქალაქი საკუთარ პროვინციაში, ადმინისტრაციულ ცენტრ ქალაქ მუღლასა და ბოდრუმის შემდეგ. კურორტი მარმარისი მდებარეობს ულამაზეს ყურეში, სადაც ერთმანეთს ერწმის  ხმეთაშუა და ეგეოსის ზღვები. ის ითვლება თურქეთის ერთ-ერთ ყველაზე პრესტიჟულ და ელიტარულ კურორტად. საკმაოდ თბილი და სასიამოვნო კლიმატით. მარმარისის დევიზია  „ყველაფერი ტურისტებისთვის“.  ის გამორჩეულია ულამაზესი ბუნებით–მთიანი ლადშაფტი, ფიჭვნარი, აკაციის ხეები და რაც მთავარია ქვიშიანი, კეთილმოწყობილი სანაპირო ზოლი.  მარმარისს სანაპირო ზოლი თურქეთის კურორტებს შორის ყველაზე გრძელია. სანაპიროსთან ახლოს განლაგებულია კაფეები, ბარები, კლუბები.  თითოეული რესტორნიდან და კაფედან ულამაზესი პეიზაჟი იშლება. უამრავი იახტა და საექსკურსიო მცირე ზომის გემები მარმარისში დამსვენებლებს სთავაზობს დაუვიწყარ ვოიაჟს. აქ შეგიძლიათ დაკავდეთ სხვადასხვა აქტოვობით-დაივინგი, სერფინგი, ნაოსნობა და სხვ.

ავიაკომპანია "ატლასგლობალი" 27 აპრილიდან გარკვეული დროით, ფრენებს წყვეტს. შეწყვეტის მიზეზი და ხანგრძლივობა ჯერ-ჯერობით არ არის ცნობილი. 

შეგახსენებთ, რომ "ატლასგლობალი" თურქული ავიაკომპანიაა, რომელიც ფრენებს 58 მიმართულებით ასრულებს.

ცნობილი ამერიკული კომპანია CNN-ი დაინტერესდა მსოფლიოს ყველაზე კომფორტული, პუნქტუალური და მოწესრიგებული აეროპორტებით:

პირველი ადგილი-პირველობას არ თმობს ჩანგი – სინგაპურის აეროპორტი.

მეორე ადგილი- ტოკიოს ჰანედის აეროპორტმა დაიკავა. აეროპორტმა ასეთი პატივი განსაკუთრებული სისუფთავისთვის დაიმსახურა.

მესამე ადგილი – მას სამხრეთ კორეა და სეულის ინჩხონის აეროპორტი ფლობს. სეული საუკეთესო განსაკუთრებულად გემრიელი სამზარეულოს გამო გახდა.

მეოთხე ადგილი – მიუნხენის აეროპორტი საუკეთესო კომფორტისა და წესრიგისთვის გახდა.

მეხუთე ადგილი- ჰონგ-კონგმა და დოჰამ კი ეს წოდება საუკეთესო პერსონალისთვის დაიმსახურეს.

აღსანიშნავია, რომ საუკეთესოთა სიაში ასევე – ნაგოიას(იაპონია), ციურიხის (შვეიცარია), ფრანკფურტის (გერმანია)  და ლონდონის ჰითროუს აეროპორტებიც მოხვდნენ.

ვენა ავსტრიის დედაქალაქია 1,6 მილიონი მცხოვრებით. ვენის ფართობი შეადგენს 414,89 კმ²–ს.  ის ქვეყნის უდიდესი ქალაქი და ამავდროულად მისი ეკონომიკური და პოლიტიკური ცენტრია. ქალაქი მდინარე დუნაის ორივე სანაპიროზეა გადაჭიმული. ვენა ცენტრალური ევროპის სამხრეთ-აღმოსავლეთ კუთხეში მდებარეობს და ძალიან ახლოსაა ჩეხეთთან, სლოვაკეთთან და უნგრეთთან.

ვენა ევროპის ერთ-ერთი ყველაზე დახვეწილი ქალაქია და საკუთარი ხანგრძლივი და მდიდარი ისტორიით დამსახურებულად უჭირავს დასავლეთის ცივილიზაციასა და მსოფლიო კულტურაში განსაკუთრებული ადგილი. ვენის განვითარებას ევროპის უდიდეს და უმნიშვნელოვანეს ქალაქებს შორის ხელი შეუწყო მისმა მოსახერხებელმა გეოგრაფიულმა მდებარეობამაც. ქალაქი მდებარეობს ალპების ჩრდილო–აღმოსავლეთ მთისწინეთსა და ვენის ქვაბულს შორის.

როგორც აღვნიშნე ვენა მსოფლიოს ერთ–ერთი ყველაზე დახვეწილი, გემოვნებიანი და კულტურული ქალაქია. მდიდარი ისტორიითა და უამრავი ღირშესანიშნაობით, უნიკალური, განსაკუთრებული მახასიათებლებით და თავისებურებით. ვენაში ყველა ტიპის ადამიანი მოახერხებს ჩაებღაუჭოს ისეთ რამეს, რაც მას  ამ ქალაქში ხელმეორედ დააბრუნებს.

ერთ დროს რომაელი ლეგიონერების, ბარბაროსებისა და მონღოლთა ურდოების მნახველი ვენა, მოგვიანებით ვალსის, მოცარტის, ბეთჰოვენის, შუბერტის, და კლიმტის სამშობლოდ იქცა. გალერეები, მუზეუმები, დახვეწილი პარკები, დიდებული ტაძრები, მდიდრული რეზიდენციები, საოპერო და თეატრის დარბაზები, სასახლეები-ეს ვენის, როგორც კულტურის ერთ-ერთი კერის სავიზიტო ბარათი და ღირსებაა.

ვენა ტურისტული თვალსაზრისით ერთ-ერთი საინტერესო და მიმზიდველი ქალაქია, გასაკვირი არცაა, რადგან ის ყველა გემოვნების, სქესის და ასაკის ადამიანის სურვილებს აკმაყოფილებს.

ვენის ღირშესანიშნაობები, რაც დღეს ამ ქალაქში უამრავ ტურისტს იზიდავს არის – 100 მუზეუმი, 27 ციხე–სიმაგრე და დაახლოებით 150 სასახლე.

წმინდა სტეფანეს ტაძარი – ქალაქისა და მთელი ავსტრიის სიმბოლო ეს ნაგებობაც ჰაბსბურგების ეპოქას ეკუთვნის, ის  მე-12 საუკუნეში ააგეს. აქ სამი ორღანია, ყველაზე დიდს 10 ათასი საყვირი აქვს.

წმინდა კარლოსის ეკლესია- სრულიად უჩვეულო არქიტექტურა აქვს კარლსრიხის ეკლესიას, იგივე წმინდა კარლოსის ეკლესიას, რომელიც შავი ჭირისგან დამცველად მიიჩნეოდა. ის XVIII საუკუნეს ეკუთვნის. ეკლესია წარმოადგენს სხვადასხვა სტილებისა და ეპოქების არასტანდარტულ ნარევს: ძველბერძნული პორტიკიდან და ძველრომაული თაღებიდან მასიურ გუმბათებამდე.

ვენის ოპერა – მსოფლიოს გამორჩეული თეატრი. რეკორდსმენია სამუშაო დღეების მიხედვით (285 დღე წელიწადში). ყოველწლიურად თეატრის კედლებში ტრადიციული მეჯლისები იმართება.

ავსტრიის პარლამენტის შენობია- 1874–1883 წლებში ვენა კიდევ ერთი შედევრით – ავსტრიის პარლამენტის შენობით დამშვენდა, რომლის წინ ცოტა მოგვიანებით ათენა პალადას დახვეწილი სკულპტურა დაიდგა.

ხოფბურგი – ჰაბსბურგების საიმპერატორო ოჯახის ერთ-ერთი რეზიდენცია, ამჟამად პრეზიდენტის სასახლე. აქ 2600 ოთახია: უამრავი ბიბლიოთეკა, ღვინის სარდაფი და სამეჯლისო დარბაზები.

ბელვედერი – ბაროკოს სტილის სასახლე კომპლექსი, რომელიც XVIII საუკუნეშია აგებული. აქ თქვენ შეგიძლიათ იხილოთ კლიმტის ცნობილი „კოცნა“.

შონბრუნი – ჰაბსბურგების კიდევ ერთი რეზიდენცია. უმსხვილესი ანსამბლი ავსტრიული ბაროკოს სტილშია. სასახლის ეზოშია მსოფლიოში უძველესი ზოოპარკი, რომელიც 1752 წლით თარიღდება. „შონბურნი“ გარშემორტყმულია ბაროკოს სტილის ბაღებით და მთელი ამ ტერიტორიის დათვალიერებას ნახევარ საათში მოასწრებთ ღია მატარებლით, რომელიც ტურისტულად მიმზიდველ ადგილებში ჩერდება.

ვენის რატუშა – ქალაქის კიდევ ერთი სიმბოლო. ნეოგოთიკური სტილის შენობა რინგშტრასეზე აღებული ქალაქის კედლის ადგილზეა აშენებული.

თანამედროვე ვენის ღირშესანიშნაობების სიაშია ძალიან მნიშვნელოვანი ნაგებობა – სამუზეუმო კვარტალი – ერთ-ერთი უმსხვილესი სამუზეუმო კომპლექსი. ეს არაა მთლად ახალი მშენებლობა – სამუზეუმო კვარტლის საფუძველი ყოფილი საიმპერატორო საჯინიბოებია, რომლებმაც XXI საუკუნეში ახალი სიცოცხლე შეიძინა და ხელოვნების ტაძრად იქცა.

უბრალოდ ისეირნეთ ქალაქის დახვეწილ ქუჩებში, უსმინეთ ბეთჰოვენს და მოცარტს. ღია კაფეებში დააგემოვნეთ ნამდვილი ვენური ტორტი და ყავა. პაბებში მიირთვით ხბოს შნიცელი და ცნობილი ვენური ძეხვეული. საღამოს კი ქალაქის ულამაზესი პეიზაჟების ფონზე დააგემოვნეთ ერთი "ბოკალი" ღვინო.

გუდაურში საბაგიროს ავარიულად გაჩერების გამო, 10 ადამიანი დაშავდა. როგორც  ჯანდაცვის სამინისტროში განაცხადეს, ათივე დაშავებულს გაეწია სამედიცინო დახმარება. 
ადგილზე მუშაობდა სასწარაფო სამედიცინო დახმარების სამი ეკიპაჟი. პირველადი დახმარების გაწევის შემდეგ, ეკიპაჟებმა დაშავებული მოქალაქეები გუდაურის ამბულატორიაში გადაიყვანეს. 
ასევე თბილისიდან გაგზავნილია რეანომობილები, რომელიც საჭიროების შემთხვევაში პაციენტებს თბილისში გადმოიყვანს. მათ საშუალო სიმძიმის დაზიანებები აღენიშნებათ.

საქართველოში შემოსული უცხოელებიდან ყველაზე მეტი ქვეყანაში 24 საათზე მეტი დროით რჩება. 2017 წლის მონაცემებით, საქართველოში შემოსული 7,5 მლნ უცხოელიდან უმეტესობა ქვეყანაში 1 დღეზე მეტხანს დარჩა. 

იმ უცხოელი ტურისტების რიცხვი, ვინც საქართველოში 24 საათზე მეტ დროს ატარებს ყოველწლიურად იზრდება. საქართველოს ღია მონაცემების ლაბორატორიის ცნობით, 2017 წელს ასეთი ტურისტების რაოდენობამ 3 478 932 შეადგინა, მაშინ როცა, 2016-ში მათი რიცხვი 2 720 970 იყო, 2015 წელს - 2 281 971. 

ზრდადია საქართველოში ტრანზიტით შემოსული პირების რაოდენობაც. 2017 წელს ეს მაჩვენებელი 1 687 289 პირს აღემატებოდა, მაშინ როცა 2016 წელს მათი რიცხვი 1 321 344 იყო, ხოლო 2015 წელს - 1 400 835. 

ხოლო ერთდღიანი ვიზიტით 2017 წელს საქართველოში 2 388 715 უცხოელი შემოვიდა. 2016-ში - 2 318 189, ხოლო 2015 წელს - 2 218 288.

ათენი  საბერძნეთის დედაქალაქი და მსოფლიოს ერთ-ერთი ყველაზე ძველი, ისტორიული და განთქმული ქალაქია. თანამედროვე ათენი დიდი და კოსმოპოლიტური ქალაქია, რაც შეეხება ძველ ათენს ის ძლიერი, დამოუკიდებელი ქალაქი და ფაქტობრივად მსოფლიოს განათლების ცენტრი იყო. ქალაქს სახელი ძველი ბერძნული მითოლოგიის ქალღმერთის, ათენას საპატივსაცემოდ დაერქვა. ათენის აგლომერაციაში დაახლოებით 3,7 მილიონი ადამიანი სახლობს. ის საბერძნეთის წამყვანი ეკონომიკური, კულტურული და პოლიტიკური ცხოვრების ცენტრია. 

ათენი მოიცავს ძველ ქალაქს, ცენტრალურ რაიონებს, გარეუბნებს, ასევე პირეოსის პორტს. ცენტრშია ორი ბორცვი: აკროპოლისის ბორცვი პართენონით და ლიკაბეტის ბორცვი (ლიკავიტოსი) მწვერვალზე წმინდა გიორგის ეკლესიით. ათენში დრო სწრაფად გადის ძველი ძეგლებისა და ნანგრევების, შესანიშნავი ნეოკლასიკური შენობებისა და მუზეუმების თვალიერებაში.

ძველ ათენს ხშირად დასავლეთის ცივილიზაციის აკვნად მოიხსენიებენ მისი კულტურული და პოლიტიკური მიღწევების გამო. მდიდარი ისტორიული მემკვიდრეობის წყალობით მას უამრავი უძველესი ნაგებობა, მონუმენტი და ხელოვნების ნიმუში შემორჩა, რომელთა შორის ყველაზე განთქმულია აკროპოლისის პართენონი — დღემდე მოღწეული კლასიკური ბერძნული ხელოვნებისა და არქიტექტურის ერთ-ერთი ყველაზე დახვეწილი ნიმუშთაგანი. ეს და სხვა მრავალი კულტურული ღირსშესანიშნაობა ათენს მოგზაურთათვის საინტერესო და საყვარელ ტურისტულ მიმართულებად წარმოაჩენს.

როგორც აღვნიშნე დღევანდელი ათენი დიდი, კოსმოპოლიტური, დინამიკური და მრავალფეროვანი ქალაქია, ამიტომ ის ყოველწლიურად უამრავ ტურისტს იზიდავს. პირველი რასაც ათენში მოსული სტუმარი ცდილობს – არის აკროპოლისის ნახვა, რომელიც აღმართულია ქალაქის თავზე, ზღვის დონიდან 156 მ სიმაღლეზე. მისი სახელწოდება – აკრო პოლი – იშიფრება როგორც მაღლობზე მდგარი ქალაქი. ოდესღაც ის იყო საბერძნეთის დედაქალაქის რელიგიური ცენტრი და შესაბამისად აქ შემონახულია ეკლსიების უმრავლესობა, რომელთა შორის ყველაზე სახელოვანია პართენონი. აკროპოლისის ტერიტორიაზე იმართება კონცერტები, სპექტაკლები და სხვა კულტურული ღონისძიებები.

ათენში ყველაზე ცნობილი უბანია პლაკა-ის ქალაქის უძველესი ნაწილია, მისი ქუჩების უმეტესობა ფეხითმოსიარულეთათვისაა განკუთვნილი. იქ შეხვდებით სუვენირების უამრავ მაღაზიას, კაფეებს, ბარებსა და რესტორნებს. მისი დინამიკურობიდან და ცხოვრების ცოცხალი რიტმიდან გამომდინარე  ამ უბანში ყველაზე მეტ ტურისტს შეხვდებით.

კიდევ ერთ-ერთი ლამაზი ადგილია ანაფიოტიკა, მისი არქიტექტურა, ქუჩების წყობა და შენობების ექსტერიერი საბერძნეთის კუნძულებს მოგაგონებთ, თეთრი სახლები და ლურჯი ფანჯრები ცოტა ხნით სანტორინიზე გამოგზაურებენ.

საინტერესო ადგილია პიტაკას ქუჩა, რომელიც ცნობილია ქუჩის ხელოვნებით. ფერადი ფარნები, ძველებური ლამპები, მაროკოსეული დიზაინი და ფერადი, ვინტაჟური დეკორაციები ხელოვნების მოყვარული ადამიანებისთვის ნამდვილი მისწრებაა.

ღირსშესანიშნაობებიდან საინტერესოა პროპილეები-პროპილეები შესასვლელს ნიშნავს. აგებულია არქიტექტორ მნესიკლესის მიერ ძვ. წ. 437-432 წწ-ში.ეს არის გამჭოლი ფანჩატური, რომელიც ორი მხრიდან გახსნილია სვეტებით და ორქანობა სახურავითაა გადახურული.აქედან შედიოდნენ აკროპოლისის მოედანზე.

პინაპოთეკა-პინაპოთეკა ძველ საბერძნეთში ფერწერულ ნამუშევართა საცავს წარმოადგენდა. ეს იყო ყრუ კედლებით შემოსაზღვრული მასიური შენობა.

პართენონი-აკროპოლისის მთავარი ტაძარი აგებულია იქტინოსისა და კალიკრატესის მიერ ძვ.წ 447-438 წწ-ში. თბილი, მოყვითალო ფერის მარმარილოსაგან ნაგები ყოველმხრივ სვეტებით გარშემორტყმული ტაძარი ათენას სახელობისაა და ზომით ყველაზე დიდ ნაგებობას წარმოადგენს ამ ანსამბლში.

რაც შეეხება მუზეუმებს- ათენში 250-ზე მეტი მუზეუმი, გალერეა და სატაძრო კომპლექსია. არქეოლოგიური მუზეუმი მთელი ქვეყნის მასშტაბით ნაპოვნ უნიკალურ მასალებს ინახავს. ბიზანტიის მუზეუმი ევროპაში საუკეთესოა ხატებისა და მოზაიკების კოლექციით. ბენაკის მუზეუმი ცნობილია ძველბერძნული და ბიზანტიური ხელოვნების მდიდარი კოლექციით, ასევე ჩინური ფაიფურისა და აღმოსავლური სამკაულების ექსპოზიციებით. მის სიახლოვესაა სამხატვრო გალერეა, სადაც წარმოდგენილია მე-14 საუკუნიდან დღემდე ბერძენი მხატვრების ნამუშევრები.

მცურავი მუზეუმი „ავეროფი“-სამხედრო-საზღვაო მუზეუმი პალეო ფალიროში მდებარეობს. მუზეუმის შენობა განთავსებულია 1911 წელს აგებულ ჯავშოსან კრეისერ „გეორგიოს ავეროფზე“. ეს გემი მონაწილეობას იღებდა პირველ ბალკანურ, პირველ მსოფლიო და მეორე მსოფლიო ომებში.

თუ ათენიდან ახლობლებისთვის სუვენირების ჩამოტანას გეგმავთ მათი შეძენა  შეგიძლიათ  მონასტირაკის რაიონში მდებარე ბაზარში. აქვეა ძველი მეჩეთი და უწმინდესი ღვთისმშობლის ტაძარი.

„National Geographic Traveler“-მა ბათუმი ევროპაში საუკეთესო ტურისტული ქალაქების ათეულში შეიყვანა. პოლონურ გამოცემაში ბათუმი, როგორც უქმეების გასატარებლად საუკეთესო ადგილი ისეთი ქალაქების გვერდით სახელდება, როგორებიცა არიან: ნიცა, პალერმო, ამსტერდამი და ოქსფორდი. „მზესთან ახლოს“ ასე ჰქვია სტატიას, რომელიც გამოცემის მარტის ნომერში ბათუმსა და ზოგადად აჭარას მიეძღვნა.

"ჩვენ ვიცით ბედნიერების რეცეპტი” ამბობენ ქართველები. ეს შეიძლება გადამეტებულად მოგეჩვენოთ, თუმცა ბათუმში გატარებულმა მხოლოდ ერთმა უქმეებმაც კი დამარწმუნა ამ სიტყვების სიმართლეში,“- ასე იწყებს სტატიას ჟურნალისტი ბუაჟეი გრიგილი, რომელიც მკითხველს შავიზღვისპირეთში მოგზაურობის შთაბეჭდილებებს აცნობს.

სტატიაში ჟურნალისტი ბათუმში ვიზიტისას საუკეთესო ადგილებს ასახელებს, რომელთა შორისაა ბოტანიკური ბაღი, ბულვარი, ევროპის მოედანი და სხვა ტურისტული ღირსშესანიშნაობები. ის ასევე, ხაზს უსვამს მთიან აჭარასა და ადგილობრივ სამზარეულოს, სადაც ულამაზეს ბუნებაში ტურისტებს უგემრიელესი კერძების დაგემოვნება შეუძლიათ. „National Geographic Traveler"-ის ჟურნალისტი რეგიონში აჭარის ტურიზმის დეპარტამენტის მოწვევით იმყოფებოდა.

„ჩვენ აქტიურად ვმუშაობთ, რომ საქართველოსა და ჩვენი რეგიონის შესახებ სტატიები, რეპორტაჟები და გადაცემები სამიზნე ქვეყნების პოპულარულ მედია საშუალებებში გამოქვეყნდეს. ჩვენი მოწვევით გასულ წელს რეგიონს 500-მდე ჟურნალისტი, ბლოგერი და ტურისტული სააგენტოს წარმომადგენელი სტუმრობდა. შედეგად, კი მივიღეთ 150-ზე მეტი მედიაპროდუქტი რეიტინგულ ტელევიზიებში, ჟურნალებსა და ონლაინ გამოცემებში. მნიშვნელოვანია, რომ ჩვენი პოტენციური ტურისტები თავიანთ ქვეყნებშივე გაეცნონ აჭარას მსგავსი სტატიებით, საინტერესო რეპორტაჟებითა თუ გადაცემებით. ამ ყველაფერს კი ემატება ჩვენს სამიზნე ქვეყნებში აქტიური სარეკლამო კამპანიები შედეგად, კი ვღებულობთ აჭარის პოზიტიურ იმიჯსა და ტურისტების გაზრდილ ნაკადებს ჩვენს ქვეყანაში. აჭარის შესახებ არაერთი საინტერესო სტატია გამოქვეყნებულა, თუმცა ისეთი ქალაქების გვერდით ბათუმის დასახელება, როგორიცაა ნიცა, ამსტერდამი და პალერმოა ნამდვილად ორმაგად სასიხარულოა,“ განაცხადა აჭარის ტურიზმის დეპარტამენტის თავმჯდომარე სულხან ღლონტმა.

imedi

კრეტა  ულამაზესი და მზიანი კუნძულია ხმელთაშუა ზღვის აღმოსავლეთ ნაწილში,  საბერძნეთის ტერიტორიაზე. კუნძული მდებარეობს ევროპას, აფრიკასა და მცირე აზიას შორის.  მისი  ფართობი 8336 კმ²-ია. ის არის ევროპის ერთ-ერთი უკიდურესი სამხრეთი კუნძული და ამინდი აქ უნიკალურია - 300 მზიანი დღით.

კუნძულზე ზომიერი კლიმატია, ზაფხულის დღეები უნალექოა, შემოდგომით ტემპერატურა ხშირად უფრო მაღალია, ვიდრე გაზაფხულზე, ზამთარი რბილი კლიმატით ხასიათდება. იდეალური პერიოდი, სეირნობისთვის და ლაშქრობისთვის არის- აპრილი, მაისი ივნისი, ასევე სექტემბერი და ოქტომბერი. ზღვაში საბანაოდ იდეალური ამინდები იწყება აპრილიდან! რაც შეეხება ჰაერის ტემპერატურას-იანვრის საშუალო ტემპერატურა 12 °C, ივლისის კი-26 °C.   

რელიეფი მთაგორიანია. ჰავა ხმელთაშუა ზღვისაა. განვითარებულია მევენახეობა, მეციტრუსეობა, მესაქონლეობა; თევზჭერა, ზღვის ღრუბლის რეწვა. კუნძულის ისტორია მრავალათასწეულს ითვლის. აღსანიშნავია ისიც, რომ კრეტა ძველი წელთაღრიცხვის III-II ათასწლეულში ეგეოსის კულტურის მნიშვნელოვანი ცენტრი იყო.

ეს არის ადგილი, სადაც თავს მარტივად დააღწევთ დიდი ქალაქის მომაბეზრებელ და შემაწუხებელ ხმაურს. გაექცევით და დაემალებით ცხოვრების სწრაფ და დინამიკურ ტემპს, ამ ყველაფერს კი ფირუზისფერი ზღვა, ოქროსფერი მზის სხივები, თეთრი ქვიშები და მწვანე პალმები უზრუნველყოფენ. თქვენ გაგრილდებით რამდენიმე ზღვის კამკამა წყლებში და დაათვალიერებთ უნიკალურ ადგილებს. კუნძულს ესაზღვრება სამი ზღვა: იონიის, ლიბიისა და ეგეოსის.  

პოპულარულ საკურორტო კუნძულს ყოველწლიურად უამრავი დამსვენებელი სტუმრობს. ტურისტების სიმრავლე უფრო მეტად შეინიშნება კრეტის ჩრდილოეთით. ქალაქების და ნავსადგურების ჰერაკლიონის და ხანიას ახლოს მდებარეობს უდიდესი და ცნობილი კურორტები, მაგ. ხერსონისოსი, მალია, სტალისი. კუნძულის ლამაზი ქალაქები, ღირშესანიშნაობები და  თვალწარმტაცი სანაპიროები მილიონობით დამსვენებელს იზიდავს.

ბერძნული მითოლოგიის ყველაზე შთამბეჭდავი ეპიზოდები სწორედ ამ კუნძულთან არის დაკავშირებული. ათასობით ტურისტი ჩამოდის კრეტაზე, რომ საკუთარი თვალით იხილოს ევროპის ერთერთი პირველი ცივილიზაციის  მინოსის ნაშთები.

კრეტას ცნობილი კურორტებია- ხანია, რეთიმნო, ჰერაკლიონი, ლასიტი.

ხანია- რეგიონი მდებაეობს კუნძულის დასავლეთით, მისთვის დამახასიათებელია თეთრი მთები, ქვიშიანი სანაპიროები და ნაციონალური პარკი.

რეთიმნო- ორი მხრიდან, ჩრდილოეთიდან და სამხრეთიდან ესაზღვრება ხმელთაშუა ზღვა, აღმოსავლეთით ჰერაკლიონის ნომი, ხოლო დასავლეთით ხანიის ნომი. კლდიანი პეიზაჟები, ულამაზესი სანაპიროები, გამოქვაბულები და მონასტრები რეთიმნოს სავიზიტო ბარათია.

ჰერაკლიონი- მდებარეობს კუნძულ კრეტის ცენტრალურ ნაწილში. აღმოსავლეთით ესაზღვრება ლასითის ნომს, დასავლეთით რეთიმნოს ნომს. ეს კუნძულის უმსხვილესი და ყველაზე მჭიდროდ დასახლებული რეგიონია. სწორედ აქ აწარმოებენ კუნძულის ყველაზე მნიშვნელოვან გათხრებს. მისთვის დამახასიათებელია-ულამაზესი სანაპიროები, მისტიკური გამოქვაბულები, მომხიბვლელი სოფლები, კანიონები, ზეთის ხილის პლანტაციები და ვენახები.

ლასიტი- ოლქი ცნობილია კომფორტული და მაღალი დონის სასტუმროებით, კეთილმოწყობილი სანაპიროებით.

ჰერაკლიონის მუზეუმი

ღირსშესანიშნაობებიდან ყველაზე ცნობილია უნძულის დედაქალაქის, ჰერაკლიონის, არქეოლოგიური მუზეუმი, რომელიც  გვთავაზობს 3.400 წლის წინანდელ ხელოვნების და კულტურის საგანძურს. მსოფლიოს არცერთი სხვა მუზეუმი არ ფლობს ამ დროის ამდენ აღმოჩენას. ორ სართულზე მნახველი აღფრთოვანებით და გაოცებით გაეცნობა ისტორიულ საგანძურს,  გემების მოდელებს, სახლების ფასადებს, სამკაულებს, ბეჭდებს, რომლებიც გვაცნობენ 3.500 წლის წინანდელ ყოველდღიურობას. განსაკუთრებულ ყურადღებას იპყრობს ულამაზესი თიხის ნაკეთობები.

კნოსოსისსასახლე

კრეტაზე მშვენიერი სანახაობაა კნოსოსის სასახლე, რომელიც ითვლება მინოანის ეპოქის ცენტრად. ასწლეულების მანძილზე კნოსოსის სასახლეს ბორცვი ფარავდა. ძეგლს ყოველწლიურად 1,3 მილიონი ტურისტი სტუმრობს. რესტავრაციის დროს კვლავ ხეს გამოიყენებენ, რაც მას მეტად მიანიჭებს პირვანდელ ელფერს, ასევე გადაიხურება სხვადასხვა დარბაზები. ბეტონის კონსტრუქციები სხვა მასალით უნდა ჩანაცვლდეს, რადგან ისინი ზეწოლას ახდენენ ანტიკურ ნანგრევებზე და აზიანებენ მათ. კნოსოსის სასახლე მოიცავს 22.000 კვ.კმ. ფართობს. სასახლეში არის ზედა განათების დარბაზები, საფეხურები, სახელოსნოები, საკუჭნაოები.

არკადის მონასტერი

მონასტერი კრეტის უმნიშვნელოვანესი ეროვნული ძეგლია. ის დიდ როლს თამაშობდა დამოუკიდებლობისთვის ბრძოლაში ოსმანთა სამეფოს წინააღმდეგ. ეკლესია გამოსახული იყო 100 დრაჰმიან კუპიურაზე.გადმოცემის თანახმად, მონასტერი აიგო ბიზანტიის იმპერატორის არკადიუსის მიერ მე-5 საუკუნეში. მეცნიერები მას ამავე სახელის ბერს მიაწერენ. მონასტრის სახელწოდება დასტურდება მე-14 საუკუნის წარწერით. ორნავიანი, რენესანსის ელემენტების შემცველიბაზილიკა 1587 წელს აიგო ძველი ეკლესიის ადგილას. მე-17 საუკუნემდე მონასტერში ყვაოდა კულტურული და სულიერი ცხოვრება.

როგორც ვხედავთ, კრეტა საინტერესოა, როგორც მისი უნიკალური ისტორიის, არქეოლოგიის, მითოლოგიის და ძეგლების თვალსაზრისით, ასევე ულამაზესი და კეთილმოწყობილი სანაპიროებით, ფირუზისფერი ზღვით, თეთრი ქვიშებით და შთამბეჭდავი პეიზაჟებით. კუნძულზე ჩასულ დამსვენებელს  ორი ერთმანეთისგან სრულიან განსხვავებული სამყარო ელოდება. შენ შეგიძლია ერთდოულად ეზიარო ანტიკურ კულტურას, შეიმეცნო უძველესი ცივილიზაციის თავისებურებები და ამავე დროს გაერთო, ისიამოვნო და დაისვენო კომფორტულ სასტუმროებსა და ულამაზეს სანაპიროებზე.

„ჯორჯიან ეარვეისის“ რეისებს 11 ახალი მიმართულება ემატება. 25 მარტიდან "ჯორჯიან ეარვეისი" თბილისის საერთაშორისო აეროპორტიდან პირდაპირ რეისებს შესრულებს პარიზის, ბარსელონას, ბრიუსელის, ბოლონიას, ბერლინის, კიოლნის, ხარკოვის, სალონიკის, ბრატისლავას, ათენისა და ყაზანის მიმართულებებით. მგზავრების კომფორტის უზრუნველყოფის მიზნით პირდაპირი ფრენები მხოლოდ დღის საათებში შესრულდება.

გარდა ამისა, 2018 წელს განახლდება „ჯორჯიან ეარვეისის“ ავიაპარკი და მას შეემატება Embraer 190-ის და Boeing 737-800-ის ტიპის თვითმფრინავები. ამჟამად ავიაკომპანიის ავიაპარკი 8 საჰაერო ხომალდისგან შედგება.

ამ ეტაპზე ავიაკომპანია რეისებს ასრულებს 10 მიმართულებით : ლონდონი, ვენა, ამსტერდამი, პრაღა, თელ-ავივი, მოსკოვი, სანქტ-პეტერბურგი, ერევანი, ხოლო 25 მარტიდან ავიაკომპანიის რეისების რაოდენობა 21-ამდე გაიზრდება.

2017 წელს საქართველოს დაცული ტერიტორიებიდან ყველაზე მეტი უცხოელი პრომეთეს მღვიმეს ესტუმრა - 101 290 სტუმარი, რაც 2016 წელთან შედარებით, 25 000 ვიზიტორით მეტია. ამასთან, პრომეთეს მღვიმეს უცხოელი ვიზიტორები უფრო ხშირად სტუმრობენ, ვიდრე ქართველები, რომელთა რაოდენობაც 2017 წელს 62 651 იყო. ინფორმაციას Forbes-ის ქართული გამოცემა ავრცელებს.

უცხოელებში პოპულარობით მეორე ადგილს მარტვილის კანიონი იკავებს, ერთ წელში 78 224 უცხოელი ტურისტი ეწვია. 

მესამე პოზიციაზე ყაზბეგის ეროვნული პარკია, რომელსაც გასულ წელს 70 407 უცხოელი ტურისტი ეწვია. მას მოსდევს სათაფლია 31 954 უცხოელი ვიზიტორით და ოკაცეს კანიონი 31 774 ვიზიტორით. 31 579 უცხოელი სტუმრობდა მტირალას ეროვნულ პარკს, რაც ქართველ ვიზიტორებს თითქმის ორჯერ აღემატება. 21 170 უცხოელი ეწვია გასულ წელს ბორჯომ-ხარაგაულის ეროვნულ პარკს. ჯამში დაცული ტერიტორიები ერთ წელში 412 763-მა უცხოელმა მოინახულა. 

ყველა ადამიანს აქვს ერთი ან რამდენიმე საოცნებო ადგილი, რომელშიც იმოგზაურებდა, დაისვენებდა, იხეტიალებდა. რომელსაც შეისწავლიდა, დაათვალიერებდა, შეიმეცნებდა, სადაც დახატავდა, დაწერდა, რაიმეს შექმნიდა. ველოდებით იმ საოცნებო, სასურველ და გრძელვადიან მოგზაურობას, რომელიც გარკვეულ თანხებთანაა დაკავშირებული, არა და გაზაფხული დადგა, მალე ზაფხულიც მოვა, ჩვენ კი დასვენება და განტვირთვა ძალიან გვჭირდება. სანამ ჩვენს ოცნებებს ავისრულებდეთ და სასურველ გზას დავადგებოდეთ გთავაზობთ ევროპის, შედარებით დაბალბიუჯეტიან ზღვისპირა მიმართულებებს, სადაც დაისვენებთ, განიტვირთებით და თვალსაწიერს გაიფართოვებთ:

კვიპროსი(ლიმასოლი, ლარნაკა, აია ნაპა)-კუნძულოვანი სახელმწიფო ხმელთაშუა ზღვის აღმოსავლეთ ნაწილში. კვიპროსი როგორც მოსახლეობის რაოდენობით ასევე ფართობის სიდიდითაც ხმელთაშუა ზღვაში მესამეა,  ის მხოლოდ იტალიის კუნძულებს — სიცილიასა და სარდინიას ჩამორჩება. გეოგრაფიულად ეკუთვნის აზიას, თუმცა კულტურულ-პოლიტიკური თვალსაზრისით ევროპის ნაწილია. ის მდებარეობს თურქეთის სამხრეთით, სირიისა და ლიბანის დასავლეთით, ისრაელის ჩრდილო–დასავლეთით, ეგვიპტის ჩრდილოეთით და საბერძნეთის აღმოსავლეთით.

ტურიზმს კვიპროსის ეკონომიკაში დომინანტი როლი უჭირავს. კვიპროსში, ერთ-ერთ პოპულარულ ტურისტულ ქვეყანაში ყოველწლიურად 2 მილიონი ადამიანი ჩადის. ტურისტული ინფრასტრუქტურის თვალსაზრისით, კვიპროსი მსოფლიოში პირველ  ადგილზეა.

ტურისტული თვალსაზრისით კვიპროსი მიმზიდველი კუნძულია მისი ზღვისპირა მდებარეობიდან, მისაღები ფასებიდან და უძველესი კულტურიდან გამომდინარე. კვიპროსზე უძველესი ნამოსახლარები თარიღდება ჩვენს წელთაღრიცხვამდე X ათასწლეულით. იმ პერიოდის არქეოლოგიური ძაგლებში გვხვდება კარგად შემონახული ნეოლითის ხანის სოფელი ხიროკიტია.

რაც შეეხება ბუნებას და ლანდშაფტს-ნაპირები უმთავრესად დაბალია, ნაკლებად შეჭრილ-შემოჭრილი, ჩრდილოეთით ციცაბო, კლდოვანი. ჭარბობს მთიანი რელიეფი.

კვიპროსის ყველაზე პოპულარული მიმართულებებია ლიმასოლი,ლარნაკა და აია ნაპა.

ლიმასოლი -ცნობლია თავისი ყოველწლიური კარნავალით, რომელიც უამრავ ტურისტს იზიადავს მსოფლიოს ნებისმიერი წერტილიდან. 11 დღის განმავლობაში იმართება სხვადასხვა გასართობი ღონისძიება, კონცერტი და მსვლელობა.

ლიმასოლის დაახლოებით 5-დღიანი ტურის ფასები, ჩვენი კურსით, საშუალოდ 300 დან 600-ლარამდე მერყეობს, გააჩნია პერიოდს, სასტუმროს და დამატებით ხარჯებს.

ლარნაკა- კვიპროსის სამხრეთ-აღმოსავლეთ სანაპიროსთან მდებარეობს, ის  მდიდარია უძველესი კულტურით და, ამასთანავე,  ერთ-ერთი თანამედროვე ევროპული ქალაქია. განსაცვიფრებელი ლანდშაფტით, ფირუზისფერი ზღვით, კეთილმოწყობილი სანაპიროებით, პალმების ხეივნით, ბულვარით, ღია კაფეებით და დაუვიწყარი ღამეებით.

ლარნაკას ფასებიც, დაახლოებით 300 დან 600 ლარამდე მერყეობს.

აია ნაპა- მდებარეობს კუნძულის სამხრეთ-აღმოსავლეთ ნაწილში. სახელწოდება მომდინარეობს ვენეციური მონასტრისაგან, რომელიც მდებარეობს ქალაქის ცენტრში და სიტყვასიტყვით ითარგმნება, როგორც „წმინდა ტყე“. ულამაზესი ფირუზისფერი ზღვა, კეთილმოწყობილი სანაპირო, თეთრი ქვიშები, ბევრი გართობა და თვალწარმტაცი ხედები, ეს აია ნაპას იმ მცირე უპირატესობების ჩამონათვალია, რომლებიც უამრავ ტურისტს იზიდავს. კუნძულს, ძირითადად ახალგაზრდები სტუმრობენ.

აია ნაპას ფასები, საშუალოდ, 500 დან 700 ლარამდე მერყეობს, დამოკიდებულია მოგზაურობის ხანგრძლივობაზე, პერიოდზე, სასტუმროსა და სხვა დამატებით ხარჯებზე.

შიდა ქართლის რეგიონში, ტურისტულ ზონებში, მათ შორის ბატეთის ტბაზე პირველადი მოხმარებისთვის აუცილებელი ინფრასტრუქტურა მოეწყობა. 
ამის შესახებ შიდა ქართლის სახელმწიფო რწმუნებულ-გუბერნატორმა კახა სამხარაძემ განაცხადა.

მისი თქმით, ბატეთის ტბასთან 3-4 კილომეტრიანი გზის რეაბილიტაცია განხორციელდება.

„ძამას ხეობაში საავტომობილო გზის რეაბილიტაცია მიმდინარეობს. მცირე მონაკვეთი რჩება დასასრულებელი და უახლოეს პერიოდში მთლიანი ინფრასტრუქტურა იქნება განვითარებული. ეს რა თქმა უნდა, ტურისტული მიმართულების განვითარებას ხელს შეუწყობს. ბატეთის ტბასთან მისასვლელი 3-4 კილომეტრიანი გზა რჩება, რომელსაც რეაბილიტაცია აუცილებლად ჩაუტარდება. ტურისტების დიდი ნაკადი გვყავს სეზონზე და ამიტომაც პირველადი მოხმარებისსთვის აუცილებელი ინფრასტრუქტურა მოეწყობა“, - აცხადებს სამხარაძე.

მისივე ინფორმაციით, მთელს რეგიონში ტურისტულ ზონებში შესაბამისი ბილიკები მოეწყობა.

„ტენდერის სახით გამოვავლინეთ კომპანია, რომელმაც ტურისტული მარშუტები უკვე დაადგინა და შესაბამის სამუშაოებს დაიწყებს. მიმდინარე სეზონისთვის ტურტისტული ბილიკები მოეწყობა. ასევე, ტურისტების მოზიდვის მიზნით, მაისის ბოლოს სამდღიან ტურს მოვაწყობთ. რეგიონში უფრო მეტი ტურისტის მოზიდვაა საჭირო, ამისთვის რესურსი და ღირშესანიშნავი ადგილები ბევრი გვაქვს“, - აღნიშნავს გუბერნატორი. 

კახა სამხარაძის თქმით, ტურისტული მიმართულებით მნიშვნელოვანია სასტუმროების მშენებლობის საკითხიც: „ამ ეტაპზე ქვიშხეთში სასტუმროს მშენებლობა მიმდინარეობს. მასში მინიმუმ 27 ნომერი განთავსდება. შედარებით დაბალი კლასის და ხელმისაწვდომი იქნება. გარდა ამისა, სასტუმროები შენდება სურამსა და ხაშურში, მათ შორის სურამის ტყე-პარკის ტერიტორიაზე ადგილობრივი ინვესტორი სასტუმროს აშენებს.“

ამასთან, გუბერნატორის ინფორმაციით, შიდა ქართლში 2018 წელს ჯამში 33 მილიონი ლარის მოცულობის პროექტი განხორციელდება. 

„2018-2021 წლების სამოქმედო გეგმა გაწერილი გვაქვს. რეგიონში სავალი გზებისა და სასმელის წყლის პრობლემა სრულად უნდა აღმოიფხვრას. ჩვენი მიზანია, რომ 2021 წელს განვითარების სხვა ეტაპზე გადავიდეთ. ამ მიზნით მიმდინარე წელს ჩვენს რეგიონში 102 პროექტი განხორციელდება, რომლის საერთო მოცულობა 33 მილიონი ლარი იქნება. ასევე, მნიშვნელოვანია გაზიფიცირების საკითხიც, 310 სოფლიდან 228-ს ბუნებრივი აირი უკვე მიეწოდება. დარჩენილ 82 დასახლებულ პუნქტს უახლოეს წლებში ბუნებრივი აირი ექნებათ. კასპში, თეძამის წყალსაცავის მასშტაბური პროექტი გვაქვს დაწყებული, რომლის ღირებულებაც 60 მილიონი ლარია და 7000 ჰექტარამდე გასარწყავიანების პრობლემას მნიშვნელოვნად მოაგვარებს“, - აცხადებს კახა სამხარაძე.

ამასთან, მისივე თქმით, გორში თაფლის გადამამუშავებელი საწარმოს მშენებლობა მიმდინარეობს, რომლის ღირებულებაც 2 მილიონნახევრამდე ლარი იქნება. ამასთან, 75 მილიონი დოლარის ინვესტიციის განხორციელება იგეგმება შიდა ქართლში, სადაც 50 მეგავატი სიმძლავრის ქარის ახალი ელექტროსადგურები აშენდება. კახა სამხარაძის თქმით, მიმდინარეობს წინასწარი მოლაპარაკებები კომპანიასთან, რომელიც დაინტერესებულია, რომ რეგიონში მზის პანელებით ელექტროენერგიის გამომუშავება დაიწყოს.

bpn.ge

მფრინავი ბორანი, მიწისქვეშა ტრამვაი და ქუჩის ესკალატორი - ყველაზე უჩვეულო სატრანსპორტო საშუალებებია, რომლებსაც მსოფლიოს გარშემო მოგზაურობისას სხვადასხვა ქვეყანაში შეხვდებით.

მსოფლიოს 10 უჩვეულო ტრანსპორტი:

მიწისქვეშა ტრამვაი 

მიმართულება: ვოლგოგრადის ტრაქტორის ქარხნიდან ქალაქის ცენტრამდე, რუსეთი
დრო: 40-50 წუთი
ფასი: 25 რუბლი
ჰიბრიდული ტიპის ტრანსპორტი - ტრამვაი ვოლგოგრადის ქუჩებში მიწის ქვეშ მოძრაობს, იგი 7-დან 17 კილომეტრამდე გზას გადის. აქ ყველაფერი ისეა, როგორც ნამდვილ მეტროში, თავისი გადასასვლელებით და ესკალატორებით. ყოველწლიურად მიწისქვეშა ტრამვაით თითქმის 50 მილიონი ადამიანი მგზავრობს.

ქუჩის ესკალატორი 

მდებარეობა: ქალაქის ცენტრი, ჰონკონგი
დრო: 25 წუთი
ფასი: უფასო
ჰონკონგში ავტომობილების რაოდენობის ზრდის შემდეგ მთელ მსოფლიოში ყველაზე გრძელი ესკალატორი გააკეთეს, რომელიც დღის სხვადასხვა მონაკვეთში სხვადასხვა მიმართულებით მოძრაობს. ტრანსპორტი 6-დან 10 საათამდე ქვევით მოძრაობს, ხოლო თორმეტის ნახევრიდან შუაღამემდე ზევით ადის. ესკალატორის საერთო სიგრძე 800 მეტრია. ყოველდღიურად ქუჩის ესკალატორს 60 ათასი ადამიანი გადაჰყავს, თუმცა ეს გზა არამარტო ადგილობრივებში, არამედ ტურისტებშიც პოპულარობით სარგებლობს. 

ავტობუსი ამფიბია 

ადგილი: მდინარე ელბა, ჰამბურგი, გერმანია
დრო - 80 წუთი
ფასი: 30 ევრო
მსოფლიოს 17 ქალაქში არსებობს ტურისტული წყლის ავტობუსები, რომლებიც მდინარეში მოძრაობენ. ჰამბურგში ასეთი რეისები რეგულარული გახდა. ამფიბია ავტობუსები არამარტო ტურისტებს, არამედ ადგილობრივებსაც ემსახურება. ავტობუსი წყალგამძლეა და წყალში 13 კილომეტრ სიჩქარით მოძრაობს.

ყველაზე მოკლე ფრენა 

მდებარეობა: ორკეს კუნძული, დიდი ბრიტანეთი
დრო - 2 წუთი
ფასი - 17 გირვანქა სტერლინგი
მსოფლიოში უმოკლესი ფრენაა, რომელიც 2 წუთი გრძელდება და კუნძულებს ერთმანეთთან აკავშირებს. მანძილი 2.8 კილომეტრია. მგზავრების გადაყვანას 8 თვითმფრინავი ახორციელებს და ძირითადად კუძულის ტურისტებს ემსახურება.

დაკიდული ბორანი 

მდებარეობა: პორტუგალიასა და ლას არენას შორის, ესპანეთი
დრო: 1.5 წუთი
ფასი: 0.3-1.2 ევრო
საჰაერო ბორანი, რომელიც ესპანეთსა და პორტუგალიას ერთმანეთს აკავშირებს მდინარე ნერვონზე გადადის. ის მე-19 საუკუნის ბოლოს აშენდა. იგი 8 წუთში ერთხელ დადის და 10-მდე ადამიანი გადაჰყავს. 

ყველაზე გრძელი გზა: ტრანს ციმბირის რკინიგზა 

მდებარეობა: მოსკოვი-ვლადივოსტოკი, რუსეთი
დრო: 6 დღე და 2 საათი
ფასი: იწყება 7500 რუბლიდან
ამ მარშუტზე ყველაზე სწრაფი მატარებელია. 6 დღის განმავლობაში მატარებლის ფანჯრიდან თქვენ შეგიძლიათ თითქმის მთელი ქვეყანა იხილოთ. მანძილი - 9288 კმ, გაივლის 87 ქალაქსა და 16 დიდ მდინარეს.

ყველაზე მკაცრი მარშრუტი: პლოტსბანი 

მდებარეობა: ალპები - მთა პილატუსი, შვეიცარია
დრო: 30 წუთი
ფასი: 68 შვეიცარიული ფრანკი
ეს რკინიგზა სიგრძით ვერ დაიკვეხნის, ის სულ რაღაც 4.6 კილომეტრია, მაგრამ მსოფლიოში ყველაზე რთული მარშრუტია. ის ყველაზე ესტრემალური ტრანსპორტის ტიტულსაც იმსახურებს, რადგან უფსკრულის ზღვარზე გადის. მატარებელი 9-12 კილომეტრ სიჩქარით მოძრაობს.

ყველაზე ექსტრემალური: საბაგირო გზა

მდებარეობა: თიანმენის მთა, ჩინეთი
დრო: 40 წუთი
ფასი: 258 იუნი
თიანმენის მთა ჟანჯიჯიის ეროვნულ პარკში მდებარეობს. საბაგიროს სიგრძე 7.5 კილომეტრია, რომელიც პირდაპირი მნიშვნელობით ღრუბლებში შედის. ვისაც ადრენალინი იზადავს, გზა მართლაც შთამბეჭდავია. 

ყველაზე გრძელი საბაგირო

მდებარეობა: ქალაქი მერიდა, ვენესუელა
დრო: ორი საათი
ფასი: 25 დოლარი
მსოფლიოში ყველაზე გრძელი და ყველაზე მაღალი საბაგირო გზის მანძილი 12.5 კილომეტრია და ზღვის დონიდან 5 ათას მეტრზე მდებარეობს. საბაგირო გასვლას ქალაქის ცეტნრიდან იწყებს, გზაში თქვენ შეგიძლიათ იხილოთ თოვლით დაფარული მწვერვალები, ტყეები, მდინარეები და ტბები. მოგზაურებს ბორნით მგზავრობას დილით ურჩევენ.

ყველაზე გრძელი ტროლეიბუსის მარშრუტი

მდებარეობა: აერპორტი სიმფეროპოლი - იალტა, ყირიმი
დრო: სამი საათი
ფასი: 20-138 რუბლი.
თითქმის 60 წელია მგზავრები ტროლეიბუსის ყველაზე გრძელი მარშუტით სარგებლობენ. აეროპორტიდან იალტამდე მანძილი 96 კილომეტრია. 
bpn.ge