ქვემო ქართლი

ქვემო ქართლი საქართველოს აღმოსავლეთ ნაწილში მდებარეობს თრიალეთი, ჯავახეთისა და ბამბაკ-ერევნის ქედებს შორის. ქვემო ქართლი მდინარე მტკვრის დინების ქვემო, მარჯვენა მხარესაა გადაჭიმული და მისი სახელწოდებაც, სწორედ, ამ გეოგრაფიული მდებარეობიდან გამომდინარეობს. ქვემო ქართლში მოსახლეობა საკმაოდ მრავალფეროვანი სამეურნო და სამრეწველო საქმიანობითაა დაკავებულით. აქ გავრცელებულია მეტალურგია, მადნის მოპოვება, მეცხოველეობა, მეღვინეობა, მეთამბაქეობა, ეთერზეთოვანი კულტურები და სხვ. ქვემო ქართლი განსაკუთრებით საინტერესოა არქეოლოგიური თვალსაზრისით. მის ტერიტორიაზე, კერძოდ, დმანისში აღმოჩენილია უძველესი და გადაშენებული ცხოველების ძვლები (სპილო, მარტორქა, ჟირაფი და სხვ.), ასევე ქვის პრიმიტიული იარაღებიც. და რაც ყველაზე მთავარია, აქ აღმოჩენილია უძველესი ევროპელი ადამიანების, ზეზვასა და მზიას, ნაშთები. სპეციალისტებმა დაადგინეს, რომ დმანისელი ჰომინიდები ამ ტერიტორიაზე 1 800 000 წლის წინ ბინადრობდნენ. ქვემო ქართლის სამზარეულოსთვის დამახასიათებელია წვნიანები, განსაკუთრებით კი შინდისგან დამზადებული კერძები და პურის ხარჩო. ქვემო ქართლი გამოირჩევა ისტორიული ძეგლების, ძირითადად კი ეკლესიებისა და სამონასტრო კომპლექსების სიუხვით.