საქართველო ევროპა-აზიის შემაერთებელ კავკასიის ყელზე მდებარეობს, ამიტომ აქ  ერთმანეთს ემიჯნება განსხვავებული ფლორისტული და ფაუნისტური არეალები. დასავლეთ საქართველოს ბარის ბუნებრივი პირობები მნიშვნელოვნად განსხვავდება აღმოსავლეთ საქართველოს ბარისაგან, კავკასიონის მთიანეთის ბუნება კი - საქართველოს სამხრეთ მთიანეთის ბუნებრივი პირობებისაგან. გეოტექტონიკური და კლიმატური სარტყელების გამო ჩვენი ქვეყანა მრავალფეროვან სანახაობას ჰპირდება მოგზაურობით და აღმოჩენებით დაინტერესებულ პირებს.

საქართველოში 856 ტბაა, რომლებიც ქვეყნის მთლიანი ფართობის 0.24%-ია (ანუ 167.28 კმ2). ისინი ერთმანეთისგან განსხვავდებიან, როგორც ვიზუალური თვალსაზრისით, ასევე დანიშნულებით და ლანდშაფტური მრავალფეროვნებით. ჩვენ ვისაუბრებთ საქართველოს რამდენიმე ტბაზე, რომლებიც დამთვალიერებელში დიდ მოწონებას და აღტაცებას იწვევენ:

აბუდელაურის ტბა-მყინვარული ტბა აღმოსავლეთ საქართველოში, მცხეთა-მთიანეთის მხარეში, დუშეთის მუნიციპალიტეტში, თუშეთ-ხევსურეთის კავკასიონის სამხრეთ კალთაზე, ჭიუხების ძირში, ზღვის დონიდან 2812 მეტრ სიმაღლეზე. ფართობი 0,035 კმ². მაქსიმალური სიღრმე 3,8 მ.  საზრდოობს თოვლის, მყინვარისა და წვიმის წყლით. გამდინარეა. მაქსიმალური დონე აქვს ზაფხულში, მინიმალური — ზამთარში. ხანგრძლივი დროის განმავლობაში (6 თვეზე მეტი) ყინულითაა დაფარული. ყინულისაგან თავისუფლდება მაისის ბოლოს, ტბაში თევზი არ არის. ცნობილია აბუდელაურის სამი ტბა-მწვანე, ლურჯი და ტბები. თუ შენ ერთხელ მაინც დაგთენებია თავზე ჭიუხებიდან ამოწვერილი დაგვიანებული მზის სხივებით გაჭრილი სუსხიანი დილა, თუ შენ ერთხელ მანც გიგრძვნია ტბებიდან წამოსული გამყინავი სურნელი მაშინ მიხვდები რომ აბუდელაურის ტბები ხევსურეთში განწესებული სამოთხეა, რომელიც ერთხელ მაინც უნდა ნახო სანამ ცოცხალი ხარ.

ტაბაწყური - ტბა სამცხე-ჯავახეთის მხარეში, ბორჯომისა და ახალქალაქის მუნიციპალიტეტების საზღვარზე, ზღვის დონიდან 1991 მ . ტბის ქვაბული წარმოქმნილია ლავური ნაკადების შეგუბების შედეგად. საზრდოობს მიწისქვეშა, თოვლისა და წვიმის წყლით. გამდინარეა მიწისქვეშა გზით. წყლის დონე დაბალია თებერვალში, მაღალია — ივნისში. გაყინულია დეკემბრის ბოლოდან მარტის ბოლომდე. წყალი მტკნარია, მდიდარია თევზით. ტბის გარშემო გაშენებულია სოფლები ტაბაწყური და მოლითი. გარშემორტყმულია ქცია-ტაბაწყურის აღკვეთილით. აქ არის სოფელი, რომელიც ტბაში შეჭრილ ნახევარკუნძულზე მდებარეობს. ლურჯი ტბა, ქარვისფერი მინდვრები  და  სიჩუმე, რომელსაც მხოლოდ ტალღების ხმა არღვევს.

ტობავარჩხილი -(ვერცხლის ტბა)  ტბა ეგრისის ქედის სამხრეთ კალთაზე, ჩხოროწყუს მუნიციპალიტეტში, ზღვის დონიდან 2650 მ სიმაღლეზე.  საზრდოობს თოვლის, წვიმისა და მიწისქვეშა წყლით. გამდინარე. წყლის დონე დაბალია — ზამთარში, მაღალია — ივლისში. წყალი მტკნარია. თევზი არ იცის. ტბისკენ მიმავალი გზა ძალიან შორია, მაგრამ ყველაზე დაღლილ მოგზაურსაც კი ავიწყდება ყველანაირი დისკომფორტი ამ მისტიკური და შთამბეჭდავი სანახაობის ხილვისას.

ფარავანი - ვულკანურ-ტექტონიკური ტიპის ტბა სამხრეთ საქართველოში, ნინოწმინდის მუნიციპალიტეტში. წარმოადგენს ზედაპირის ფართობით საქართველოს უდიდეს ტბას. გაწოლილია ჯავახეთის ვულკანური მთიანეთის ჩრდილო-აღმოსავლეთ ნაწილში, სამსარისა და ჯავახეთის ქედებს შორის მდებარე ქვაბულში, ზღვის დონიდან 2073 მ სიმაღლეზე. წყლის დონე ყველაზე დაბალია ოქტომბერ-ნოემბერში, ყველაზე მაღალი მაის-ივნისში. ტბა გაყინულია ზამთარში, ყინულის სისქე ირყევა 47-73 სმ შორის. საზრდოობს მიწისქვეშა, თოვლისა და წვიმის წყლით. ფარავნის ტბის ირგვლივ გაშენებულია სოფლები, ტბის ნაპირას არის ფოკის მამათა მონასტერი, მის სიახლოვეს კი  შაორის ციხე მდებარეობს.

პალიასტომი - გამდინარე ტბა ოდიშ-გურიის დაბლობზე, ქალაქ ფოთთან, სამეგრელო-ზემო სვანეთის მხარეში. ზედაპირის ფართობი 18,2 კმ², მაქსიმალური სიღრმე 3,2. მდებარეობს ზღვის დონიდან — 0.3 მ დაბლა. საზრდოობს წვიმის წყლითა და შენაკადებით. ტბას ერთვის მდინარე ფიჩორი, გამოედინება მდინარე კაპარჭინა. მაღალი დონე იცის გაზაფხულზე, ზაფხულსა და შემოდგომაზე, დაბალი — ზამთარში. წყალი თბილია ივლის-აგვისტოში (25,1°C), ცივია იანვარში (5,2 °C), ძლიერი ქარების გამო ტბაზე ხშირად ჰომოთერმიაა. აქ შეგიძლიათ ნავით გაისეირნოთ და დატკბეთ ტბის ულამაზესი მისადგომებით, ლერწამის ნაზარდებით, რომლებიც გაუვალ კედელს ქმნიან.

ბატეთის ტბა- მეწყრული წარმოშობის ტბა საქართველოში, ქარელის მუნიციპალიტეტში, თრიალეთის ქედის ჩრდილოეთ კალთაზე, ბატეთისწყლის ხეობაში. ზღვის დონიდან 1313 მ. უდიდესი სიღრმე 12 მ. მეწყერი რომელმაც ტბა წარმოშვა, სამხრეთიდანაა ჩამოწოლილი. ვრცელი ნაპირი არ გააჩნია. გარშემორტყმულია წიწვნარ-წიფლნარი ტყით შემოსილი ფერდობებით. წყალი გამჭვირვალეა და მტკნარი. ტბიდან გამოდის ნაკადული. ტბის სამხრეთ ნაპირი დაჭაობებულია. დეკემბრიდან მარტამდე ყინულითაა დაფარული. ტბაში ბინადრობს საქართველოს წითელ წიგნში შესული მცირეაზიური ტრიტონი. წითელი წიგნის მონაცემებით ტბაში კალმახიც გვხვდება.

ქორულდის ტბა-ტბა მდებარეობს ზღ.დ-დან 2850 მ-ზე. ამ ადგილიდან შესაძლებელია გადახედოთ ზემო სვანეთის სოფლებსა და ენგურის ხეობას, ასევე, კავკასიონის მყინვარებს, შხარა, თეთნულდი, უშბა, ლაილა და სხვა. წყალი ცივია, აქაურობის მთავარი ხიბლი შთამბეჭდავი  პანორამული ხედებია.

რიწის ტბა- ტბა, აფხაზეთში, საქართველოში, მდინარე ბზიფის აუზში, ზღვის დონიდან 884 მ, მაქსიმალური სიღრმე 101 მ. ქვაბული წარმოიქმნა გაგრის ქედის სამხრეთ-აღმოსავლეთ კალთიდან ჩამოქცეული კლდეზვავით, მდინარე ლაშიფსის დაგუბების შედეგად.უდიდესი დონე მაისშია, უმცირესი — თებერვალში. წყლის ტემპერატურა თებერვალში — 3,8°C, აგვისტოში — 17.8°C. რიწის წყალი მეტად მტკნარია. გაზაფხულზე მომწვანო ფერისაა, ზამთარში — მოცისფრო-მოლურჯო. თევზებიდან იცის მხოლოდ კალმახი. რიწა უღრმესი ტბაა ამიერკავკასიაში. ტბის გარშემო წიწვოვან ნაძვთა მრავალი ნაირსახეობა ხარობს.

მაშ ასე, ძვირფასო მოგზაურებო, გაზაფხული უკვე დადგა, ნელ-ნელა გამოთბება, თქვენ კი წინასწარ გაემზადეთ და განსაზღვრეთ მარშრუტი. უქმეები  მეგობრებთან ერთად დაგეგმეთ და აღმოაჩინეთ საქართველო.

გინესის მსოფლიო რეკორდების ოფიციალური ვებგვერდის ინფორმაციით, საქართველოში, თბილისიდან 50 კილომეტრის მოშორებით, შულავერის გორაზე არქეოლოგიური გათხრების შედეგად აღმოჩენილი უძველეს ქვევრში არსებული ღვინის კვალი ჩვენს წელთაღრიცხვამდე 6 000 წლით თარიღდება. შესაძლოა, ღვინის შემადგენლობა 8 000 წლისაც იყოს.

"არტ ნიუსის" ცნობით, აღმოჩენამდე გინესის მსოფლიო რეკორდების წიგნის მიხედვით, მსოფლიოში ყველაზე ძველ ღვინოდ ირანში ძვ.წ. 5400-5000 წლით დათარიღებული ნიმუში მოიაზრებოდა. ქართული კვალი კი მასზე 600-1000 წლით ძველია.

საქართველოს ღვინისა და ყურძნის შემსწავლელ კვლევაში საქართველოსთან ერთად რამდენიმე ქვეყანა, მათ შორის – საფრანგეთი, იტალია, ისრაელი, კანადა, დანია და ამერიკის შეერთებული შტატები მონაწილეობდნენ. აღმოჩენის ავტორი პენსილვანიის ანთროპოლოგიისა და არქეოლოგიის უნივერსიტეტის პროფესორი პატრიკ მაკგოვერნია. 

გასული წლის ნოემბერში მსოფლიო სამეცნიერო საზოგადოებამ აღიარა, რომ მეღვინეობის უძველესი კვალი სწორედ  საქართველოს ტერიტორიაზე აღმოაჩინეს, საიდანაც ის მთელ მსოფლიოში გავრცელდა და უდიდესი გავლენა იქონია სოფლის მეურნეობის, ხალხთა კულტურის, ბიოლოგიის, მედიცინისა და ზოგადად, ცივილიზაციის ჩამოყალიბებაზე. აშშ-ის მეცნიერებათა ეროვნული აკადემიის ერთ-ერთ ყველაზე მაღალრეიტინგულ სამეცნიერო ჟურნალში PNAS გამოქვეყნდა სტატია, სახელწოდებით „საქართველოს ადრეული ნეოლითური ღვინო სამხრეთ კავკასიიდან“. imedi

2018 წელს, აჭარაში მთის ტურისტული პროდუქტების განვითარების მიმართულებით მუშაობა გაგრძელდება. აჭარის ტურიზმის დეპარტამენტის ტურისტული პროდუქტების განვითარების სააგენტო მაღალმთიან აჭარაში ახალი ტურისტული მარშრუტების მარკირებასა და არსებულის განვითარებას გეგმავს. შედეგად, მაღალმთიან აჭარას სამი ახალი მარკირებული ტურისტული მარშრუტი შეემატება:

• ჩირუხი-ხიხანი-გოდერძის წრიული მარშრუტი
• გოდერძი-მწვანე ტბა- შავი ტბა- დანისპარაულის წრიული მარშრუტი
• ხულო- თაგო -სხალთის საფეხმავლო მარშრუტი

პროექტის ფარგლებში მარშრუტზე განთავსდება ტურისტული დაფები და მანიშნებლები, მარშრუტში მოინიშნება ზედ არსებული ყველა ტურისტული ობიექტი, მათ შორის საოჯახო-სასტუმრო სახლები, თავშესაფრები და კვების ობიექტები. ასევე, მომზადდება ინდივიდუალური ტურისტული რუკები, რომელთა ნახვაც მოგზაურებს ტურისტულ საინფორმაციო ცენტრებში შეეძლებათ. გასული წლის მსგავსად, სააგენტო უკვე არსებული და ახალი ტურისტული მარშრუტების პოპულარიზაციის მიზნით  გეგმავს ინფოტურებს ტურისტული სააგენტოების წარმომადგენლებისთვის და გიდებისთვის მაღალმთიან აჭარაში.

სოფლის ტურიზმის მიმართულებით საერთაშორისო მიდგომების გაცნობის მიზნით წელსაც გაიმართება სოფლის ტურიზმის საერთაშორისო კონფერენცია, რომელშიც ქართველებთან ერთად უცხოელი ექსპერტები მიიღებენ მონაწილეობას.

საფრანგეთში მოგზაურობა ყველას სხვადასხვა მიზეზით სურს-ზოგს პარიზის სიმბოლო- ეიფელის კოშკი აინტერესებს, ზოგს დიდებული ტრიუმფალური თაღი, რომელიც ჟოანის და რავიკის სიყვარულის ისტორიას გაუცოცხლებს, ზოგს შანზ-ელისეზე სეირნობა და ივ სენ ლორანის, კოკო შანელის, კრისტიან დიორის, პიერ კარდენის სამოდელო სახლების ნახვა უნდა, ზოგი შუაღამის პარიზზე და სენას ნაპირებზე ოგიუსტ რენუარის, პოლ სეზანის, დომენიკ ენგრის და კამილ პისაროს გაცნობაზე ოცნებობს, ზოგს პარიზული წვიმები და ედით პიაფის „La Vie En Rose“ შთააგონებს, ზოგს ფრანგული ღვინო და შოკოლადის კრუასანები უყვარს. ერთი სიტყვით საფრანგეთი მრავამხრივ საინტერესო და მიმზიდველი ქვეყანაა როგორც ხელოვნების, ასევე მოდის, კულინარიის, არქიტექტურის და მუსიკის თვალსაზრისით. ჩვენ ვისაუბრებთ იმ 3 მთავარ დეტალზე, რომელიც საფრანგეთში მოგზაურობისას უნდა გაითვალისწინოთ:

1.აუცილებლად მოინახულეთ ლეგენდარული ლუვრის მუზეუმი და გააცოცხლეთ ნამდვილი ხელოვნება- მუზეუმის ისტოროაიწყება 1200 წლიდან. თავიდან მას სამეფო სასახლის დანიშნულება არ ჰქონდა, გამოიყენებოდა მხოლოდ ძვირფასეულობებისა და არქივების შესანახად. XIV-საუკუნეში შარლ V, ბრძენად წოდებულმა ის ბიბლიოთეკად გადააკეთა. მოგვიანებით კი ეს ნაგებობა დაანგრიეს და მის ადგილას რენესანსის ეპოქის შესაფერისი სასახლე ააშენეს, რომელიც ლუვრს მიუერთეს. მრავალი წლის შემდეგ მოხდა მისი მუზეუმად ჩამოყალიბება და ის 1793 წლის 10 აგვისტოს პირველად გაიხსნა, როგორც მუზეუმი. ლუვრის გამდიდრება ყველაზე მეტად ნაპოლეონმა შესძლო. იგი დამარცხებულ ქვეყნებს საუკეთესო ხელოვნების ნიმუშებს ართმევდა ხარკად და საკუთარ სამშობლოში მოჰქონდა. დღეს ლუვრში დაახლოებით  40 000 ნიმუში ინახება. ძველი ლუვრი მოიცავს ძველესი აღმოსავლეთის, ეგვიპტის, საბერძნეთის, ეტრუსკებისა და რომის სამუზეუმო ექსპონატებს.ლუვრის მუზეუმში დაახლოებით 6000–მდე ნახატია.ისეთი ცნობილი ნახატები, როგორებიცაა: ლეონარდო დავინჩის „ჯოკონდას“ პორტრეტი, და რაფაელის „მშვენიერი მებაღე“.. მუზეუმის ყველაზე ცნობილი ქანდაკებებია – ვენერა მილოსელი, რომელიც 1820 წელს შემთხვევით აღმოაჩინეს ეგეოსის ზღვის კუნძულზე.

2. მულენ-რუჟი, ცხოვრება კაბარეს წესებით -დღეს პარიზული სიყვარულის ნამდვილ ისტორიაზე, ახდენილი და აუხდენელი ოცნებების, გატეხილი და გამთელებული გულების,  ვნებები და ტირილამდე მიყვანილი ემოციების ნავსაყუდელზე-მულენ რუჟზე გიამბობთ. ამბობენ, თუ მულენ რუჟი არ გინახავთ ჩათვალეთ რომ არც პარიზში ყოფილხართო. „მულენ რუჟი“ 1889 წლის 6 ოქტომბერს გაიხსნა. ეს სწორედ ის დღეა, როდესაც დასრულდა ეიფელის კოშკის მშენებლობა და მუშაობა დაიწყო საერთაშორისო გამოფენამ. ზუსტად ამ მოვლენებს დაუკავშირეს ჯოზეფ ოლერმა და შარლ ზიდლერმა ახალი კაბარეს გახსნა, რომელმაც პარიზის მე-18 მუნიციპალურ ოლქში, კლიშეს ბულვარზე, წითელი ფანრების კვარტალში დაიდო ბინა. მულენ რუჟი მხოლოდ კანკანი არ იყო, კაბარემ დიდი გადატრიალება მოახდინა, როგორც მუსიკის, ასევე თეატრის, სტილის და პარიზული ცხოვრების ისტორიაში. აქ თავს იყრიდნენ, როგორც ხელოვანები, მუსიკოსები, მაღალი წრის ქალბატონები, ასევე ლოთები, უსაქმურები, მსუბუქი ყოფაქცევის ქალები და მოხეტიალე მოგზაურები. ამ ბოჰემურ ადგილს ახსოვს პაბლო პიკასო და ოსკარ უაილდი. და თუ შენ, პარიზულ ტურნეს გეგმავ და ჭეშმარიტად მისეულ თავგადასავალს ეძებ მულენ რუჟს უნდა ესტუმრო და იხილო კანკანის თავბრუდამხვევი შოუ, რომელიც ძველებურ ეშხს არ კარგავს. შეხედე პიკასოს თვალებით პარიზს.

3.სალუტ!  ბურგუნდია- თუ თქვენ ღვინის დახვეწილი გემო და მისი წარმოების ტექნოლოგია გაინტერესებთ ბურგუნდიას უნდა ესტუმროთ-  ბურგუნდია - საფრანგეთის ყველაზე სახელგანთქმული და, ამასთან, საოცარი მეღვინეობის რეგიონია. აქ კულტივირდება ყურძნის ჯიშთაგან ერთ-ერთი ყველაზე ჭირვეული - პინო ნუარი და შედარებით სტაბილური შარდონე, რომლებიც, წარმატების შემთხვევაში, განუმეორებელ ღვინოს იძლევა. ლინდა ჯონსონ-ბელი და როზმარი ჯორჯი არკვევდნენ, რა განაპირობებს რეგიონის ასეთ გამორჩეულობას.  კოტ დ'ორი - ბურგუნდიის გული, მდინარის გაყოლებით 50 კილომეტრზე გადაჭიმული მთაგრეხილია. ადგილი, რომლის კლიმატისა და ნიადაგის სტრუქტურის შეხამება ორ ძირითად ადგილობრივ ჯიშს, პინო ნუარსა და შარდონეს საოცარ სრულყოფილებას ანიჭებს. აქ ძირითადად წითელ ღვინოებს აწარმოებენ, სქელსა და კონცენტრირებულს, ამავე დროს, საოცრად არომატულს და ხავერდოვანს.

ტბა ის ერთ-ერთი ბუნებრივი ღირსშესანიშნაობაა, რომელიც უამრავ ტურისტს იზიდავს, მისი სტატიკურო მდგომარეობა, ფერები,  გარშემო არსებული ლანდშაფტი წარუშლელ შთაბეჭდილებას ტოვებს  და  მნახველს მისტიკურ სიმშვიდეს ჰგვრის. დედამიწის ტბების საერთო ფართობი 2,7 მლნ. კმ²-ია. მსოფლიოში, დაახლოებით 117 მილიონ ტბას ითვლიან.

ჩვენ შემოგთავაზებთ მსოფლიოს ულამაზესი ტბების სიას, თავად გადაწვიტეთ რომელი მათგანის მონახულებას ისურვებდით:

ტიტიკაკა-ტიტიკაკას ტბა მდებარეობს სამხრეთ ამერიკაში, პერუსა და ბოლივიის საზღვარზე. იგი მსოფლიოში ყველაზე მაღლა მდებარე სანაოსნო ტბაა, რომელიც  ზღვის დონიდან 3 812 მეტრზე მდებარეობს. ამავე დროს, ტიტიკაკა სამხრეთ ამერიკის ყველაზე დიდი და ღრმა ტბაა (სიღრმე 281 მ, ფართობი 58.000 კმ2). მიუხედავად ასეთ სიმაღლეზე მდებარეობისა, ტბის წყალი არასოდეს იყინება და ტბა გამოიყენება სანაოსნოდ.ტბაში ჩაედინება 27 მდინარე და გამოედინება 20-მდე მცირე ნაკადული. ტიტიკაკა ასევე იმითაა გამორჩეული, რომ ტბაში მდებარეობს 41 კუნძული, რომელთაგან ზოგიერთი დასახლებულია. რაც ყველაზე მნიშვნელოვანია, კუნძულების გარკვეული ნაწილი ადამიანების ხელითაა შექმნილი.

ტასმანის ტბა- პროგლაციალური ტბა ახალ ზელანდიაში, სამხრეთ კუნძულზე. მდებარეობს ზღვის დონიდან 727 მ სიმაღლეზე. ფართობი 1,95 კმ². 2008 წლის მდგომარეობით ტბის სიგრძე 7 კმ, სიგანე 2 კმ, ხოლო სიღრმე 245 მ აღწევდა. წარმოიქმნა ტასმანის მყინვარის უკან დახევის შედეგად. 1970-იან წლებში ტასმანის მყინვართან არსებობდა რამდენიმე პატარა გამდნარი წყლის ტბორი, რომლებიც 1990 წლისათვის გაერთიანდა და შედეგად წარმოიქმნა ტბა. ერთვის მდინარე მარჩისონი. ტასმანის ტბა და მყინვარი მოქცეულია კუკის მთის ეროვნული პარკის ტერიტორიაზე. სახელი ეწოდა ჰოლანდიელი ზღვაოსნის აბელ ტასმანის პატივსაცემად.

ტბა კომო- მყინვარული წარმოშობის ტბა იტალიაში, ლომბარდიის რეგიონში. მისი ფართობი 146 კმ²-ია და წარმოადგენს იტალიის სიდიდით მესამე ტბას გარდასა და ლაგო-მაჯორეს შემდეგ. 400 მ სიღრმით, ის ევროპის ერთ-ერთი ყველაზე ღრმა ტბაა და მისი ფსკერი ზღვის დონიდან თითქმის 200 მეტრით დაბლა მდებარეობს.კლიმატი ტბის მიდამოებში როგორც წესი რბილია და ის ხმელთაშუაზღვიურის მსგავსია, სადაც ტროპიკული და სუბტროპიკული მცენარეები მთელი წლის განმავლობაში იზრდება. ტბის წყალობით, ზამთარში, მიმდებარე ტერიტორიებზე მაღალი ტემპერატურა ნარჩუნდება.

ლაგუნა-კოლორადა-  წითელი ტბა — თავთხელი, მინერალების მაღალი შემცველობის ტბა ბოლივიის მაღალმთიანეთში. მისი ფართობი 60 კმ²-ია. ტბა მოიცავს ბურას (მინერალი) კუნძულებს. მათი თეთრი ფერი ერწყმის ტბის წითელ წყალს, რომელიც განპირობებულია მინერალებითა და წყალმცენარეების პიგმენტაციით.

ბლედის ტბა-  ტბა სლოვენიაში. მდებარეობს იულიუსის ალპებში, ზღვის დონიდან 475 მ სიმაღლეზე, კურორტ ბლედის მახლობლად. ფართობი 1,45 კმ². მაქსიმალური სიღრმე 30 მ. გლაციალური და ტექტონიკური წარმოშობისაა. ტბის შუაგულში არის ამავე სახელწოდების პატარა კუნძული, სადაც გვხვდება რამდენიმე შენობა, მათ შორის ეკლესია. ტბის ფრიალო კლდეზე არის ბლედის ციხე-სიმაგრე. სხვადასხვა დროს ბლედის ტბაზე ჩატარდა დიდი საერთაშორისო შეჯიბრებები აკადემიურ ნიჩნოსნობაში. ტბაზე გაიმართა მსოფლიოსა (1966, 1979, 1989, 2011) და ევროპის (1956) ჩემპიონატები აკადემიურ ნიჩნოსნობაში.

მიჩიგანის ტბა-  ერთ-ერთი უდიდესი ტბა ჩრდილოეთ ამერიკაში. იგი მდებარეობს ამერიკის შეერთებულ შტატებში. მზის ჩასვლა ტბაში ერთ-ერთი საოცარი სანახაობაა, რომელიც ადამიანმა შეიძლება იხილოს. აღმოსავლეთიდან მას აკრავს აშშ-ის შტატები: უისკონსინი, ილინოისი, ინდიანა და მიჩიგანი. ტბის დასახელება მომდინარეობს ინდიელთა ტომების სიტყვა მიშიგამი-დან, რაც ნიშნავს დიდ წყალს. სიდიდით ტბა აღემატება ხორვატიის სახელმწიფოს.

ტბა მორეინი- მორეინი ყინულოვანი ტბაა კანადის ნაციონალურ პარკში, ბანფში. წყლის დონე მაქსიმუმს აღწევს ივნისის ბოლოს. ზუსტად ამ დროს ტბის ფერი გადადის მუქი ლურჯიდან ღია ცისფერში.

კარიბა-  წყალსაცავი აფრიკაში, მდინარე ზამბეზიზე (ზამბია, ზიმბაბვე). აივსო 1958-1963 წწ. მდებარეობს ზღვის დონიდან 485 მ სიმაღლეზე. ფართობი - 5580 კმ². გამოიყენება, ძირითადად ენერგეტიკული და საირიგაციო მიზნებისათვის. გარდა ამისა, წყალსაცავი გამოიყენება სათევზაოდ. თევზების თავმოყრის ადგილებია მხოლოდ სანაპირო რაიონები. ბინადრობს რამდენიმე ათეული სახეობის თევზი.კარიბა მსოფლიოს ერთ-ერთი უდიდესი ხელოვნური ტბაა. წყლის ტემპერატურა წლის განმავლობაში მერყეობს 17 °С-იდან 32 °С-მდე. წყლის გამჭვირვალობა იცვლება 1-იდან 12 მ-მდე.ნაპირები ძლიერ შეჭრილ-შემოჭრილია მრავალრიცხოვანი ყურეებით, უბეებითა და კუნძულებით. ტბას ხშირად დიდი რაოდენობით სტუმრობენ სპილოები. კარიბის წყალსაცავის სანაპიროებზე გაშენებულია სასტუმროები, ტურბაზები.

სანამ სამოგზაუროდ წასვლას გადაწყვეტთ და თქვენს საოცნებო ტურნეს დაგეგმავდეთ ნახეთ რომელ მიმართულებებს გვირჩევენ ცნობილი ამერიკული სამოგზაურო-შემეცნებითი კომპანია tripadvisors-ის გამოცდილი რედაქტორები.

ვატიკანი- კათოლიკური სამყაროს ცენტრი მსოფლიოს ყველაზე პატარა სახელმწიფოა. იგი მდებარეობს იტალიის დედაქალაქ რომში. მისი ფართობია 44ჰა. მოსახლეობა 1000ადამიანს აღწევს. სახელმწიფო ენებად გამოცხადებულია ლათინური და იტალიური. ქვეყანას მართავს რომის პაპი. სახელმწიფო ერთ სივრცეში უძველესი არქიტექტურის ძეგლებს აერთიანებს. ვატიკანი ერთ-ერთი პოპულარული მიმართულება, ის მიმზიდველია თავისი უნიკალურიხ ტაძრებით, ფრესკებით და ნაგებობებით. ვატიკანში სტუმრობისას აუცილებლად მოინახულეთ წმინდა პეტრეს მოედანი და სიქსტეს კაპელა.

ჩიკაგო-აგრეთვე ცნობილი როგორც „მეორე ქალაქი“ ან „ქარის ქალაქი“.  მოსახლეობით მესამე უდიდესი ქალაქი აშშ-ში ნიუ-იორკისა და ლოს-ანჟელესის შემდეგ. ჩიკაგო მდებარეობს შუა-დასავლეთის შტატ ილინოისში მიჩიგანის ტბის სამხრეთ-დასავლეთ სანაპიროს გასწვრივ. ქალაქი პოპულარული თავისი კრუიზითაა, დამთვალიერებლებს სულ რაღაც 15 წუთში შეუძლიათ მოინახულონ ჩიკაგოს არქიტექტურა და თავისებურებები. ქალაქში ტურისტების რიცხვი ყოველწლიურად მატულობს. ჩიკაგო იყო ადგილი, სადაც მსოფლიოში პირველი ცათამბჯენი აშენდა და დღეისთვის იგი შუადასავლეთის ფინანსური, სატრანსპორტო და კულტურული დედაქალაქია. ქალაქი ასევე ცნობილია მისი ეთნიკური მრავალფეროვნებით. ჩიკაგოს ცათამბჯენები, ადგილობრივი სამზარეულო, პოლიტიკური ტრადიციები და სპორტული გუნდები მისი ყველაზე ცნობილი სიმბოლოებია.

რომი- ყველა გზა რომში მიდის, იქ თქვენ დაგხვდებათ, როგორც ცნობილი კოლიზეუმი ასევე ტრევის ჩანჩქერი და უამრავი დახვეწილი ქუჩა, რომლებიც ღირსშესანიშნაობად შეგვიძლია მივიჩნიოთ. რომი ტურისტებისთვის ერთ-ერთი პოპულარული ქალაქია.რომი იტალიის  უდიდესი ქალაქია მოსახლეობა 3,7 მილიონს შეადგენს. ქალაქი მდებარეობს აპენინის ნახევარკუნძულის ცენტრალურ-დასავლეთ ნაწილში, მდინარე ტიბრის ნაპირებზე. 2017 წელს 48 300 000 ადამიანი ერთი ღამით  მაინც დარჩენილა ქალაქში.

ბარსელონა- ქალაქის მთავარ ღირსშესანიშნაობად საკათედრო ტაძარი საგრადა-ფამილია, იგივე წმინდა ოჯახი ითვლება. ანტონიო გაუდი ამ პროექტზე 40 წელი მუშაობდა. ნაგებობა ტურისტებს განსაკუთრებულ მაგიურ შთაბეჭდილებას და ემოციებს ანიჭებს. ქალაქის მოსახლეობა 5 401 000-ია, ხოლო ტურისტების რიცხვი 32 000 000-ს უტოლდება.

ლონდონი- ქალაქი მართლაც მისტიკურ და მაგიურ სანახაობას და ემოციებს ჰპირდება „ჰარი პოტერის“ მუზეუმში მისულ სტუმრებს, დამთვალიერებლებს რეალურ დროში შეუძლიათ ჯოან როულინგის ისტორიის მონაწილეები თავად გახდნენ.

პარიზი- ტურისტული თვალსაზრისით მსოფლიოში ერთ-ერთ მოწინავე პოზიციას სწორედ პარიზის სიმბოლო ეიფელის კოშკი იკავებს. ლითონის კონსტრუქცია მარსის ველზე, სენასთან, პარიზში. ეს პარიზის ყველაზე მაღალი სტრუქტურა და საფრანგეთის ყველაზე ცნობილი სიმბოლოა. სახელი დაერქვა პროექტის ავტორის ინჟინერ გიუსტავ ეიფელის პატივსაცემად და ის ქალაქის ყველაზე პოპულარული ტურისტული ღირსშესანიშნაობაა, რომელსაც წელიწადში 5,5 მილიონზე მეტი დამთვალიერებელი ჰყავს.

სამოგზაუროდ ყველა სხვადასხვა მიზეზით და სხვადასხვა დანიშნულებით მიდის-ზოგს ადგილის შეცვლა სჭირდება, ზოგს გარდერობის განახლება, ზოგს ზამთარში სითბო ენატრება, ზაფხულში კიდე სიცივე, ზოგს ქალაქის ქუჩებში სეირნობა მოსწონს, ზოგს მალდივების ფირუზისფერ ზღვაში ცურვა, ზოგი კი ახალ აღმოჩენების და შემეცნებითი შთაბეჭდილების მოლოდინშია. პირობითად ორ ნაწილად რომ გავყოთ ადამიანის ხელით შექმნილი ღირსშესანიშნაობები და ბუნებრივი საოცრებები, თქვენ რომელს აირჩევდით?

ჩანჩქერები ბუნების ერთ-ერთი ყველაზე საოცარი ქმნილებებია, მათმა სულისშემძვრელმა სილამაზემ შეიძლება ძალიან ღრმა შთაბეჭდილება დატოვოს დამთვალიერებელზე. ჩვენ შემოგთავაზებთ რამდენიმე მათგანს, რომლებიც დამთვალიერებლებში საოცარ აღტაცებას და მოწონებას იწვევენ:

ჩანჩქერი ვიქტორია- ეს ულამაზესი სანახაობა ზიმბაბვესა და ზამბიის საზღვარზე მდებარეობს.  ჩანჩქერის სიგანე 1,8 კმ-ია, სიმაღლე -128 მეტრი. აღმოაჩინა შოტლანდიელმა მოგზაურმა დეივიდ ლივინგსტონმა 1855 წელს და სახელი უწოდა დიდი ბრიტანეთის დედოფლის ვიქტორიას პატივსაცემად. შემდეგ ჩანჩქერი ცნობილი გახდა ადგილობრივი სახელითაც „მოზი-ოა-ტუნია“ („მგრგვინავი კვამლი“). ჩანჩქერი აფრიკის ერთ-ერთი მთავარი ღირსშესანიშნაობაა, 1989 წელს შეიტანეს იუნესკოს მსოფლიო მემკვიდრეობის ძეგლების სიაში.

ნიაგარას ჩანჩქერი- სამი ჩანჩქერისაგან შემდგარი წყალვარდნილთა სისტემა, მდებარეობს აშშ-სა და კანადის სახელმწიფო საზღვარზე. ჩანჩქერები მდებარეობენ ამერიკის შტატ ნიუ-იორკსა და კანადის პროვინცია ონტარიოს საზღვარზე. ნიაგარის სიახლოვეს მდებარეობს აშშ-ს ქალაქი ბუფალო. ჩრდილოეთ ამერიკის ყველაზე მაღალი ჩანჩქერის სიმაღლე შეადგენს 52 მეტრს. იგი უძველეს დროში წარმოიქმნა, მეცნიერები ვარაუდობენ რომ ჩანჩქერი ნიაგარა დედამიწის უკანასკნელ გამყინვარების დროს შეიქმნა. 1848 წლის 29 მარტს ამ ჩანჩქერზე ერთ-ერთი ყველაზე უცნაური მოვლენა მოხდა, ნიაგარის ჩანჩქერი გაჩერდა. ეს გამოიწვია ამ დღეს არსებულმა ძლიერმა ქარმა, რომელმაც ერის ტბაში მდებარე ყინული დაძრა. ყინული ტბიდან მდინარე ნიაგარაზე გადავიდა და უზარმაზარმა მასამ გადაკეტა მდინარე ქალაქ ბუფალოს სიახლოვეს, ეს მოვლენა დაახლოებით 30 საათს გაგრძელდა.

ჩანჩქერი ტუგელა-  აფრიკის უმაღლესი და მსოფლიოს ერთ-ერთი ყველაზე მაღალი წყალვარდნილი. სიმაღლე 948 მ.  ტუგელა მდებარეობს ამავე სახელწოდების მდინარის ზემო ნაწილში, სამხრეთ აფრიკის რესპუბლიკის კვაზულუ-ნატალის პროვინციაში. იგი განსაკუთრებით კარგად მოჩანს თავსხმა წვიმების შემდეგ. ჩანჩქერი შედგება 5 წყალვარდნილისაგან. წყალვარდნილის ზემოთ არსებული წყალი სისუფთავით გამოირჩევა, დასალევად ვარგისია. ჩამოკვეთილი ადგილები ზამთარში ხშირად თოვლით იფარება. ჩანჩქერთან არის ორი მისასვლელი ბილიკი.

ჩანჩქერი იგუაძუ- ჩანჩქერი იგუაძუ არგენტინისა და ბრაზილიის საზღვარზე მოსჩქეფს. სიმაღლით ის ძალიან დიდი არ არის, სულ რაღაც 87 მეტრი, თუმცა ძალზე შთამბეჭდავი სანახავია თავისი 2700 მეტრზე განფენილი ნალის ფორმის 257 კასკადით.

ჩანჩქერი ენჯელი-  ყველაზე მაღალი ჩანჩქერი მსოფლიოში. მდებარეობს სამხრეთ ამერიკაში, ვენესუელაში, ბოლივარის შტატში, იუნესკოს მსოფლიო მემკვიდრეობის სიაში მყოფი კანაიმის ეროვნული პარკის ტერიტორიაზე, გადმოედინება აუიანტეპუის მთიდან. მისი ვარდნის სიმაღლეა 979 მეტრი. ანხელი იკვებება მდინარე კერეპის წყლით, რომელიც ერწყმის მდინარე კარაოს შენაკადს, მდინარე ჩურუნს. თავის მხრივ, ეს ყველა მდინარე ორინოკოს აუზს მიკეუთვნება. ჩანჩქერი აღმოაჩინა ჯეიმზ ეინჯელიმ 1936 წელს, სწორედ ამიტომ ჩანჩქერი, ეინჯელის სახელს ატარებს.

ჩანჩქერი გულფოსი- გულფოსი ისლანდიის ჩრდილო-დასავლეთში მდებარე თვალწარმტაცი ჩანჩქერია. არც მაინც და მაინც მაღალი (ორი 11 და 21 მეტრი სიმაღლის აუზით) გულფოსი ძალიან ლამაზი სანახავია. მიწაში მდებარე ნაპრალების წყალობით, ისეთი შთაბეჭდილება იქმნება, თითქოს მდინარე ჰვიტა უფსკრულში უჩინარდება.

ჩანჩქერი საზერლენდი- საზერლენდის ჩანჩქერი ახალ ზელანდიაში, ფიოდლანდში მდებარეობს. მისი 580 მეტრიანი ვარდნის სიმაღლით მსოფლიოს ერთ-ერთი უმაღლესი ჩანჩქერია. საზერლენდს სამი კასკადი აქვს, რაც უნიკალურ ლანდშაფტს ქმნის. სახელწოდება ჩანჩქერს 1880 წელს მისი აღმომჩენის დონალდ საზერლენდის პატივსაცემად დაერქვა.

ჩანჩქერი ნოჰკალიკაი- ჩანჩქერი ნოჰკალიკაი ინდოეთში 335 მეტრი სიმაღლის ჩანჩერი ნოჰკალიკაი ინდოეთში მდებარეობს. მიუხედავად მისი საკვები დინების სიმოკლისა (სულ რაღაც 2 კმ), ჩანჩქერი ძალიან შთამბეჭდავია. წყალვარდნილის ბოლოს აუზი ფორმირდება, სადაც წყალი ხასხასა მწვანე შეფერილობას იღებს.

თებერვალში საერთაშორისო მოგზაურთა რაოდენობა 19.8%-ით, ტურისტების კი 27.1%-ით გაიზარდა. 
ტურიზმის ეროვნული ადმინისტრაციის ინფორმაციით, 2018 წლის თებერვალში საქართველოს 440 806 საერთაშორისო მოგზაური ეწვია, რაც 72 796-ით მეტია წინა წლის ანალოგიურ პერიოდთან შედარებით.  

უფრო კონკრეტულად, იანვარი-თებერვლის თვის მონაცემებით, საქართველოს 885,047 საერთაშორისო მოგზაური ეწვია, რაც 129,967-ით მეტია წინა წლის ანალოგიურ პერიოდთან შედარებით (ზრდა +17.2%)-ია.

იანვარი-თებერვლის თვის მაჩვენებლებით იმ უცხოელი მოგზაურების ანუ ტურისტების რიცხვმა, რომლებმაც 24 საათი და მეტი დაჰყვეს საქართველოში, 367,321 შეადგინა, რაც 73,320-ით მეტია 2017 წლის იანვარი-თებერვლის მაჩვენებელზე (ზრდა +24.9%).

რაც შეეხება კონკრეტულად თებერვალს, იმ უცხოელი მოგზაურების ანუ ტურისტების რიცხვმა, 
რომლებმაც 24 საათი და მეტი დაჰყვეს საქართველოში, 177845 შეადგინა, რაც 27,1%-ით მეტია წინა წლის ანალოგიურ პერიოდთან შედარებით. 

ამასთან, თებერვალში ყველაზე მეტი ვიზიტი აზერბაიჯანიდან, სომხეთიდან, თურქეთიდან,
რუსეთიდან და ირანიდან განხორციელდა. 

პოზიტიური ტენდენცია ნარჩუნდება ევროკავშირის ქვეყნებიდან, საიდანაც საქართველოში 
ჩამომსვლელების რაოდენობის ზრდის კუთხით, თებერვალში გამოირჩეოდნენ: გაერთიანებული 
სამეფო (+49%), ლიტვა (+36%), საფრანგეთი (+31%), გერმანია (+21%) და ა.შ.

იცით როგორ უნდა მოხვდეთ ცოცხალ მუზეუმში? გეზი ცენტრალური ევროპისკენ უნდა აიღოთ და უნგრეთის დედაქალაქ ბუდაპეშტს ესტუმროთ. უნიკალური არქიტექტურა, დავეწილი ხიდები, ფერადი სახლები, რელსებიანი ტრანსპორტი, ქვაფენილიანი ქუჩები, გუმბათოვანი ნაგებობები, ეს იმ მცირედი უპირატესობების ჩამონათვალია, რომლებიც ბუდაპეშტს ყველასთვის საოცნებო და საინტერესო ქალაქად წარმოაჩენს.

ბუდაპეშტი 1.8 მილიონიანი ქალაქია, რომელიც მდინარე დუნაის (დანუბე) სანაპიროზე მდებარეობს. ის  ქვეყნის მთავარი პოლიტიკური, ინდუსტრიული, კომერციული და სატრანსპორტო ცენტრია.

მოგზაურის თავლით დანახული ბუდაპეშტი ისე აღიქმება, როგორც მთლიანად ერთი დიდი ღირსშესანიშნაობა.  მართლაც შენობა-ნაგებობებისა და სხვა სანახაობების უმრავლესობა მსოფლიო მემკვიდრეობის სიაშია შეტანილი. UNESCO-ს დაცვის ქვეშ არის მდინარე დუნაის სანაპიროები, ბუდაპეშტის ტექნოლოგიური უნივერსიტეტი, გელერტის აბანოები, ბუდას სასახლის უბანი, თავისუფლების ქანდაკება, უნგრეთის პარლამენტი, გრეშამის სასახლე, ასი წლის მეტრო და სხვა უამრავი შენობა ანდრაშის გამზირზე.

ბუდაპეშტი, ისევე როგორც მთლიანად უნგრეთი, მდიდარია მინერალური და თერმალური წყლებით. აქ რამდენიმე ცნობილი აბანოა განთავსებული, რომელიც დღის განმავლობაში დამსვენებლებს ემსახურება, საღამოს კი ახალგაზრდების გართობისა და თავშეყრის ადგილად გადაიქცევა ხოლმე.

ბუდაპეშტი ევროპის ერთ-ერთი გამორჩეულად ლამაზი ქალაქია, ამიტომ ტურისტული თვალსაზრისით საკმაოდ მიმზიდველ და სანახაობრივ ადგილად ითვლება. დამსვენებლებში დიდი პოპულარობით სარგებლობს:

ბუდას ციხე-ქალაქი - ამ უბანში მდებარეობს სამეფო სასახლე, ეროვნული გალერეა, ეროვნული ბიბლიოთეკა, წმ. მატიაშის ტაძარი, მეთევზეთა ბასტიონი და ფუნიკულიორი. სამეფო სასახლის ფასადი მდინარის ნაპირის პარალელურია და სიგრძეში 300 მეტრს აღწევს. სასახლე ბაროკოს სტილშია აგებული. სასახლე მეორე მსოფლიო ომის დროს დაზიანდა და აღდგენის შემდეგ მასში ეროვნული გალერეა განთავსდა. გოთიკურ სტილში ნაგები მატიაშის ეკლესია და მასთან მდებარე მეთევზეთა ბასტიონი ყველაზე პოპულარულ ადგილს წარმოადგენს ტურისტთა ფოტოკამერებისთვის. ბასტიონს სახელი ამ ადგილას მცხოვრებ მეთევზეთა მიხედვით ეწოდა, რომლებიც თევზს მატიაშის ეკლესიის წინ არსებულ ბაზარში ყიდდნენ.

ანდრაშის პროსპექტი - ანდრაშის პროსპექტი ბუდაპეშტის ყველაზე მეტად განთქმული ქუჩაა. ის ერთმანეთთან აკავშირებს გმირთა მოედანსა (Hősök tere) და ერჟებეტის მოედანს. პროსპექტზე ნეორენესანსის სტილის მრავალი შენობაა, რომელთა ნათელი მაგალითი 1884 წელს აშენებული ოპერის თეატრია. თავად ამ ქუჩის მშენებლობაც ამავე წელს დასრულდა და სახელი ავსტრო-უნგრეთის იმპერიის პრემიერ-მინისტრის დიულა ანდრაშის პატივსაცემად ეწოდა. პროსპექტი იუნესკოს მსოფლიოს კულტურული მემკვიდრეობის სიაშია შეტანილი. ოპერის გარდა, ანდრაშის პროსპექტზე სხვა ღირსშესანიშნაობებია: ოქტოგონის მოედანი, ტერორის მუზეუმი, ფერენც ლისტის სახლ-მუზეუმი და მისი სახელობის მუსიკალური აკადემია.

ლანცჰიდი - იგივე ჯაჭვის ხიდი. ადგილი ბუდაპეშტში, საიდანაც შეიძლება დაიწყო ყველა მოსანახულებელი ობიექტის ათვლა. ხიდი პირველი პერმანენტული კონსტრუქცია იყო, რომელიც გადებულ იქნა მდინარე დუნაის სანაპიროზე. ინგლისელი დიზაინერის უილიამ ტერი კლარკის მიერ დაპროექტებული ხიდი დღესაც აოცებს მნახველებს. განსაკუთრებით შთამბეჭდავია ხიდის შესასვლელებთან დამონტაჟებული ლომის ქანდაკებები და, რა თქმა უნდა, მდინარე დუნაისა და ბუდას სასახლის ხედი. ტყუილად არ დავიწყე სანახაობების აღწერა ჯაჭვის ხიდიდან – ეს არის ბუდაპეშტის ერთგვარი ცენტრი, რომლის გარშემოც განთავსებულია მთავარი ღირშესანიშნაობები.

კოშუტის მოედანი და უნგრეთის პარლამენტი - კოშუტის მოედანი ქალაქის სიმბოლური ცენტრია და გარშემორტყმულია ადმინისტრაციული შენობებით, აგროკულტურის სამინისტროთი, ეთნოგრაფიული მუზეუმით და ქალაქის მთავარი სანახაობით – უნგრეთის პარლამენტით. ნეო-გოთიკური სტილის შენობა ბუდაპეშრტის ერთ-ერთი მთავარი ღირშესანიშნაობაა.  აშენების მომენტში შენობა მსოფლიოში ყველაზე დიდ საპარლამენტო ნაგებობას წარმოადგენდა. პარლამენტის გუმბათი შენობის ცენტრალური ნაწილია, რომლის გარშემოც განთავსებულია უნგრეთის 16 მეფის ქანდაკება. უნგრეთის სამეფო ძვირფასეულობა და 1000 წლიანი სამეფო გვირგვინიც ზუსტად ამ დარბაზში ინახება. შენობა სიგრძეში 268 მეტრია, მისი კორიდორები კი ჯამში 20 კილომეტრზეა გადაჭიმული.  გუმბათის სიმაღლე 96 მეტრს შეადგენს. აღსანიშნავია, რომ პარლამენტი ყველაზე მაღალი შენობაა მთელ ბუდაპეშტში.

ბუდაპეშტი კიდევ უამრავ საინტერესო ადგილს იტევს, რომელთა გასაცნობად მათი მონახულებაა საჭირო.

ტერაბანკი მომხმარებლებს ახალ, ქართული ბაზრისთვის სრულიად განსხვავებულ პროდუქტს - ტურისტულ იპოთეკას სთავაზობს. სესხი იმ ადამიანებისთვისაა განკუთვნილი, რომლებსაც დამატებითი შემოსავლის მისაღებად, დედაქალაქისა თუ რეგიონების ტურისტულად მიმზიდველ ადგილებში ბინის შეძენა, გარემონტება, კეთილმოწყობა და ტურისტებზე გაქირავება სურთ, თუმცა თანხა არ ჰყოფნით და დაფინანსების წყაროს ეძებენ. 

ახალი პროდუქტი საცალო სეგმენტზეა გათვლილი და გამარტივებული პირობით გაიცემა. თანხის გაცემისას ბანკი ბინის გაქირავებიდან მიღებულ პოტენციურ შემოსავალსაც ითვალისწინებს. მომხმარებელს კი შესაძლებლობა აქვს, დამატებითი შემოსავალი მიიღოს და აღებული სესხიც მისი მეშვეობით დაფაროს. ამასთან, ტერაბანკი პროდუქტით სარგებლობის მსურველებს ტურისტულად ნაკლებადაქტიურ სეზონებში საშეღავათო პერიოდსა და გადახდის ინდივიდუალურ გრაფიკს შესთავაზებს. 

ტერაბანკმა აღნიშნული პროდუქტის შეთავაზება საქართველოში ტურიზმის მზარდ განვითარებასა და იმ მოთხოვნებს დაუკავშირა, რომლებიც ბაზარზე ბოლო პერიოდში გაჩნდა. როგორც ტერაბანკში აცხადებენ, ახალი ტურისტული ადგილების ინტენსიური ათვისების ფონზე გამოიკვეთა, რომ ბინების შეძენა და მათი ტურისტებზე გაქირავება საკმაოდ გამართლებული ინვესტიციაა. „ტერაბანკი სწორედ ამ ტენდენციასა და ბაზარზე არსებულ რეალურ მოთხოვნას გამოეხმაურა. ვფიქრობთ, რომ ტურისტული იპოთეკის შეთავაზებით ადამიანებს არა მარტო დამატებითი შემოსავლის მიღებაში დავეხმარებით, არამედ საშუალებას მივცემთ, რომ ტერაბანკთან ერთად ქვეყნის ტურიზმის განვითარებაშიც მნიშვნელოვანი წვლილი შეიტანონ. გვაქვს მოლოდინი, რომ მათი დაინტერესება მაღალი იქნება“, - აღნიშნავენ ტერბანკში. 

მოცემული პროდუქტზე დამატებითი ინფორმაციის მიღება ნებისმიერ ფილიალშია შესაძლებელი. პირველ ეტაპზე სესხი თბილისის, გუდაურის, ბაკურიანისა და შავი ზღვის სანაპიროს ტურისტულად აქტიურ ადგილებში შესაძენ უძრავ ქონებაზე გაიცემა. სამომავლოდ კი ეს ჩამონათვალი კიდევ უფრო გაფართოვდება. 

სანამ  საოცნებო მოგზაურობას დაიწყებდეთ და გეზს სამხრეთ-დასავლეთი ევროპის ერთ-ერთი გამორჩეული, შთამბეჭდავი, უნიკალური და ეგზოტიკური ქვეყნისკე-ესპანეთისკენ აიღებდეთ ჩვენი რჩევები გაითვალისწინეთ და გაიგეთ, თუ რა უნდა გააკეთოთ ესპანეთში მოგზაურობისას, გარდა იმისა, რომ მოინახულებთ ესპანეთის მნიშვნელოვან და შთამბეჭდავ ქალაქებს-მადრიდი, ბარსელონა, კორდობა, გრანადა, მალაგა და სხვ.

1.დაივიწყეთ მითი ესპანეთში მოგზაურობის საუკეთესო სეზონთან დაკავშირებით. ესპანეთი წელიწადის ნებისმიერ დროს სასურველი, საინტერესო და შთამბეჭდავია. წარმოიდგინეთ ახალი წელი ესპანეთში-ილუმინაციებით მორთული ქუჩები, სახალხო ღონისძიებები, გრანდიოზული ფოიერვერკები. გაზაფხულზე ალუბლების ყვავილობაზე  რას იტყვით? ბარსელონას მთავარი საკათედრო ტაძრის „ საგრადა ფამილიას“ მიმდებარე ტერიტორია შთამბეჭდავი სანახავია. ეს პერიოდი კარგია ქუჩაში სეირნობისთვის და ტემპერამენტიანი ესპანელების  ცხოვრების წესის გაცნობისათვის. ზაფხულის თავბრუდამხვევი ღამეები,შადრევნებთან ცეკვა და ბარსელონას უნიკალური პლაჟები დაუვიწყარ და სასიამოვნო შთაბეჭდილებას გპირდებათ. შემოდგომით ესპანეთი უამრავ ფესტივალს მასპინძლობს ამიტომ მისი მონახულება ამ პერიოდში წარუშლელ შთაბეჭდილებას დაგიტოვებთ, შემოდგომით შანსი გეძლევათ ესტუმროთ რიოხას და მის  ტერიტორიაზე მდებარე  ვენახებს. მევენახეობისა და ღვინის ისტორიაც აქედან იწყება. დაესწარით რთველს ესპანურად და შეადარეთ ჩვენებურ პრინციპებს.

2.აუცილებლად მოინახულეთ ყველაზე რომანტიკული, შთამბეჭდავი და ეგზოტიკური კუნძული იბიცა. კუნძულზე ტურისტებით სავსე უამრავი იახტა უშვებს ღუზას. ხმელთაშუა ზღვის ღამეებით თრობაზე ბევრი ოცნებობს, იბიცა კი ერთ-ერთი გამორჩეული ადგილია, რომელიც თავბრუდამხვევ ღამეებს და სასიამოვნო დღეებს გპირდებათ.

3.დაესწარით კორიდის ფესტივალს- ხარების ბრძოლის ყველაზე გავრცელებული ფორმა. დამახასიათებელია ესპანეთისათვის. თავდაპირველად კორიდა იმართებოდა ქალაქის სწორკუთხა მოედნებზე, XVIII საუკუნეში კორიდის კანონების ჩამოყალიბების შემდეგ იგი იმართებოდა უკვე წრიულ მოედნებზე. ესპანეთის დედაქალაქში კორიდა ტრადიციული ფესტივალია. მადრიდში კორიდას ფესტივალის ჩატარების ტრადიცია მისი დედაქალაქად გამოცხადების დროიდან იღებს სათავეს. სხვა ღონისძიებების მსგავსად, თავდაპირველად კორიდა პლაზა მაიორზე იმართებოდა. დღეს კორიდა La Plaza de Toros de las Ventas-ზე იმართება, რომელიც ესპანეთში ყველაზე დიდ არენას წარმოადგენს. კორიდა ესპანური კულტურის ნაწილია და ესპანელებისთვის ნამდვილ ზეიმს წარმოადგენს.

4.თითქმის ყველას ოცნებაა ესპანეთის დედაქალაქში მდებარე სტადიონის „სანტიაგო ბერნაბეუს“ მონახულება და საყვარელი კლუბის მატჩზე დასწრებისას „HALA MADRID”-ის წარმოთქმა. სამეფო კლუბის გულშემატკივართათვის ბერნაბეუ მეორე იერუსალიმია. სტადიონი იტევს 81,254 მაყურებელს და არის სიდიდით მეორე საფეხბურთო არენა ესპანეთში. უეფას კლასიფიკაციით ხუთვარსკვლავიანი სტადიონია. მშენებლობა დასრულდა 1947 წელს, ხოლო სახელი ეწოდა რეალის პრეზიდენტის სანტიაგო ბერნაბეუს პატივსაცემად. იმავეს თქმა შემიძლია ბარსელონას გულშემატკივრებზე, მათთვის საკულტო ადგილს „კამპ ნოუს“ სტადიონი წარმოადგენს. სტადიონის ოფიციალური გახსნა შედგა 1957 წლის 24 სექტემბერს. „კამპ ნოუ“ ყველაზე ტევადი სტადიონია არამარტო ესპანეთში, არამედ მთელს ევროპაშიც. „კამპ ნოუ“ ერთ-ერთია იმ მცირე ევროპული სტადიონებიდან, რომლებსაც უეფა ხუთი ვარსკვლავით აფასებს.

5.ესპანეთის სავიზიტო ბარათი „ფლამენკო“-ტრადიციული ესპანური მუსიკისა და ცეკვის ჟანრი, რომელიც წარმოიშვა ანდალუსიაში. საბოლოოდ ჩამოყალიბებული სახე მან XVIII საუკუნეში მიიღო. ფლამენკო ესპანურ, ბოშურ და არაბულ ფოლკლორის ელემენტებს შეიცავს. მისთვის დამახასიათებელია ცეკვა და სიმღერა გიტარის თანხლებით. ცეკვას თან ახლავს შეძახილები, ტაში, თითების ტკაცუნი, მამაკაცები ცეკვას ასრულებენ ფეხების ძლიერი რიტმული მოძრაობით, ქალები ხელებისა და ტანის ცეცხლოვანი მოძრაობით. 2010 წლის 16 ნოემბერს, იუნესკომ ფლამენკოს კაცობრიობის მსოფლიო მემკვიდრეობის სტატუსი მიანიჭა. არ დაგავიწყდეთ, ესპანეთში მოგზაურობისას აუცილებლად იხილეთ ადგილობრივების მიერ შესრულებული ცეცხლოვანი ფლამენკო და დამერწმუნეთ, თქვენ აუცილებლად შეიცნობთ სიყვარულს ესპანურად.

საქართველოს სამთო-სათხილამურო კურორტების შესახებ მობილური აპლიკაცია შეიქმნა. 

აპლიკაცია, რომელიც ერთი ბრენდის ქვეშ 4 სამთო კურორტს: გუდაურს, ბაკურიანს, გოდერძის და მესტიას აერთიანებს, „მთის კურორტების განვითარების კომპანიის“ დაკვეთით ავსტიულმა კომპანიამ „INTERMAPS“ -მა შექმნა.

აპლიკაციის დახმარებით მომხმარებელი შეძლებს მიიღოს ინფორმაცია ზამთრის აქტივობების, აბონემენტის ფასებისა და კურორტზე არსებული სხვა სერვისების შესახებ.

ამასთან ის იძლევა საშუალებას რეალურ რეჟიმში მომხარებელმა ნახოს ამინდის პროგნოზი, ისარგებლოს ვებ-კამერებით, შეამოწმოს თოვლის სიმაღლე, ზვავის საშიშროების დონე, კურორტამდე მისასვლელი გზის მდგომარეობა, საბაგიროების სამუშაო საათები, და ა.შ.

აპლიკაციაში ასევე ინტეგრირებული რუკები, იძლევა დამატებით ინფორმაციას საბაგიროებისა და სასრიალო გზების რაოდენობისა, მდგომარეობისა და ტიპის შესახებ. 

აპლიკაციას აქვს ფუნქცია რის შემდეგადაც, დარეგისტრირებული მომხმარებელი შეძლებს საკუთარი სრიალის დღეების დაფიქსირებას და GPS მონაცემების შენახვას. 

ერთ-ერთი მთავარი ფუნქცია ასევე არის სამაშველო სამსახურის გამოძახება, რომელიც ღილაკის მარტივი დაჭერით ხორციელდება. 

აპლიკაციის პრეზენტაცია ხვალ გაიმართება.

გაზაფხული ბევრისთვის საყვარელი სეზონია, ის ასოცირდება სიახლეებთან, სითბოსთან, ახლის დაბადებასთან და ყვავილობასთან. ვისთვისაც გაყვავებული ხეხილის ბაღები და გაზაფხულის თავბრუდამხვევი სუნი მიწიერი სამოთხეა, აუცილებლად ალუბლების მთავარ სამოთხეს, იაპონიას უნდა ესტუმროთ.

იაპონიაში ტურისტული ვიზიტისთვის საუკეთესო პერიოდად ითვლება იაპონური ალუბლის საკურას ყვავილობის  სეზონი, იგივე ყვავილით ტკბობა, სადაც მარტიდან დაწყებული დამთავრებული აპრილის ბოლომდე ქვეყნის სხვადასხვა ტერიტორიაზე ყვავილობას იწყებს ალუბლის ხეები , ეს დღე იაპონიაში უკვე დღესასწაულამდე არის აყვანილი. საკურას ყვავილობა დაახლოებით 7  დღემდე გრძელდება  , ამ ხნის განმავლობაში იაპონელები მის ძირში ატარებენ მთელს დღეს , სვამენ საკეს და ტკბებიან ულამაზესი და სურნელოვანი ალუბლის ყვავილობით. საკურას ყვავილობის დღესასწაული იაპონელებისთვის ახალი ცხოვრების დაწყების , ახალი ენერგიის , უარყოფითი მუხტისგან გაცლის , და რაც მთავარია გაზაფხულის შემოსვლასთან ასოცირდება.

ვისთვის რა არის ბედნიერება, ვინ როგორი სახის თრობას ანიჭებს უპირატესობას, ჩემთვის კი ალუბლის მწიფე  ყვავილების სუნია თრობის საუკეთესო საშუალება.

საკურა ყველაზე პოპულარული ხეა იაპონიაში. ყოველ ნაბიჯზე: სკვერებსა თუ ბაღებში, საცხოვრებელ სახლებთან – ყველგან საკურას შეამჩნევთ. მისი ყვავილების შეფერილობა სხვადასხვაა, შეიძლება იცვლებოდეს მკვეთრი ვარდისფერიდან თეთრისაკენ. როგორც საკურას ნაყოფი (ანუ ალუბალი), ასევე მისი დამარილებული ფოთლები და ყვავილები გამოიყენება საკვებ პროდუქტებში.

საკურას ყვავილობის დღესასწაული მარტის ბოლოს აღინიშნება. ის  საზოგადოებრივი ორგანიზაცია «იაპონური საკურის საზოგადოების» მიერაა შემოღებული. სწორედ ამ პერიოდს ემთხვევა საკურას ყვავილობა, რომელიც სულ რაღაც 1-დან 2 კვირამდე გრძელდელბა. ამ დღესასწაულით ხანმოკლე სილმაზის მნიშვნელობასაც ექცევა ყურადღება. საკურას ფესტივალი ოფიციალურად II მსოფლიო ომის შემდეგ აღინიშნება, ხალხი კი 400 წელზე მეტია, ზეიმობს ამ ულამაზესი ხის ყვავილობას.

Georgian Airways წლის ბოლომდე მგზავრების რაოდენიბის გაორმაგებას გეგმავს, ეს განაპირობა 11 ახალი მიმართულების დამატებამ, რომლებიც მარტის ბოლოდან დაიწყება- პარიზი, ბერლინი, კიოლნი, ბრიუსელი, ბოლონია, ბარსელონა, ათენი, ბრატისლავა, სალონიკი, მინსკუ, ხარკოვი. რეისები ყველა მიმართულებით კვირაში ორჯერ შესრულდება, ბერლინში კი სამჯერ. რეისები დილის 8 საათიდან საღამოს 10 საათამდე დროის შუალედში შესრულდება.

ასევე ავიაკომპანია Flydubai საქართველოში რეისებს აორმაგებს, ახალ მიმართულებას ამატებს და ტურისტული აქტივობის გაზრდასაც გეგმავს. ზაფხულის სეზონიდან თბილისის აეროპორტიდან დღეში ოთხი რეისი შესრულდება. ქუთაისიდან კვირაში - ორი,  ბათუმიდან კი ფრენები ყოველდღიური ხასიათის იქნება.

,ფლაიდუბაის“ საავიაციო პარკი 62 თვითმფრინავისგან შედგება. კომპანია  საქართველოში ბოინგ 737 -ით დაფრინავს.

თუ თქვენ დახვეწილი არქიტექტურის,  ქვაფენილით მოკირწყლულ ქუჩებში სეირნობა მოგზონთ, თუ თქვენ მოჩუქურთმებული ხიდებიდან მდინარის დინების ყურება გსიამოვნებთ, თუ ველოსიპედით სეირნობა გიყვართ და ამისთვის თავისუფალ, კეთილმოწყობილ ქუჩებს ეძებთ, თუ თავბრუდამხვევი ღამის ცხოვრება და ქუჩებში ბოდიალი მოგწონთ მაშინ ამსტერდამს ესტუმრეთ და ფეხი აუყოლეთ ქალაქის ცხოვრების დინამიკურ და ცოცხალ რიტმს. ღამის ბურუსიდან გამოსული ქალაქი დილაობით ხელახლა ცოცხლდება და დამახასიათებელი ტემპით აგრძელებს ცხოვრებას. მდინარე ამსტელის სპეციფიკური სუნი გამთენიისას მეტად მძაფრდება და ქალაქის უნიკალურ ცხოვრებას უერთდება.

ყველაზე კოსმოპოლიტური ქალაქი ამსტერდამი ევროპის მნიშვნელოვანი კომერციული და ფინანსური ცენტრია, რომელიც საკუთარ თავში აერთიანებს კულტურულ-ისტორიულ მემკვიდრეობას და დინამიურად განვითარებად ინოვაციებს, მისი განუმეორებელი ატმოსფერო კი, მილიონობით ტურისტს იზიდავს მთელი მსოფლიოდან.

ამსტერდამი, რომელიც მე-13 საუკუნეში გაშენდა და სახელწოდება მდინარე ამსტელისგან მიიღო, ყოველწლიურად 4,5 მლნ. სტუმარს მასპინძლობს. ჰოლანდია კონტინენტის ერთ-ერთი ყველაზე მდიდარი ქვეყანაა, რომლის შემოსავლის ძირითად წყაროს ტურიზმი წარმოადგენს, რაც არცაა გასაკვირი, რადგან მხოლოდ ქვეყნის დედაქალაქს სტუმრობს წელიწადში 4 მლნ-ზე მეტი ტურისტი, რომელთაც პირველ რიგში ქალაქის კულტურა, არქიტექტურა და უნიკალური ატმოსფერო იზიდავთ.

ამსტერდამის დათვალიერება მუზეუმებით უნდა დაიწყო. ქალაქში 50-ზე მეტი მუზეუმია. Rijksmuseum - ნიდერლანდის ყველაზე დიდი ხელოვნების მუზეუმია, რომელიც რემბრანდტის, ვერმეერისა და სხვათა ტილოებითაა ცნობილი.

ამსტერდამის მთავარი ღირსება, ჩემი აზრით, ვან გოგის მუზეუმია.  იქ 500-ზე მეტი ნამუშევრის ნახვა შეიძლება. ნახატებთან ერთად  მუზეუმში მისი 850 წერილიც ინახება. 

ამსტერდამშია ასევე ანე ფრანკის სახლი, რომელიც ტურისტებისთვის საინტერესო ადგილს წარმოადგენს. ასევე მადამ ტიუსოს ცნობილი ცვილის ქანდაკებების მუზეუმი, რომელსაც უამრავი ტურისტი სტუმრობს.

ჰოლანდია ტიტების ქვეყანაა. სპეციალურად ჩატარებულ კვლევებს თუ დავუჯერებთ, ყოველწლიურად ამსტერდამის პარკებსა და ბაღებში 600 000-მდე ტიტა ირგვება. პირველი ტიტა ნიდერლანდებში მე-16 საუკუნეში შემოვიდა თურქეთიდან, ნამდვილი მანია კი, მაშინ დაიწყო, როცა მებაღე იოჰან ვან ჰუგელანდმა სხვადასხავა სახის და ფერის ტიტას გამოიყვანა. ცისარტყელას ყველა ფერის ტიტას ნახვა თავისუფლად შეიძლება ამსტერდამის ყვავილების ბაზრობაზე, სადაც ყოველთვის უამრავი ტურისტია.

ამსტერდამში 1 539 ხიდი და ვიადუკია, რომელთაგან თითოეულს თავისი ნომერი აქვს. 1600 წელს აგებული ლურჯი ხიდი – ისტორიული ხიდია, რომელიც რემბრანტის მოედანს აკავშირებს ვატერლოოს მოედანთან. სახელი ხიდმა ჰოლანდიის დროშის წყალობით მიიღო, რომლის ერთ-ერთი ფერი სწორედ ლურჯია.

ქალაქში მოგზაურობისას აუცილებლად ეწვიეთ ე.წ. Bruin café-ს, რომელიც ქალაქის სიმბოლოდ ითვლება. ”ყავისფერი ყავა” – სწორედ ასე ეძახიან კაფეებს იმ ნალექის გამო, რომელთაც კედლებსა და ჭერზე თამბაქოს ბოლო აჩენს, თავიდან ის ადგილი იყო, სადაც უფასოდ შეიძლებოდა თეთრი ჟენევერის დალევა. ჟენევერი – ტიპიური ამსტერდამული ალკოჰოლური სასმელია, რომელიც ძალიან ჰგავს ჯინს, თუმცა მისგან განსხვავებით საკმაოდ ძლიერი არომატი აქვს სხვადასხვა ბალახის, მათ შორის კორიანდრის დამატების წყალობით.

ტრამვაი, ლუდის ბარები, ნავები, ველოსიპედები, „კანაფის მაღაზიები“, ქუჩის მუსიკოსები-ეს ამსტერდამია მსოფლიოში ყველაზე ცოცხალი, პოზიტიური და ტოლერანტული ქალაქი.