საუდის არაბეთის სამეფოს დაბალბიუჯეტიანი ავიაკომპანია „Flynas", რომელიც საქართველოს საავიაციო ბაზარზე გასულ წელს შემოვიდა, რიადი-ბათუმი-რიადის მიმართულებით იწყებს ოპერირებას. 

რეგულარული რეისები 2019 წლის 2 ივნისიდან 31 აგვისტომდე, კვირაში 3 სიხშირით, ყოველ ოთხშაბათს, პარასკევსა და კვირას განხორციელდება. ფრენები Airbus A319 და A320 ტიპის საჰაერო ხომალდებით შესრულდება. 

საქართველოს ეკონომიკისა და მდგრადი განვითარების სამინისტროს სამოქალაქო ავიაციის სააგენტოს მიერ, „Flynas"-ს რიადი-ბათუმი-რიადის საჰაერო ხაზზე რეგულარული საჰაერო მიმოსვლის განხორციელების ნებართვა 2019 წლის 11 მარტს მიენიჭა. ახალი მიმართულების გარდა, საუდის არაბეთის დაბალბიუჯეტიანი ავიაკომპანია ზაფხულის სეზონზე, რეისებს დამამი-თბილისი-დამამი, ჯედა-თბილისი-ჯედა და რიადი-თბილისი-რიადის საჰაერო ხაზებზე შეასრულებს.

ეკონომიკისა და მდგრადი განვითარების სამინისტროს "საქართველოს აეროპორტების გაერთიანება" ქუთაისის საერთაშორისო აეროპორტიდან დატვირთვის მიხედვით, 2019 წლის თებერვლის მოთხოვნადი მიმართულებების ხუთეულს აქვეყნებს. 

რეიტინგის მოთხოვნად მიმართულებებს შორის კვლავ ვენა ლიდერობს. მეორე ადგილზე რომია, მესამე ადგილზე კი - პრაღა. 

"საქართველოს აეროპორტების გაერთიანების" მონაცემებით, ქუთაისის საერთაშორისო აეროპორტიდან 2019 წლის თებერვლის ყველაზე მოთხოვნადი მიმართულებების TOP-5 ასეთია: 

1.ვენა 
2. რომი 
3. პრაღა 
4. ათენი 
5. მემინგენი 

ქუთაისის საერთაშორისო აეროპორტი 2018 წლის ჯამში 617,342 მგზავრს მოემსახურა, რაც წინა წლის ანალოგიურ პერიოდთან შედარებით 52,5 % მეტია. 

ქუთაისის აეროპორტის მგზავრთნაკადის 95% ავიაკომპანია „ვიზეარმა“ გადაიყვანა (587,643 მგზავრი), რითაც საქართველოს ავიაბაზრის ლიდერი პირველად გახდა. 

მგზავრთნაკადის ზრდით, ევროპის აეროპორტებში ქუთაისი ლიდერობს. ევროპის აეროპორტთა საერთაშორისო საბჭოს – ACI EUROPE-ს მონაცემებით, 2018 წელს ქუთაისი 52.5%-ით მეტ მგზავრს მოემსახურა, რაც საუკეთესო მაჩვენებელია იმ აეროპორტებს შორის, რომელთა მგზავრთნაკადი 5 მილიონზე ნაკლებია. 

1 აგვისტოდან ქუთაისის დავით აღმაშენებლის საერთაშორისო აეროპორტში ოპერირებას Wizz air-ის მესამე ბაზირებული, AIRBUS A 320 ტიპის თანამედროვე საჰაერო ხომალდი დაიწყებს და რეგულარულ ფრენებს ბაზელის, კოპენჰაგენის, ბრიუსელის, ტალინის, ეინდჰოვენის და ბარის მიმართულებით შეასრულებს. 

ავიაკომპანია Myway Airlines რუსეთის მიმართულებით ფრენებს იწყებს. 

როგორც bm.ge-ის კომპანიის კომერციული დირექტორმა იგორ აფციაურმა განუცხადა, ფრენები 26 აპრილიდან კვირაში სამჯერ შესრულდება, თუმცა მიმდინარე წლის ივლისში სიხშირეების რაოდენობა გაიზრდება და ფრენები საქართველოდან ყოველ სამშაბათს, ოთხშაბათს, პარასკევსა და კვირას განხორციელდება.

“თებერვლის ბოლოს მივიღეთ ნებართვა. ერთი წელი ამას ველოდებით. 26 აპრილიდან დავიწყებთ ფრენებს, თბილისი-ჟუკოვსკი-თბილისის საჰაერო ხაზზე“, - აცხადებს აფციაური. 

მისივე თქმით, ფასები რუსეთის მიმართულებით 150 ევროდან დაიწყება, რაც შეეხება ევროპის მიმართულებას, კომპანია ნებართვებს მიმდინარე კვირის ბოლომდე ელოდება. 

შეგახსენებთ: ავიაკომპანია Myway Airlines ამ დროისთვის ფრენებს მხოლოდ თბილისი-თელ ავივი-თბილისის მიმართულებაზე ასრულებს.

თბილისისა და ბათუმის საერთაშორისო აეროპორტების მმართველი კომპანია "ტავ ჯორჯია" ავიაკომპანია Georgian Airways-ს ბრალდებებს პასუხობს და სპეციალურ განცხადებას ავრცელებს.

როგორც „ტავ ჯორჯიას“ განცხადებაშია, Georgian Airways-ს “ტავ ჯორჯიას” მიმართ გააჩნია დავალიანება, რაც დღევანდელი მონაცემებით 9 მილიონ ლარს აღემატება. ოპერატორი კომპანიის მიერ შეთავაზებული გადახდის გრაფიკის დაწესების მიუხედავად, ავიაკომპანია უარს ამბობს ფინანსური ვალდებულებების შესრულებაზე.

ამასთან, „ტავის“ იმ შემთხვევაში თუ ავიაკომპანია Georgian Airways ნაკისრ ფინანსურ ვალდებულებას არ შეასრულებს, „ტავ ჯორჯია“ იძულებული გახდება შეუზღუდოს ავიაკომპანიას აეროპორტის სერვისების და ინფრასტრუქტურის გამოყენების შესაძლებლობა.

„ტავ ჯორჯიას“ მიერ, Georgian Airways-ისთვის გაგზავნილი წინასწარი შეტყობინებებისა და არაერთი გაფრთხილების მიუხედავად ავიაკომპანია უარს ამბობს დაიცვას თავისი მგზავრების ინტერესები და შეასრულოს ნაკისრი ფინანსური ვალდებულებები. აქვე უნდა აღინიშნოს, რომ ტავ ჯორჯიასა და Georgian Airways-ს შორის არსებული ურთიერთთანამშრომლობა უკვე 14 წელს ითვლის. ამ წლების განმავლობაში ავიაკომპანია სარგებლობდა ყველა იმ პრივილეგიით და შეღავათებით, რასაც აეროპორტების ოპერატორი კომპანია საქართველოში ბაზირებული, ეროვნული გადამზიდავი კომპანიის ხელშეწყობისთვის ახორციელებდა. კერძოდ:

1. Georgian Airways - აქვს ექსკლუზიური უფლება თავად გაუწიოს სახმელეთო მომსახურება საკუთარ საჰაერო ხომალდებსა და მგზავრებს, რაც საგრძნობლად ამცირებს მათ საწარმოო ხარჯებს;

2. Georgian Airways - 2005 წლიდან სარგებლობს 50%დან - 80%-მდე ფასდაკლებით ტავ ჯორჯიას მიერ გაწეულ ყველა იმ მოთხოვნად სერვისზე, რაც აუცილებელია რეისის შესასრულებლად (ბოლო სამი თვეა ავიაკომპანია მხარეებს შორის შეთანხმებული პირობების მიხედვით მხოლოდ მისთვის გაწეული მომსახურების ღირებულის 50% იხდის);

3. 2015 წლიდან Georgian Airways სარგებლობს ტავ ჯორჯიას მიერ ექსკლუზიურად მისთვის შედგენილი გადახდის სპეციალური გრაფიკით, რაც ზამთრის სანავიგაციო პერიოდში გაწეული მომსახურების ღირებულების 50%-ის გადახდას ზაფხულის განმავლობაში გულისხმობს;

4. Georgian Airways – ამ ეტაპზე არის ერთადერთი, თბილისში ბაზირებული ეროვნული ავიაკომპანია, რომელსაც ტავ ჯორჯიამ მგზავრთა მოსაკრებელი 24 USD-დან 19 USD-მდე შეუმცირა. (აღნიშნული შეღავათით ისარგებლებს თბილისში ბაზირებული ნებისმიერი ეროვნული ავიაკომპანია, რომლის მიერ გადაყვანილი მგზავრთა რაოდენობა 50 000 აღემატება);

5. Georgian Airways - 2017 წლიდან სარგებლობს საჰაერო ხომალდების აფრენა-დაფრენის სპეციალური ტარიფით, რაც აღნიშნულ სერვისზე 30%-იან ფასდაკლებას გულისხმობს. ტავ ჯორჯიას მიერ შემუშავებული ამ სპეციალური ტარიფით სარგებლობენ თბილისში ბაზირებული ავიაკომპანიები;

6. Georgian Airways 2010 - წლიდან სარგებლობს ტავ ჯორჯიას მიერ ადგილობრივ რეისებზე შემუშავებული სპეციალური ტარიფით. აღნიშნული შეღავათი ავიაკომპანიას საშუალებას აძლევს საგრძნობლად შეამციროს ხარჯები.

ამ ყველაფრის ფონზე Georgian Airways ქსენოფობიური განცხადებებით, უსაფუძვლოდ ახდენს ტავ ჯორჯიას დისკრედიტაციას და კვლავ აგრძელებს საზოგადოების დეზინფორმაციას.

თბილისისა და ბათუმის საერთაშორისო აეროპორტების ოპერატორი კომპანია ტავ ჯორჯია უკვე 14 წელზე მეტია, ქვეყანაში განხორციელებული ინვესტიციებით, ინფრასტრუქტურული პროექტებით, მოზიდული ავიაკომპანიების რაოდენობითა და მგზავრებისთვის ახალი მიმართულებების შეთავაზებით, ქართული საავიაციო ბაზრის განვითარებაში მნიშვნელოვან როლს ასრულებს,“-აღნიშნულია განცხადებაში.

შეგახსენებთ, რომ რამდენიმე დღის წინ განცხადება გაავრცელა ავიაკომპანია „ჯორჯიან ეარვეისმა", რომლის თანახმადაც, თურქული კომპანია "ტავ ურბან ჯორჯია" ავიაკომპანიას თბილისის საერთაშორისო აეროპორტიდან ფრენების განხორციელების საშუალებას არ აძლევს და ითხოვს არარეალური ვალების დაფარვას, რისი ერთადერთი მიზანიც ავიაკომპანიის და მისი მგზავრების გაძარცვაა.

„ისეთი გადასახადები, როგორიც "ტავ ურბან ჯორჯიას" აქვს დაწესებული, არ არსებობს ევროპის თითქმის არცერთ აეროპორტში. "ჯორჯიან ეარვეისის" ხელმძღვანელობა თვლის რომ "ტავ ურბან ჯორჯიას" მმართველობის პირობებში, შეუძლებელია ქართული ავიაციის ფუნქციონირება და შემდგომი განვითარება.

"ტავ ურბან ჯორჯიას" წელიწადში სუფთა მოგების სახით 400 მილიონ ლარზე მეტი გააქვს საქართველოდან, სანაცვლოდ კი თბილისში, რეგიონში ყველაზე ცუდი აეროპორტი გვაქვს, ხოლო ბათუმის აეროპორტში გაუსაძლისი პირობებია. "ტავ ურბან ჯორჯია" უარს ამბობს მოსაკრებლის შემცირებაზე, ქართული ავიაცია კი სულ უფრო და უფრო ზარალდება.

"ტავ ურბან ჯორჯიას" ტაქსის ფასებიც კი კაბალური აქვს. მაგალითად, თუ თბილისის აეროპორტში ჩამოსული მგზავრი მოინდომებს თბილისის ცენტრამდე ტაქსით წასვლას, მოუწევს ისარგებლოს "ტავის" ტაქსით, რაც სულ მცირე 45 ლარი დაუჯდება. (აეროპორტის ტერიტორიაზე სხვა ტაქსის დგომის/დალოდების უფლებას არ აძლევენ),“-აღნიშნული იყო ავიაკომპანიის განცხადებაში.

Turkish Airlines-ი ათათურქის აეროპორტში ფრენებს 5-6 აპრილის გასაყარზე, ადგილობრივი დროით ღამის 2 საათზე შეწყვეტს და იმავე დღის 14:00 საათიდან, ოპერირებას უახლეს, სტამბოლის გიგანტურ აეროპორტში დაიწყებს.

სტამბოლის ახალი აეროპორტი ოფიციალურად 29 ოქტომბერს გაიხსნა. მისი გახსნა, თურქეთის რესპუბლიკის დაარსებიდან 95 წლის იუბილეს დაემთხვა. თუმცა მშენებლობა ჯერ დასრულებული არ არის. სრულად დაკომპლექტების შემდეგ, აეროპორტს სულ ექვსი ასაფრენი ზოლი ექნება და წლიურად 150 მილიონი მგზავრის მომსახურებას შეძლებს.

ახალი აეროპორტი 100-ზე მეტი ავიახაზის და 300-ზე მეტი მიმართულების მომსახურებას შეძლებს. ათათურქის სახელობის აეროპორტი, რომელიც შარშან 68 მილიონ მგზავრს მოემსახურა, სხვა საჭიროებებს მოემსახურება და სათადარიგო აეროპორტის რანგში იმუშავებს. მასზევე იგეგმება ბაზრობების გამართვა.

Turkish Airlines-ი 1933 წელს დაარსდა და თავიდან მხოლოდ 5 თვითმფრინავით ოპერირებდა. ამჟამად კი მის ფლოტში 330-ზე მეტი თვითმფრინავია, რომელთა შორის, სამგზავროს გარდა, სატვირთო თვითმფრინავებიც შედის. კომპანია 124 ქვეყანაში, 306 მიმართულებით დაფრინავს. შარშან „თურქიშ ეარლაინზი“ 75.2 მილიონ მგზავრს მოემსახურა და მისი რეისებისას, ადგილების 82 პროცენტი შევსებული იყო.

თუ მოგზაურობა თქვენი საყვარელი ჰობია, სხვადასხვა ქვეყანაში მოგზაურობისას, აუცილებლად გადაიხდიდით ტურისტულ გადასახადს, რომელსაც სავარაუდოდ, აქამდე ვერ შეამჩნევდით. ტურისტული გადასახადი ხშირად გაერთიანებულია თვითმფრინავის ბილეთის ან სასტუმროს გადასახადთან. ზოგიერთ ქვეყანაში, მაგალითად იაპონიაში ტურისტულ გადასახადს ქვეყნის დატოვებისას იხდით.

ტურისტული გადასახადი განსხვავდება ვიზისა თუ ნებისმიერი სხვა გადასახადისგან, რომელიც აუცილებელია მოგზაურობისას.

Travel Weekly-ის მიხედვით, ტანზანიაში 2016 წელს 18%-იანი დამატებითი ღირებულების გადასახადის აკრეფა სხვადასხვა გზით დაიწყეს. ტურისტები, რომლების ტანზანიას ესტუმრებოდნენ და მიწისზედა ტრანსპორტით თუ წყლის სხვადასხვა გასართობი ტრანსპორტით ისარგებლებდნენ, მათ გადასახადი ემატებოდათ.

სავარაუდოდ, მოგზაურობისას მომავალში თქვენ უფრო მეტ ქვეყანაში შეხვდებით ტურისტულ გადასახადს. როგორც ამბობენ ეს გადასახადი „ტურისტების გადატვირთულობასთან“ - over-tourism-თან ბრძოლაა, რომელიც უკვე ევროპულ ქალაქებს აწუხებს. ტურისტების მოსაკრებლით შემოსული თანხა, როგორც ამბობენ, ინფრასტრუქტურის განახლებას უნდა მოხმარდეს.

გთავაზობთ ქვეყნებს, სადაც ტურისტად სტუმრობისას გადასახადის გადახდა მოგიწევთ:

ბჰუტანი

„ინსაიდერის“ მიხედვით, ბჰუტანში მოგზაურობას თუ გადაწყვეტთ, აუცილებლად უნდა გაითვალისწინოთ, რომ ტურისტებისთვის დღიური ტურისტული მოსაკრებელი 200-250 დოლარია. ასევე უნდა იცოდეთ, რომ გადასახადი დამოკიდებულია იმაზე, წლის განმავლობაში რამდენჯერ სტუმრობთ ქვეყანას. ეს გადასახადი ფარავს თქვენს მოსაკრებელს საკვებზე, ტრანსპორტსა და საცხოვრებელზე, ასევე ტურისტულ ადგილებში შესასვლელ მოსაკრებელს.

იაპონია

2019 წლის დასაწყისიდან იაპონიაში ტურისტული გადასახადი დააწესეს. 1000 იენის (9,25$) გადახდა, ტურისტებს ქვეყნის დატოვებისას მოუწევთ. როგორც ამბობენ, ტურისტული გადასახადებით შემოსული თანხა 2020 წლისთვის, ტოკიოში ზაფხულის ოლიმპიადისთვის ინფრასტრუქტურის მოწესრიგებას მოხმარდება. იაპონიის ეროვნული ტურისტული ორგანიზაციის წარმომადგენელთა განცხადებით, ტურისტული გადასახადი სტუმრებისთვის უფრო კარგი გარემოს შექმნას და მათ უსაფრთხოებასაც მოხმარდება.

საფრანგეთი

საფრანგეთში ტურისტული გადასახადი დამოკიდებულია იმაზე, თუ ქვეყნის რომელ ქალაქში წახვალთ სამოგზაუროდ.

გერმანია

„ინსაიდერის“ მიხედვით, გერმანიაში არის „კულტურული მოსაკრებელი“, რომელსაც kulturförderabgabe-ს ეძახიან და მოსაკრებელი, რომელიც 1 ღამით სასტუმროში დარჩენისას გემატებათ. ამ და სხვა გადასახადის გადახდა მოგიწევთ მაშინ, თუ გადაწყვიტეთ, რომ ფრანკპურტს, ჰამბურგს ან ბერლინს ესტუმროთ. ასევე საყურადღებოა, რომ „დამატებითი ღირებულების გადასახადი“ (VAT) ერთ პერსონაზე 5 ევროა, ან სასტუმროს თანხის 5%.

იტალია

ევროპის სხვა ცნობილი ქვეყნების მსგავსად, ტურისტული გადასახადი იტალიაშიც არის. გადასახადი დამოკიდებულია იმაზე, თუ რომელ ქალაქს ესტუმრებით. მაგალითად რომში, ერთი ღამის გადასახადი 3-დან 7 ევრომდე აღწევს და ეს, რა თქმა უნდა, სასტუმროზეა დამოკიდებული.

2018 წლის დასასრულს, ვენეციაში შესვლისას გადასახადი 10 ევროს აღწევდა. ერთ-ერთმა ადგილობრივმა მცხოვრებმა CNN-თან ინტერვიუში განაცხადა: „ვენეცია დაიპყრეს ტურისტებმა, ამიტომ ჩვენ აუცილებლად უნდა შევამციროთ ტურისტული ექსკურსიები“.

ესპანეთი

ესპანეთში ტურისტული გადასახადი მაშინ, როცა წლის განმავლობაში ესპანეთს ყველაზე მეტი ტურისტი სტუმრობს, დღეში ერთ პერსონაზე 4 ევრომდე აღწევს, ბარსელონაში კი 2,50 ევროა.

„ინსაიდერის“ მიხედვით, ტურისტული მოსაკრებელის გადახდა მოგიწევთსაბერძნეთში, შვეიცარიაში, ბელგიაში, ავსტრიაში, რუმინეთში, სლოვაკეთში, ხორვატიაში, პორტუგალიასა და ჰოლანდიაში.

წყარო: bpn.ge

ავიაკომპანია Turkish Airlines-ის განცხადებით, კომპანია ათათურქის აეროპორტიდან 6 აპრილიდან აღარ იფრენს. Turkish Airlines-ის ბოლო ფრენა ათათურქის აეროპორტში 6 აპრილს, ღამის 2 საათზე შესრულდება. შედეგად, ფრენები, რომლებიც დაგეგმილი იყო ათათურქის აეროპორტში, შესრულდება სტამბულის აეროპორტიდან.

შეგახსენებთ, რომ სტამბოლში მსოფლიოში ყველაზე დიდი აეროპორტი 29 ოქტომბერს გაიხსნა. ახალი აეროპორტი ერთი დიდი ტერმინალით წელიწადში 90 მილიონი მგზავრის მომსახურებას შეძლებს. სამომავლოდ აეროპორტს კიდევ 2 ტერმინალი და 3 ასაფრენ/დასაფრენი ბილიკი შეემატება და სიმძლავრე 200 მილიონ მგზავრამდე გაიზრდება.

ევროპაში უამრავი ცნობილი ადგილია, რომელიც ტურისტებში პოპულარობით სარგებლობს.

ესენია პარიზი, ბარსელონა, ლონდონი, მილანი. თუმცა გარდა ამისა, theculturetrip.com წარმოგიდგენთ ევროპის 11 ნაკლებად ცნობილ ქალაქს, რომელსაც ცხოვრებაში ერთხელ აუცილებლად უნდა ესტუმრო.

კოტორი, მონტენეგრო

მონტენეგროს ზღვისპირა ქალაქ კოტორის ისტორიულ-კულტურული და ბუნებრივი რეგიონი „იუნესკოს“ მსოფლიო მემკვიდრეობის ძეგლთა სიაშია შესული. ქალაქში ნახავთ - ძველ ციხეებს, მე-11 საუკუნის გოთური სტილის წმინდა სტეფონის ტაძარს, ძველ ქუჩებსა და მოედნებს. ქალაქში ბევრია მიტოვებული ციხეები, რომელიც მთებზე და ბორცვებზე მდებარეობს.

პრევეზა, საბერძნეთი

ქალაქი პრევეზა ეპირუს რეგიონს ეკუთვნის. ამ პატარა თანამედროვე ქალაქს ისტორიული ცენტრი აქვს, სადაც უამრავი ქვაფენილიანი გზებია, ასევე ფეხით მოსიარულეთათვის განკუთვნილი ადგილები, სადაც უამრავი კაფე და ტავერნა მდებარეობს. ეპირის მთლიანი რეგიონი შესანიშნავი ადგილია სანაპიროებითა და მდინარეებით.

ოსიეკი, ხორვატია

ქალაქი ოსიეკი მდინარე დრავაზე მდებარეობს, რომელიც მე-18 საუკუნის არქიტექტურით და წმინდა პეტრესა და წმინდა პავლეს დიდებული ეკლესიებით ამაყობს. აქ მდებარეობს უძველესი ლუდსახარში, რომელიც 1687 წელს დაარსდა.

ფერარა, იტალია

ყველა ვთანხმდებით, რომ იტალიას რაღაც ჯადოსნობა ახასიათებს. ქალაქ ფერარას პატარა ნამდვილად არ ეთქმის, თუმცა ის ცნობილია თავისი უძველესი კედლებით. ქალაქში ნახავთ მე-14 და მე-15 საუკუნის სასახლეებსა და ტაძრებს.

კლონაკილტი, ირლანდია

ირლანდიას აქვს „საიდუმლო“ ქალაქი, რომლის სახელიც შესაძლოა, არც კი გაგიგიათ. კლონაკილტი პატარა სანაპირო ქალაქია კორკის რეგიონში. ის ნათელი, ფერადი და მხიარული ქალაქია, სადაც უამრავი ბარი და ულამაზესი საოჯახო ტიპის სასტუმროებია. გარდა ამისა, თუ სერფინგით ხართ გატაცებული, ქალაქში არის ადგილობრივი სერფინგის სკოლა და სანაპირო კი ცურვისთვის იდეალურია.

სინტრა, პორტუგალია

ლისაბონისა და პორტოს გარდა პორტუგალიას კიდევ აქვს ძვირფასი „სამკაული" ქალაქ სინტრას სახით. სინტრა მთასა და ზღვას შორის მოქცეული ქალაქია, რომელსაც მდიდარი ისტორიული მემკვიდრეობა აქვს. ქალაქში ნახავთ - კელუზუს, მონსერესა და პენას სასახლეებს, და ჭაობის ციხეს.

მარსელი, საფრანგეთი

მარსელი საფრანგეთის უმსხვილესი ქალაქი და პორტია, რომელიც ხმელთაშუა ზღვის ჩრდილო-დასავლეთ სანაპიროზე მდებარეობს. მარსელის ძველი პორტი ტურისტებს შორის ძალიან მიმზიდველია. ქალაქში შეგიძლიათ ნახოთ: ეკლესიები, პარკები, ოფიციალური შენობები და უამრავი მუზეუმი.

ტრონჰემი, ნორვეგია

ტრონჰემი მდინარე ნიდელვაზე მდებარეობს. მდიდარი კულტურული მემკვიდრეობით ჩრდილოეთ ევროპაში ერთ-ერთი ყველაზე საინტერესო ქალაქია. ღირშესანიშნაობები მოიცავს - სტეფტიგარდენის ხის სახლს, მე -17 საუკუნის სამეფო სასახლეს, ასევე ნიდაროსის ტაძარს და ჩრდილოეთ ევროპაში ყველაზე დიდი შუასაუკუნეების ტაძარს.

სალამანკა, ესპანეთი

სალამანკა ესპანეთის გულში მდებარეობს. ისტორიულ ცენტრში განთავსებულია ქვიშის შენობები და მზის ჩასვლის დროს ყვითელი ქვები სხივებს ირეკლავს და ყველაფერს ოქროსფერი გადაჰკრავს. სწორედ ამიტომ მას „ოქროს ქალაქსაც“ ეძახიან. სალამანკა საუნივერსიტეტო ქალაქია, რომელიც სავსეა ისტორიული არქიტექტურით, მათ შორის მე-12 და მე-15 საუკუნის საკათედრო ტაძრებითა და სხვა ნაგებობებით.

ლუცერნი, შვეიცარია

ლუცერნი ცენტრალურ შვეიცარიაში ტბა ლუცერნთან მდებარეობს. ლუცერნი მეგობრული ქალაქია, რომლის შემოვლასაც ფეხით შეძლებთ. აქ მდებარეობს ევროპის ყველაზე ძველი ხიდი და ასევე აუცილებლად უნდა ნახოთ საათის კოშკი.

გენტი, ბელგია

დაივიწყე ბრიუსელი, ანტვერპენი ან ბრიუგე და ნებისმიერი მოსაზრება, რომ ბელგია მოსაწყენი ქვეყანაა და აღმოაჩინე პატარა მყუდრო ქალაქი გენტი. თანამედროვე ქალაქი თავისი ისტორიული მემკვიდრეობით აუცილებლად სანახავი ადგილია. ქალაქშია - გრავენსტენის ციხე, მე-14 საუკუნის სამრეკლო და წმინდა პეტრეს სააბატო.

წყარო: bpn.ge

ვენეციის ქალაქის საბჭომ ტურისტებისთვის გადასახადების დაწესების ინიციატივა დაამტკიცა.

რეგულაციის მიხედვით, ტურისტს, რომელიც ვენეციას ერთი დღით ეწვევა, 2019 წელს დაახლოებით 3 ევროს გადახდა მოუწევს. ამ გადასახადით ბიუჯეტში შესული თანხით ქალაქის დასუფთავების ხარჯების დაფარვა იგეგმება.

ვენეციას ყოვეწლიურად დაახლოებით 25 მილიონი ტურისტი სტუმრობს, მათგან 14 მილიონი მხოლოდ ერთ დღეს ატარებს ქალაქში. მათგან დიდი ნაწილი კი ვენეციაში საპიკნიკედ ჩადის, რის გამოც ზარალდება ადგილობრივი ბიზნესი იმ კუთხით, რომ ტურისტებისგან სარგებელს ვერ იღებს.

პარალელურად, ადგილობრივები ტურისტებით გადატვირთულ ქუჩებს უჩივიან, დასუფთავების გადასახებს კი თავად იხდიან. სწორედ ამიტომ, როგორც ქალაქის მერმა ლუიჯი ბრუნიარომ განაცხადა, მიღებული გადაწყვეტილება ვენეციაში ტურისტების ნაკადის მართვის კუთხით მნიშვნელოვანი ნაბიჯი იქნება.

საქართველოს მოქალაქეებს 2019 წლის 1 მარტიდან უკრაინის ტერიტორიაზე შესვლა შეუძლიათ, როგორც საქართველოს მოქალაქის პასპორტით, ასევე პირადობის ელექტრონული მოწმობით (პირადობის ელექრტონული მოწმობით გადაადგილება შესაძლებელია მხოლოდ პირდაპირი საერთაშორისო საჰაერო ან საზღვაო ტრანსპორტის საშუალებით) და იმყოფებოდნენ უკრაინის ტერიტორიაზე ვიზის გარეშე არა უმეტეს 90 დღისა ნებისმიერ 180 დღიან პერიოდში.

ყოფნის ნებადართული ვადის გამოსათვლელად საჭიროა შემოსვლის ან კონტროლის დღიდან (დღე, როდესაც საჭიროა საქართველოს მოქალაქისათვის უკრაინაში ყოფნის ნებადართული ვადის დადგენა) 180 დღის ათვლა უკან. საქართველოს მოქალაქე არ დაარღვევს წესებს, თუ ამ 180-დღიან პერიოდში ის იმყოფებოდა უკრაინაში არაუმეტეს 90 დღისა.


უკრაინის მინისტრთა კაბინეტის 04.06.2015 წლის №367 დადგენილებით დამტკიცებული უკრაინის დროებით ოკუპირებულ ტერიტორიაზე შესვლისა და გასვლის წესი: 

უცხოეთის მოქალაქეთა და მოქალაქეობის არმქონე პირთა ყირიმის ავტონომიურ რესპუბლიკაში და ქ. სევასტოპოლში შესვლა დაშვებულია მხოლოდ ზემოაღნიშნული დადგენილების პირველ დანართში მითითებული საკონტროლო პუნქტების გავლით (http://zakon0.rada.gov.ua/laws/show/367-2015-%D0%BF ,  http://dpsu.gov.ua/ua/static_page/470.htm ) 
, საპასპორტო დოკუმენტისა და სპეციალური ნებართვის საფუძველზე, რომელიც გაცემულია უკრაინის სახელმწიფო საიმიგრაციო სამსახურის (უსს) ტერიტორიული ორგანოს ან ხერსონის ოლქში ნოვოტროიცკის და გენიჩესკის
რაიონში უსს-ს ტერიტორიალური ქვედანაყოფის მიერ. დროებით ოკუპირებულ ტერიტორიაზე შესვლის პროცედურის დარღვევის შემთხვევაში გათვალისწინებულია ადმინისტრაციული პასუხიმგებლობა. უცხოეთის მოქალაქეებთან დაკავშირებით, უკრაინის სახელმწიფო სასაზღვრო სამსახურის თანამშრომლებს უფლება აქვთ უარი გამოუცხადონ შემოსვლაზე ან სამი წლით აუკრძალონ შემოსვლა უკრაინის ტერიტორიაზე „უცხოეთის ქვეყნის მოქალაქეების და მოქალაქეობის არმქონე პირების სამართლებრივი სტატუსის შესახებ“ უკრაინის კანონის 13, 14 მუხლების
საფუძველზე. ინფორმაცია სპეციალური ნებართვების გაფორმების წესის შესახებ, აგრეთვე უცხოელთა
კატეგორიის ჩამონათვალი, ვისაც აქვს უფლება მიიღოს ხსენებული ნებართვა, განთავსებულია უკრაინის სახელმწიფო საიმიგრაციო სამსახურის ოფიციალურ ვებ-გვერდზე: http://dmsu.gov.ua/component/content/article/152-ukrainska/poslugi/dokumentuvannya-inozemtsiv-ta-osibbez-gromadyanstva/3262-otrimannya-spetsialnogo-dozvolu-dlya-v-jizdu-do-krimu.
საავტომობილო მიმოსვლისათვის უკრაინის დროებით ოკუპირებულ ტერიტორიაზე შესვლის და გამოსვლის საკონტროლო პუნქტების შესახებ ინფორმაცია განთავსებულია უკრაინის სახელმწიფო სასაზღვრო სამსახურის ოფიციალურ ვებ-გვერდზე: http://dpsu.gov.ua/ua/static_page/470.htm.

 

იანვრის თვეში საქართველოს მოქალაქეები შენგენის ზონის ქვეყნებიდან ყველაზე ხშირად გერმანიაში გაემგზავრნენ. ამის შესახებ ინფორმაციას შინაგან საქმეთა სამინისტრო აქვეყნებს. მიმდინარე წლის იანვარში საქართველოს 7449 მოქალაქე გაემგზავრა. 4172 გაემგზავრა იტალიაში, ხოლო 3336 პოლონეთში; 

რაც შეეხება ქვეყნებს, რომლებშიც საქართველოს მოქალაქეები ყველაზე იშვიათად გაემგზავრნენ. ესენი გახლავთ: ისლანდია - 1, სლოვენია 3 და სლოვაკეთი 4 გამგზავრება.  შინაგან საქმეთა სამინისტროს სტატისტიკის თანახმად, საქართველოს მოქლაქეებს გამგზავრებაზე უარი ეთქვათ 13 ქვეყანაში; მათ შორის ლიდერობს იტალია, სადაც საქართველოს მოქალაქეთა შესვლაზე 39 უარი დაფიქსირდა, მეორე ადგილს, 37 უარით იკავებს კვიპროსი, ხოლო მესამე ადგილზეა ესპანეთი, სადაც 27 უარი დაფიქსირდა. 

რაც შეეხება დეპორტაციას; საქართველოს 107 მოქალაქე თურქეთიდან გამოაძევეს, მეორე ადგილს, 82 დეპორტაციით იკავებს ისრაელი, ხოლო მესამე ადგილზე 65-ით გერმანია. ხოლო თითო-თითო მოქალაქე გამოაძევეს მალტადან, უკრაინიდან, პოლონეთიდან, პორტუგალიიდან და უნგრეთიდან.

საფრანგეთისა და საქართველოს დედაქალაქებს შორის საჰაერო მიმოსვლის სიხშირე იზრდება. მიმდინარე წლის 31 მარტიდან, ქართულ ავიაკომპანია „Georgian Airways”-თან ერთად, რეგულარულ ავიარეისებს აღნიშნულ მიმართულებაზე წამყვანი ფრანგული ავიაკომპანია ”Air France” განახორციელებს.

რეგულარული ფრენები პარიზი-თბილისი-პარიზის საჰაერო ხაზზე 2019 წლის 23 ოქტომბრამდე, კვირაში ორი სიხშირით, შემდეგი განრიგით განხორციელდება: ჩამოფრენა კვირას და ოთხშაბათს, გაფრენა - ორშაბათსა და ხუთშაბათს. რეისები Airbus A320 და A321 ტიპის საჰაერო ხომალდებით შესრულდება. 

საქართველოს ეკონომიკისა და მდგრადი განვითარების სამინისტროს სამოქალაქო ავიაციის სააგენტოს მიერ, ავიაკომპანია “Air France”-ს პარიზი-თბილისი-პარიზის საჰაერო ხაზზე რეგულარული საჰაერო მიმოსვლის განხორციელების ნებართვა 2019 წლის 25 თებერვალს მიენიჭა.

წინასწარი ინფორმაციით, ზაფხულის სანავიგაციო სეზონიდან, რეგულარული საჰაერო მიმოსვლა თბილისსა და პარიზს შორის კვირაში 4 სიხშირით შესრულდება (Georgian Airways წინასწარი ინფორმაციით – 2 სიხშირე; Air France – 2 სიხშირე). 

„Air France“ ავიაკომპანიების გლობალური ალიანსის „Sky Team”-ის დამფუძნებელი წევრია. 2018 წლის მონაცემებით, Air France–KLM ჯგუფის შვილობილი ავიაგადამზიდველი მსოფლიოს 92 ქვეყნის 195 მიმართულებით ოპერირებს.

მსოფლიოში უამრავი გასაოცარი და მიმზიდველი ადგილი არსებობს, თუმცა ზოგიერთი მათგანი ტურისტებში მეტად პოპულარულია.

ამჯერად buzzfeedtasty-იმ გამოაქვეყნა მსოფლიოს 30 ულამაზესი ქალაქის ნუსხა, რომელიც 30 წლის შესრულებამდე აუცილებლად უნდა მოინახულოთ.

რეიკიავიკი, ისლანდია - აუცილებლად ნახეთ ჩრდილოეთის ნათება 

ბუდაპეშტი, უნგრეთი - ფეხით გადაკვეთე ევროპის პირველი ხიდი, რომელიც ქალაქის ორ რაიონს - ბუდასა და პეშტს ერთმანეთთან აკავშირებს.

დუბლინი, ირლანდია - ესტუმრე ისტორიული დუბლინის ციხეს და მოინახულე მოჰერის კლდე.

ახალი ორლეანი, აშშ - დაესწარი აღლუმს დღესასწაულ მარდი გრასის პერიოდში

პარიზი, საფრანგეთი - გაისერნე სენის სანაპიროზე

ნიუ-იორკი, აშშ - დატკბით ხედით ცათამბრჯენებიდან

მიუნხენი, გერმანია - დალიე ლუდი ფესტივალ „ოქტომბერფესტზე“

ჰონოლულუ, ჰავაი - იცურე ზღვის კუებთან ერთად

ვენეცია, იტალია - ისეირნე გონდოლათი ცნობილ გრანდ არხში

ბანკოკი, ტაილანდი - დააგემოვნე ქუჩის საკვები 1 დოლარად და მოინახულე ტაძარი wat arun-ი

რიო დე ჟანეირო, ბრაზილია - უყურე სამბას ფესტივალს

ველინგტონი, ახალი ზელანდია - ეწვიე ბეჭდების ბრძანებლის ღირშესანიშნაობებს

ტოკიო, იაპონია - მიიღე კაბუკჩოს ღამის ცხოვრების გამოცდილება, ისეირნე აყვავებულ ალუბლის ხეებს შორის

ამსტერდამი, ნიდერლანდები - ისეირნე ველოსიპედით ქალაქში

სიდნეი, ავსტრალია - ესტუმრე coogee სანაპიროს, გადაკვეთე სიდნეის ჰარბორის ხიდი.

ქეიფ თაუნი, სამხრეთ აფრიკა - ადი საბაგიროთი მთაზე, სადაც ბარიც კი არის

ქაირო, ეგვიპტე - მოინახულე მსოფლიოს უძველესი მონუმენტი სფინქსი

ბარსელონა, ესპანეთი - ესტუმრე საგრადა ფამილიას

ნიცა, საფრანგეთი - გაისეირნე promenade des anglais-ზე

ლონდონი, გაერთიანებული სამეფო - ნახე მსოფლიოს დიდი საათი

ვანკუვერი, კანადა - ესტუმრე „ბრენდვაინის“ ჩანჩქერს

ჰონკ კონგი - სერფინგის მოყვარულთათვის ყურე Big Wave ჰონკონგში ძალიან პოპულარულია

ლუცერნი, შვეიცარია - ესტუმრე ლუცერნის ლომებს ქალაქის ყველაზე დიდ სანახაობას, გადაკვეთე მე-14 საუკუნის ხიდი

ტულუმი, მექსიკა - მოინახულე მაიას ტომის ტაძრის ნანგრევები და წყალქვეშა გამონაბოლქვი

ლოს ანჯელესი, აშშ - დალაშქრე წარწერა „ჰოლივუდი“ და ისეირნე წყნარი ოკეანის სანაპიროზე

სანტორინი, საბერძნეთი - უყურე მზის ჩასვლას ეგეოსის ზღვაში

დელი, ინდოეთი - ესტუმრე ინდოეთის კარიბჭეს და მოინახულე ტაჯ მაჰალი

სინგაპური - ისეირნე სინგაპურის „სუპერ ხეებს“ შორის, ისარგებლე ტურით ორანგუტანგებთან ერთად

ჰავანა, კუბა - მოიარე ფეხით ჰავანას ქუჩები

რომი, იტალია - მოინახულე ტრევის შადრევანი და დააგემოვნე უგემრიელესი მაკარონი

წყარო: bpn.ge

წლების მანძილზე ევროპის რამდენიმე ათეული ქალაქის მონახულების შემდეგ გამოვარჩიე 3 მათგანი, რომლებშიც საცხოვრებელი (სასტუმრო-აპარტამენტი), საკვები (კაფე-რესტორნები), ტრანსპორტი და ვაჭრობა სხვებთან შედარებით იაფია. ასეთი ქალაქები მცირებიუჯეტიანი მოგზაურობის მოსაწყობად საუკეთესო საშუალებაა. შევეცდები თითოეული მათგანის იაფი მხარეების წარმოჩენას.

კრაკოვი

მართალია ქართველებს უფრო დასავლეთ ევროპისკენ მიუწევთ გული, მაგრამ პოლონეთის სამეფო დედაქალაქი არანაკლებ საინტერესოა. კრაკოვი ცენტრალური ევროპის უძველესი და მდიდარი ისტორიის მქონე ქალაქია. და, რაც მთავარია, სიიაფით საქართველოს მოქალაქეებსაც კი განაცვიფრებებს.

კრაკოვში იაფია როგორც საცხოვრებელი, ასევე კაფე-რესტორნები - მათ ძირითადად თბილისის მსგავსი ფასები აქვთ, ხოლო სუპერმარკეტების პროდუქცია თბილისთან შედარებით უფრო იაფიც კია.

კრაკოვი სტუდენტური ქალაქია და, შესაბამისად,ბევრი ახალგაზრდული გასართობი აქვს - კლუბი თუ დისკოტეკა. იქ ხშირად ტარდება მსოფლიო ვარსკვლავების კონცერტებიც.

ეს ქალაქი არც ხელოვნების მოყვარულებს გააწბილებს - უამრავ მუზეუმსა და გალერეას აღმოაჩენთ. მათ შორის გამორჩეული სანახაობაა „ვაველის ციხესიმაგრე“, პოლონეთის მეფეთა სასახლითა და ვაველის კათედრალური ტაძრით. სასახლის დარბაზებში თითქმის ყოველთვისაა გამოფენილიხელოვნების ნიმუშები. არანაკლებ საინტერესოა ციხესიმაგრის ტერიტორიაზე არსებული მუზეუმების დათვალიერებაც.

ვაველის ისტორიის მოყოლას არ შევუდგები, თქვენ თავად ყველაფერს მარტივად იპოვით ინტერნეტში. ერთს აღვნიშნავ მხოლოდ, რომ ციხესიმაგრის ტერიტორიაზე აღმართულ კათედრალურ ტაძარში პოლონეთის მეფეების გვერდით დაკრძალულია საქართველოს დიდი მეგობარი, პოლონეთის პრეზიდენტი ლეხ კაჩინსკი და მისი მეუღლე მარია.

 კრაკოვის უამრავი ღირსშესანიშნაობის გარდა, ამ ქალაქს მილიონობით ტურისტი სტუმრობს ნაცისტების მიერ ებრაელების განადგურებისთვის მოწყობილი საკონცენტრაციო ბანაკების მოსანახულებლად.

ოსვენციმი კრაკოვიდან ნახევარი საათის სავალზეა და იქ ავტობუსი ყოველ ნახევარ საათში მოძრაობს, დადის მატარებელიც. თავად ოსვენციმის ბანაკი, რომელიც ახლა მუზეუმია, ორი ნაწილისგან შედგება. მათ შორის უფასო ავტობუსი კურსირებს და უფასოა ოსვენციმ 2-ის - ბირკინაუს - მონახულებაც.

ლვოვი

კრაკოვის შემდეგ ევროპის ალბათ ყველაზე იაფ ქალაქს ვესტუმროთ, რომელიც კრაკოვიდან სულ რაღაც 330 კილომეტრის დაშორებით მდებარეობს. მათ შორის რამდენიმე ბიუჯეტური ავტობუსი მოძრაობს, მგზავრობა შეიძლება მატარებლითაც. მაგრამ ხშირად უფრო იაფია ბიუჯეტური ავიაკომპანია Ryanair-ის ბილეთები, რომელთა ფასი 11 ევროდან იწყება.

ლვოვში ნამყოფ მოგზაურთა შორის გავრცელებული ხუმრობის მიხედვით, ამ ქალაქში ქართველიც კი თავს მილიონერად იგრძნობს. ლვოვი, დასავლეთ უკრაინის ისტორიული და ულამაზესი არქიტექტურის მქონე ქალაქი, ცენტრალურ-აღმოსავლეთ ევროპის სხვა ქალაქებისგან გამორჩეულია უამრავი თემატური კაფე-რესტორნებით, ყავისა და შოკოლადის მრავალფეროვანი მანუფაქტურებითა და თბილისთან შედარებით დაბალი ფასებით. იაფია როგორც საცხოვრებელი (აპარტამენტი - 15-20 აშშ დოლარი), ტრანსპორტი (ტრამვაი - 5 გრივნა, ანუ 50 თეთრი), ასვე გასტრონომია.

ჩემს გაოცებას საზღვარი არ ჰქონდა, როდესაც ლვოვის ცნობილი ოპერის წინ მდებარე კაფეში ანგარიში წარმოგვიდგინეს და ქვითარზე 24 გრივნა ამოვიკითხე. ვერ დავიჯერე. სავალუტო კურსი სპეციალურად „გუგლში“ შევამოწმე და აღმოჩნდა, რომ გამორჩეული ატმოსფეროს მქონე კაფეში დილის ყავა, ჩაი და ნამცხვარი მხოლოდ 2 ლარი და 7 თეთრი დაგვიჯდა. ამის შემდეგ ყველაზე პრესტიჟული კაფე-რესტორნების კარიც კი თამამად შევაღე.

ლვოვის რესტორნები ამ ქალაქის ერთ-ერთი ღირსშესანიშნაობაა. უამრავ ტურისტს იზიდავს ნაციონალისტური თუ მაზოხისტური თემატიკის რესტორნები თეატრალიზებული წარმოდგენებით. აქ იპოვით რესტორანს, რომლის სახურავზე „ტრაბანტი“ შემომჯდარა და აფრენას ლამობს, ხოლო ყავის მანუფაქტურაში შახტი გაუთხრიათ და ყავის მარცვლებს მიწისქვეშ მოიპოვებენ. ქალაქში თითქმის ყოველდღე საზეიმო განწყობაა და ხშირად იმართება ქუჩის ცეკვები - სხვადაასხვა ტიპის წარმოდგენები.

ქალაქის სანახაობებს ინტერნეტში თავადაც მოიძიებთ, მე მხოლოდ ერთს გირჩევთ: 70 გრივნად (7 ლარად) შეიძინეთ ექსკურსია, რომელიც ქალაქის შემოგარენს მოგატარებთ. უამრავი სასახლე და უნიკალური ციხესიმაგრეა, მათში დაცული ხელოვნების ნიმუშებითა და უნიკალური ხატებით.

ბუდაპეშტი

ბუდაპეშტი ცენტრალური ევროპის ნამდვილი მარგალიტია, დუნაიზე გადაშლილი მდიდრული, ულამაზესი არქიტექტურით, თუმცა ის ბიუჯეტური მოგზაურის ბიუჯეტისთვის მიუწვდომელი სულაც არ არის. ქუთაისის აეროპორტიდანბუდაპეშტში მოხვედრა ძალიან მარტივია. აპარტამენტები და ჰოსტელები თბილისის ფასების ფარგლებშია - 10-30 ევრო, ხოლო კრაკოვის მსგავსი და შეიძლება უფრო დაბალიც კი არის კაფე-რესტორნებისა და სხვა საკვები ობიექტების ფასები.

​ერთადერთი, რაც შეიძლება საქართველოსთან შედარებით ძვირი მოგეჩვენოთ, საზოგადოებრივი ტრანსპორტის ფასებია, მაგრამ უკან არ დაიხიოთ და აუცილებლად შეიძინეთ, მაგალითად, სამდღიანი ან ერთკვირიანი სამგზავრო ბილეთი ( 40 - 50 ლარი), რასაც თავისი უპირატესობები აქვს. ასე უფრო იაფი გამოდის საქალაქო ტრანსპორტით მგზავრობა, ვიდრე ყოველ ჯერზე ერთჯერადი ბილეთის შეძენისას იქნებოდა.

ბუდაპეშტის ერთ-ერთი ცნობილი ღირსშესანიშნაობაა კონტინენტალურ ევროპაში პირველი მეტროს ხაზი. ფოტოების მოყვარულთათვის მისწრებაა: საუკუნეზე მეტი ხნის მეტროს სადგურებში ძალიან შთამბეჭდავი ინსტაგრამული ფოტოები გამოდის.

და კიდევ, ჩვეულებრივი სატრანსპორტო ბილეთით შეგიძლიათ დუნაიზე გემით გასეირნება. იგივე მომსახურება რომელიმე ტურისტული გემით მთელი ერთკვირიანი სატრანსპორტო ბილეთის ფასი შეიძლება დაჯდეს. არის ისეთი ტურისტული სამგზავრო ბარათებიც, რომლებშიც რამდენიმე მუზეუმის მონახულებაც შედის 

ბუდაპეშტში ყოფნისას აუცილებლად ეწვიეთ თერმულ აბანოებს და ბაზარს, რომელშიც იაფი სურსათისა და ხილის გარდა ასევე ბიუჯეტურად შეიძლება ისადილოთ და უნგრული ტრადიციული გულიაში დააგემოვნოთ.

ბუდაპეშტი არც ახალგაზრდული თავშეყრის თემატური ადგილებისა და ღამის კლუბების სიმცირეს განიცდის. ასე რომ, მისწრებაა ევროპაში ბიუჯეტური მოგზაურობისთვის.

იაფი ქალაქების სია შეუძლებელია შემოიფარგლოს ჩემ მიერ ჩამოთვლილი ქალაქებით. ის გაცილებით ვრცელია. თუნდაც სალონიკი ან ათენი, ანდა ლარნაკა და სტამბოლი, ასევე, პოლონეთის რამდენიმე ქალაქი, მათ შორის გდანსკი, ვროცლავი ტურისტული ხიბლითა და სიიაფით გამორჩეული ქალაქებია. შედარებით იაფი შეიძლება ეწოდოს პრაღას და სილამაზით განთქმულ ჩესკი-კრუმლოვს.

თქვენ რომელი ქალაქები მიგაჩნიათ ყველაზე იაფად? გამოცდილება და მოსაზრებები გაგვიზიარეთ კომენტარებმში.

წყარო:  https://bit.ly/2IyRisg 

კომპანიები Ryanair-ი და Wizzair-ი ბარგის წესებში ცვლილებების გამო მილიონობით ევროთი დაჯარიმდნენ.

2018 წლის ნოემბრიდან ორივე კომპანიამ ბარგის წესში ცვლილებასთან დაკავშირებით მიიღო გადაწყვეტილება. ამ გადაწყვეტილების მიხედვით კაბინაში მცირე ზომის ჩემოდნის ატანაში მგზავრისგან დამატებით თანხას ითხოვდნენ. ბორტზე უფასოდ მხოლოდ ხელჩანთის ატანა იყო ნებადართული.

ხუთშაბათს იტალიის კონკურენციის სააგენტომ AGCM Ryanair-ი 3 მილიონი ევროთი დააჯარიმა, ხოლო Wizzair 1 მილიონი ევროთი.

მათი განცხადებით, ეს კომპანიები 5-დან 12 ევრომდე დამატებით თანხას ითხოვდნენ მგზავრებისგან კაბინაში ბარგის ასატანად. „ხელბარგი არის საჰაერო ტრანსპორტის არსებითი და საჭირო ნივთი და ის ყოველგვარი დამატებითი თანხის გარეშე უნდა იქნეს დაშვებული ბორტზე“, - აღნიშნულია AGCM-ის განცხადებაში.